ރައީސުލްޖުމްހޫރިއްޔާ އަބްދުﷲ ޔާމީން އަންނަ މަހުގެ ތެރޭގައި ޗައިނާއަށް ރަސްމީ ދަތުރުފުޅެއްގައި ވަޑައިގަންނަވާނެ ކަމަށް ޚަބަރު ލިބިއްޖެއެވެ.
މައުލޫމާތު ލިބިފައިވާ ގޮތުގައި ރައީސް ޗައިނާއަށް ފުރާވަޑައިގަންނަވާނީ އަންނަ މަހުގެ ކުރީކޮޅުއެވެ. އެނގިފައިވާ ގޮތުގައި މިވަގުތު ރައީސް ވަޑައިގަންނަވާނެ ތާރީޚެއް ކަމަށް ކަނޑައަޅާފައި އޮތީ ޑިސެމްބަރު މަހުގެ 6 ވަނަ ދުވަހުއެވެ. ރައީސްގެ މިދަތުރުފުޅާބެހޭ ގޮތުން ރައީސް އޮފީހުން ރަސްމީކޮށް އަދި އެއްޗެއް ނުބުނެއެވެ.
ޚަބަރު ލިބިފައިވާ ގޮތުގައި ރައީސް ޗައިނާގެ ވެރިރަށް ބެއިޖިންއަށް ވަޑައިގަންނަވަނީ ރާއްޖެ އާއި ޗައިނާގެ މެދުގައި ޑިޕްލޮމެޓިކް ގުޅުން ގާއިމް ކުރެވުނުތާ 45 އަހަރު ފުރުމާއި ގުޅިގެން ޗައިނާގައި ހުންނަ ދިވެހި އެމްބަސީން ބާއްވާ ހަފްލާއެއްގައި ބައިވެރިވެވަޑައިގަތުމަށެވެ. މި ރަސްމިއްޔާތުގައި ޗައިނާގެ ރައީސްވެސް ބައިވެރިވެވަޑައިގަންނަވާނެ ކަމަށް ޚަބަރު ލިބެއެވެ.
