އެމެރިކާއިން ސީރިޔާ (ސޫރިޔާ) ގައި އަލްގާއިދާއާއި ދެކޮޅަށް ހިންގި އަސްކަރީ އޮޕަރޭޝަނެއްގައި އައިސިސްގެ ލީޑަރު އަބޫއިބްރާހީމް އަލްހާޝިމީ އަލްޤުރައިޝީ މަރުވެފައިވާކަން އެމެރިކާގެ ރައީސު ޖޯ ބައިޑަން ޔަގީންކޮށްދެއްވައިފިއެވެ.
"ރޭ، އަހަރެންގެ އެންގުމުގެ މަތިން، އެމެރިކާގެ އަސްކަރީ ބާރުތަކުން ވަނީ ހުޅަނގު އުތުރު ސީރިޔާގައި ޓެރަރިޒަމާ ދެކޮޅު އޮޕަރޭޝަނެއް ހިންގާފައި. އެއީ އެމެރިކާ ރައްޔިތުންނާއި، އަހަރުމެންގެ ބައިވެރިން ރައްކާތެރިކުރުމަށާއި، ދުނިޔެއަކީ މިހާރަށްވުރެ އަމާންތަނަކަށް ހެދުމަށް." ބައިޑަން ވިދާޅުވިއެވެ.
"އޭނާ އިޚްތިޔާރުކުރީ އޭނާ އަމިއްލައަށް ގޮއްވާލަން. ހަމައެކަނި ގޮވާތަކެތީގެ ބެލްޓެއް ގޮއްވާލާކަށްނޫން، އެކަަމަކު އެ (އޭނާހުރި) ތިންވަނަ ފަންގިިފިލާ ގޮއްވާލަން. އޭނާ ހިންގާފައިވާ ޖަރީމާތަކަށް ހޯދޭ އިންސާފާ ކުރިމަތިލުމުގެ ބަދަލުގައި، އޭނާއާއެކު އާއިލާގެ އެތައް މީހުންނެއް މަރާލާން." ބަައިޑަން ވިދާޅުވިއެވެ.
އިސްލާމިކް ސްޓޭޓް އިން އިރާގް އެންޑް ސީރިޔާ (އައިއިސް) ގެ ލީޑަރުކަމާ ޤުރައިޝީ ހަވާލުވީ 2019 ވަނަ އަހަރު އެމެެރިކާއިން ދިން ހަމަލާއެއްގައި އެޖަމާއަތުގެ ލީޑަރު އަބޫބަކްރު އަލްބަޣްދާދީ މަރާލުމާ ގުޅިގެން. އޭނާއަކީ އެއް އިރެއްގައި އެމެރިކާ ސިފައިންގެ ގައިދީއެއްގެ ގޮތުގައި ހުރި މީހެެކެެވެ. ޤުރައިޝީގެ ލީޑަރުކަމުގައި އައިސިސްއިން ވަނީ އިރާގުގައި ބައިމަދު ޔަޒީދީންނާ ދެކޮޅަށްް ހަމަލާތަކެއް ދީފައެެވެ.
"އިސްލާމިކް ސްޓޭޓްގެ ލީޑަރު ވަނީ ހަނގުރާމައިގެ މައިދާނުން އެއްފަރާތްކުރެވިފައި. އެއީ އެމެރިކާގެ އަސްކަރީ ބާރުތަކުގެ ހުނަރުވެރިކަމާ ހިތްވަރުގަދަކަމާއެކު. އޮޕަރޭޝަނަށް ފަހު (އޭގައި ބައިވެރިވި) އެމެރިކާ އެންމެން ވަނީ ސަލާމަތުން އެނބުރި އައިސްފައި" ބައިޑަން ދެއްވި ކުރު ބަޔާނެއްގައި ވިދާޅުވިއެވެ.
އެމެރިކާގެ ދިފާއީ ވުޒާރާ ޕެންޓަގަންއިން ކުރިން ބުނެފައިވާ ގޮތުގައި އެމެރިކާގެ ސްޕެޝަލް ފޯސަސްއިން ވަނީ ހުޅަނގު އުތުރު ސިރިޔާއި ފުޅާ ދާއިރާއެއްގެ އޮޕަރޭޝަނެއް ހިންގާފައެެވެ. ފުރަތަމަ ލިބުނު ޚަބަރުތައް ބުނިގޮތުގައި އެ އޮޕަރޭޝަނުގައި 13 މީހުން މަރުވެފައި ވެއެވެ. އޭގެ ތެރޭގައި 6 ކުޑަކުދިންނާ 4 އަންހެނުން ހިމެނެއެވެ.
އެ ސަރަހައްދުގެ ވަޒަންވެރިން ޚަބަރުފަތުރާ ވަސީލަތްތަކަށް މައުލޫމާތު ދިން ގޮތުގައި އެ ސަރަހައްދުގެ މަތިން ހެލިކޮޕްޓަރުތައް އުދުހިފައި ވާއިރު، ދެ ފަންގިފިލާގެ ގެއެއްގެ ވަށައިގެން އެމެރިިކާ ސިފަންނާ ހަނގުރާމަވެެރިން ދެގަޑިއެއްހާ އިރަށް ހަމަލާތައް ބަދަލުކޮށްފައި ވެއެވެ. މިހަމަލާތައް ބަދަލުކޮށްފައި ވަނީ ތުރުކީގެ ސަރަހައްދީ ރޮނގު ކައިރީގައި އޮންނަ އަޠުމާ އަވަށުގައެވެ. އެވަަށަކީ ސީރިޔާގެ ދާޚިލީ ހަނގުރާމައިގެ ސަަބަބުން އަމިއްލަ ގެދޮރު ދޫކޮށް އައިސްތިބި ސީރިޔާގެ ގިނަ ބަޔަކު ދިރިއުޅޭ ސަރަހައްދެކެވެ.
އެ ސަރަހައްދުގެ މީހުން ބައެއް ނޫސްވެރިންނަށް ކިޔައިދިން ގޮތުގައި އޮޕަރޭޝަން ކުރިއަށް ދިޔަ ގޮތުން އެމީހުން (އެމެރިކާ ސިފައިން) އުޅުނީ އެމީހަކު ދިރިހުއްޓާ ހައްޔަރުކުރަންކަން އެނގެއެވެ.
