މި އަހަރުގެ ރެހެންދި އެވޯޑަށް ކުރިމަތި ލުމުގެ ފުރުސަތު ޖެންޑަރ މިނިސްޓްރީން ހުޅުވާލައިފިއެވެ. ރެހެންދި އެވޯޑަކީ 2014ވަނަ އަހަރުން ފެށިގެން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ކޮންމެ އަހަރަކު ދެމުން އަންނަ އިނާމެކެވެ. މި އިނާމުގެ މަގުސަދަކީ ގައުމީ ޚިދުމަތުގައި އެކިއެކި ދާއިރާއިން އަންހެނުން ކުރާ މަސައްކަތްތަކާއި، ދިވެހިރާއްޖޭގެ ގައުމީ ތަރައްގީއަށާއި މުޖުތަމައު ބިނާ ކުރުމަށް އަންހެނުން އަދާކުރާ ދައުރު އަދި މުޖުތަމައުގައި އަންހެނުންގެ ކުރިއެރުމަށް ވަކި ފަރުދުންނާއި މުއައްސަސާތަކާއި، ޖަމުޢިއްޔާ ޖަމާޢަތްތަކުން ކުރަމުންދާ މަސައްކަތްތަކުގެ އަގު ގައުމީ ފެންވަރުގައި ވަޒަންކުރުމެވެ.
އެވޯޑަށް މި އަހަރު ކުރިމަތިލެވޭ ދާއިރާތަކަކީ ހަމައެކަނި އަންހެނުންނަށް ކުރިމަތިލެވޭ 14 ދާއިރާ އަކާއި ވަޒީފާ ދޭ ފަރާތްތައް ނުވަތަ މުއައްސަސާތަކުން އެވޯޑަށް ހުށަހެޅޭ ދާއިރާ އާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ދާއިރާ އާއި ކުލަބު ޖަމުޢިއްޔާ ޖަމާޢަތްތަކުގެ ދާއިރާއެވެ.
ޖެންޑަރ މިނިސްޓްރީން ހާމަކޮށްފައިވާ ގޮތުގައި ޢާންމު ފަރުދުންގެ ތެރެއިން އަންހެނުންގެ ތަރައްގީއަށް މަސައްކަތްކުރާ ފިރިހެނުންނާއި އަންހެނުންނަށް އެވޯޑަށް ހުށަހެޅޭ ދާއިރާގެ މައުލޫމާތާއި މި އެވޯޑަށް ކުރިމަތިލާނެ ގޮތުގެ އިތުރު މައުލޫމާތު މިނިސްޓްރީގެ ވެބްސައިޓުން ލިބޭން ހުންނާނެއެވެ. އަދި އެވޯޑަށް ކުރިމަތިލުމަށް ހުށަހަޅާ ފޯމާއި އުސޫލުވެސް ޑައުންލޯޑު ކުރެވެން ހުންނާނެއެވެ. މީގެ އިތުރަށް މި ހުރިހައި މައުލޫމާތެއް ދިވެހި ސަރުކާރުގެ ގެޒެޓު މެދުވެރިކޮށް ލިބެން ހުންނާނެއެވެ. މި އެވޯޑަށް ނަން ހުށަހެޅުމަށް ކަނޑައަޅައިފައިވާ ސުންގަޑިއަކީ 10 ފެބުރުވަރީ 2022 ވާ ބުދަ ދުވަހުގެ 14:00 އެވެ.
މި ދިޔަ އަހަރުގެ ސެޕްޓެމްބަރު މަހުގެ ތެރޭގައި ވަނީ ރެހެންދި އެވޯޑް 2020 އާއި 2021 އެކީގައި ބާއްވައިފައެވެ.
