އަވައްޓެރި ސްރީލަންކާގެ ކައިރީގައި އުފެދިގެން އުޅޭ ތޫފާން "އޯޗީ" ކުރިޔަށްވުރެ ބާރު ގަދަވެއްޖެ ކަމަށް މޫސުމާބެހޭ ގައުމީ އިދާރާއިން މިއަދު ބުނެފިއެވެ.
މޫސުމާބެހޭ ގައުމީ އިދާރާއިން ބުނީ މި ތޫފާންގެ ބާރު ކުރިޔަށްވުރެ ގަދަވެފައި ވަނީ މިއަދު ހެނދުން ފެށިގެން ކަމަށެވެ. އެހެންވެ މޫސުމަށް ކުރިޔަށްވުރެ ސަމާލުކަންދޭންޖެހޭ މިންވަރު ބޮޑު ކުރުމަށްވެސް އެ އިދާރާއިން ވަނީ އިލްތިމާސް ކޮށްފައެވެ. ތޫފާންގެ ބާރު ގަދަވުމާއެކު ވިލާގަނޑުގައި 70 މޭލަށް ވައި ގަދަވާނެ ކަމަށް ވަނީ ބެލެވިފައެވެ. އަދި ވިލާގަނޑު ނެތްއިރު ތަކުގައިވެސް 40 މޭލަށްވުރެ ވައި މަޑުވާނެ ކަމަށް ނުބެލެވެއެވެ.
މޫސުމާބެހޭ އިދާރާއިން ބުނީ ތޫފާންގެ މިސްރާބު ރާއްޖެއާ ދުރަށް ޖަހާފައި ހުރި ނަމަވެސް ތޫފާންގެ އަސަރު ކުރިޔަށްވުރެ ރާއްޖެއަށް ކުރާ މިންވަރު އެތައް ގުނައެއް ބޮޑުވާނެ ކަމަށާއި ސަބަބަކީ ރާއްޖެއާ 200 މޭލު ދުރުގައި އުފެދިފައިވާ ތޫފާންގެ ބާރު ކުރިޔަށްވުރެ ވަރުގަދަވުން ކަމަށެވެ. މި ތޫފާން އުފެދިފައި ވަނީ ރާއްޖޭގެ އުތުރުން 200 މޭލު ދުރުގައެވެ.
ތޫފާން "އޯޗީ" ގެ ސަބަބުން ރާއްޖެއަށް ކުރަމުން އަންނަ ގަދައިގައި ރާއްޖޭގެ އެކިރަށްރަށަށް އުދަ އެރުމާއި ފެންބޮޑުވުމުގެ ހާދިސާތައް ދަނީ ކުރިމަތިވަމުންނެވެ. އަދި ކަނޑުމަތީގެ ނުރައްކާތެރި ހާދިސާއެއްވެސް ވަނީ ހިނގާފައެވެ. ލަންކާއާ ކައިރީގައި އުފެދުނު ބާރުގަދަ ކޮޅިގަނޑު ތޫފާނަކަށް ބަދަލުވީ އިއްޔެގެ ވަގުތެއްގައެވެ.
