މާލޭ ހުކުރު މިސްކިތް ހިމެނޭ ސަރަހައްދުގައި ސަރުކާރުން ކެފޭއެއް އަޅަން އުޅޭތީ މާލޭގެ ހެންވޭރު އުތުރުގެ ރައްޔިތުން އެކަމާ ދެކޮޅު ކަމަށް ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ވިދާޅުވެއްޖެއެވެ.
ޝާހިދު ކުރެއްވި ޓްވީޓެއްގައި ވިދާޅުވީ ސަރުކާރުން އެ ސަރަހައްދުގައި ކެފޭއެއް އަޅަން އުޅޭއިރު، މާލޭގައި ހުރި އާސާރީ ހުރިހާ ތަންތަނުގެ ތެރެއިން މިހާރު "ސުންނާފަތި ކޮށްނުލައި އޮތް" ހަމައެކަނި އާސާރީ ތަނަކީވެސް ހުކުރު މިސްކިތް ގޯތިތެރެ ކަމަށެވެ.
"ހުކުރު މިސްކިތާއި އެ މިސްކިތުގެ ވަށައިގެން ބާކީ މިހާރު އޮތް ސަރަޙައްދަކީ މާލޭގައި މުޅިން ސުންނާފަތި ކޮށްނުލައި އޮތް އާސާރީ ހަމައެކަނި ސަރަހައްދު، މިތަން ނެތިކޮށްލުމާ ހެންވޭރު އުތުރު ރައްޔިތުން ދެކޮޅު، އަޅުގަނޑުވެސް ދެކޮޅު، ހުއްޓާލާ" ޝާހިދު ކުރެއްވި ޓްވީޓުގައި ވިދާޅުވެފައިވެއެވެ.
ހުކުރު މިސްކިތުގެ ގޯތިތެރޭގައި ކެފޭއެއް އެޅުމަށްޓަކައި ހައުސިން މިނިސްޓްރީން އިއުލާން ކުރުމާއެކު ސިޔާސީ ބަޔެއް އެހެން ބޭފުޅުންވެސް އަންނަނީ އެއީ ގައުމުގެ މުހިންމު ތަރިކައެއް ކަމަށާއި އެ ސަރަހައްދުގައި ކެފޭއެއް އެޅުމަކީ ރަނގަޅު ކަމެއް ނޫން ކަމަށް ވިދާޅުވަމުންނެވެ. ކުރީގެ ރައީސް މައުމޫން ވިދާޅުވެފައި ވަނީ އެތަނުގައި ކެފޭއެއް ހެދުމަކީ ދީނީ އަދި ތާރީޚީ ގޮތުން ބެލިޔަސް ކުރުން ހެޔޮވެސް ނުވާނެވަރުގެ ކަމެއް ކަމަށެވެ.
ހައުސިން މިނިސްޓްރީން ބުނެފައި ވަނީ އެތަނުގައި ކެފޭއެއް ހަދާނީ ހުކުރު މިސްކިތުގެ ގޯތިތެރޭގައިވާ ތާރީޚީ ތަންތަނަށް އެއްވެސް ގެއްލުމެއް ނުލިބޭނެ ގޮތަށް ކަމަށެވެ.
