އަންނަ އަހަރު ރާއްޖެއިން މީހުން އުމްރާއަށް ގެންދަން ބޭނުންވާ ފަރާތްތަކުން އެކަމަށް އެދި ޕްރޮޕޯސަލް ހުށަހެޅުމުގެ ފުރުޞަތު އިސްލާމިކް މިނިސްޓްރީން މިއަދު ހުޅުވާލައިފިއެވެ.
އިސްލާމީކް މިނިސްޓްރީން ބުނެފައި ވަނީ އުމްރާއަށް މީހުން ގެންދިޔުމަށް އެދި ޕްރޮޕޯސަލް ހުށަހަޅާނީ ދާދިފަހުން ގެޒެޓްކޮށްފައިވާ "ދިވެހިރާއްޖެއިން އުމްރާއަށް މީހުން ގެންދިޔުމާބެހޭ އުސޫލު" ގައިވާ ޝަރުތުތައް ހަމަވާ ފަރާތްތަކުން ކަމަށެވެ. އެހެންކަމުން މިނިސްޓްރީއަށް ޕްރޮޕޯސަލް ހުށަހެޅުމަށް މިނިސްޓްރީން ވަނީ އަންނަ ޑިސެމްބަރު މަހުގެ 10 ވަނަ ދުވަހާ ހަމައަށް ފުރުޞަތު ހުޅުވާލާފައެވެ. އެދުވަހު މެންދުރު ފަހު 1 ޖަހަންދެން މިނިސްޓްރީން ޕްރޮޕޯސަލް ބަލައިގަންނާނެއެވެ.
މިނިސްޓްރީން ބުނީ މާދަމާއިން ފެށިގެން ޕްރޮޕޯސަލް ފޮތް ދޫކުރަމުން ދާނެކަމަށެވެ. ނަމަވެސް މިނިސްޓްރީން ފޮތް ދޫކުރުމަށް ހަމަޖެހިފައި ވަނީ އަންނަ މަހުގެ 7 ވަނަ ދުވަހުގެ ނިޔަލަށެވެ. މިނިސްޓްރީން ބުނީ ހުށަހަޅާ ހުރިހާ ޕްރޮޕޯސަލެއް ބަލާނީ ހުށަހެޅި ހުރިހާ ފަރާތެއްގެ ހާޒިރުގައި ކަމަށެވެ. ޕްރޮޕޯސަލް ބެލުން އޮންނާނީ އަންނަ ޑިސެމްބަރު މަހުގެ ފަހު ދުވަހު އިސްލާމީ މަރުކަޒުގެ ޖަލްސާކުރާ ހޯލުގައެވެ.
