37 އަހަރު ޒިމްބާބުވޭގެ ރައީސް ކަމުގެ މަގާމުގައި ހުންނެވި ފަހުން ސިފައިން ނުކުމެ ވެރިކަމުގެ ބާރު އަތުލައްވައި އިސްތިއުފާ ދެއްވަން މަޖުބޫރު ކުރެއްވުމުންވެސް އިސްތިއުފާ ނުދެއްވައި ހުންނެވުމަށް ފަހު އެންމެ ފަހުން މުގާބޭ އިސްތިއުފާ ދެއްވީ ސިފައިންނާއި އެގައުމުގެ ސަރުކާރު ހިންގެވުމަށް ދެން ވަޑައިގެންނެވި ބޭފުޅުންގެ މައްޗަށް ވަރުގަދަ ޝަރުތުތަކެއްވެސް ކުރިމަތި ކުރައްވާފައި ކަމަށް މީޑިޔާ ރިޕޯޓުތައް ބުނެފިއެވެ. މުގާބޭ އިސްތިއުފާ ދެއްވީ މުގާބޭގެ ހުރިހާ ޝަރުތުތަކަކާ ސިފައިންނާއި ސަރުކާރުން އެއްބަސްވުމުން ކަމަށްވެސް ބަޔެއް މީޑިޔާ ރިޕޯޓުތައް ވަނީ ބުނެފައެވެ.
މީޑިޔާ ރިޕޯޓުތައް ބުނާގޮތުގައި މުގާބޭ ކުރެއްވި ޝަރުތުތައް ގަބޫލުކޮށް އެކަންކަން ކޮށްދޭނެ ކަމަށް އެގައުމުގެ އާ ސަރުކާރުން ވެސް ވަނީ ބުނެފައެވެ. އަދި އެކަން ސަރުކާރުގެ އޮފިޝަލުންނާ ހަވާލާދީވެސް މީޑިޔާގައި ރިޕޯޓު ކޮށްފައިވެއެވެ. ނަމަވެސް ސަރުކާރުން ރަސްމީކޮށް އެކަން ކަށަވަރު ކޮށެއް ނުދެއެވެ. އެހެންނަމަވެސް ސިފައިން ވަނީ މުގާބޭ އާއި އަނބިކަބަލުން ގްރޭސްގެ މައްޗަށް ދައުވާ ނުކުރާނެ ކަމަށް ރަސްމީކޮށް ހާމަކޮށްފައެވެ.
މީޑިޔާ ރިޕޯޓުތައް ބުނާ ގޮތުގައި މުގާބޭގެ ޝަރުތުތަކާއެކު ސަރުކާރުން އެއްބަސް ވެފައި ވަނީ މުގާބޭ އާއި އަނބިކަނބަލުން ގްރޭސްގެ މައްޗަށް ދައުވާ ނުކުރަން އެކަންޏެއްނޫނެވެ. މިހާރު އުމުރުފުޅުން 93 އަހަރުގެ މުގާބޭ ދުނިޔޭގައި ހުންނެވިހާ ދުވަހަކު ރައީސް ކަމުގެ މުސާރަ އާއި ރައީސް ކަމުގައި ހުންނެވިއިރު ލިބިވަޑައިގަންނަވާ ހުރިހާ އިނާޔަތްތައްވެސް މުގާބޭގެ އަށް ދިނުމަށް ސަރުކާރުން ވަނީ އެއްބަސްވެ އެގޮތަށް އަމަލުކުރާނެ ކަމަށް ބުނެފައި ކަމަށްވެއެވެ.
އެހެންކަމުން ރައީސް ކަމުގައި ނެތަސް، ދުނިޔޭގައި ހުންނެވިހާ ދުވަހަކު މުގާބޭއަށް ރައީސްގެ މުސާރަވެސް ސަރުކާރުން ދޭނެކަމަށާއި، އޭގެއިތުރުން ރައީސް ކަމުގައިވެސް ހުންނެވިއިރު ސަރުކާރުން ދެމުން އައިގޮތަށް އެންމެ ފުރިހަމަ ސިއްޙީ ފަރުވާވެސް މުގާބޭއަށް ލިބިވަޑައިގަންނަވާނެ ކަމަށްވެއެވެ. އަދި ރައީސް ކަމުގައި ހުންނެވިއިރު ސިފައިން ދެމުން އައި ސެކިއުރިޓީވެސް މުގާބޭއަށް ތަފާތެއް ނުވެ ދެންވެސް ލިބިވަޑައިގަންނަވާނެ ކަމަށް ބުނެއެވެ. ސަރުކާރު އޮފިޝަލުންނާ ހަވާލާދީ ބަޔެއް މީޑިޔާ ރިޕޯޓުތައް ބުނާގޮތުގައި އެ ހުރިހާ ކަމެއް ރައީސް ކަމުން އިސްތިއުފާ ދެއްވި މުގާބޭއަށް ދެއްވާނެއެވެ. ރިޕޯޓުތައް ބުނާގޮތުގައި މުގާބޭ ވަނީ ސަރުކާރާއެކު ހެއްދެވި މި ޑީލްގެ ތެރެއިން އަނބިކަނަބަލުން ގްރޭސްއަށްވެސް އިސްކަމެއް ދެއްވައި ބައި އަޅުއްވާފައެވެ. އެގޮތުން މުގާބޭ އަވަހާރަވިޔަސް މުސާރައިގެ ދެބައިކުޅަ އެއްބައި މުސާރަ މުގާބޭގެ އަނބިކަނބަލުން ގްރޭސްއަށް ދިނުމަށްވެސް ވަނީ ނިންމާފައި ކަމަށްވެއެވެ.
މިހުރިހާ ކަމެއް ކޮށްދެއްވުމުގެ އިތުރުން އެގައުމުގެ ސަރުކާރުން ވަނީ މުގާބޭއާއެކު ވެވުނު އެއްބަސްވުމެއްގެ ދަށުން 10 މިލިއަން ޑޮލަރުވެސް ދެއްވަންވެސް ނިންމާފައި ކަމަށް ރިޕޯޓުތައް ބުނެއެވެ. އެ ފައިސާގެ ތެރެއިން އެއްފަހަރާ 5 މިލިއަން ޑޮލަރު މުގާބޭއަށް ދޭންޖެހެއެވެ. އަނެއް 5 މިލިއަން ޑޮލަރު ދިނުމަށް ހަމަޖައްސާފައި ވަނީ ބައިބަޔަށް ބަހާލައިގެން ދޭންކަމަށްވެސް ބުނެއެވެ.
މުގާބޭގެ މިޝަރުތުތަކާއެކު އަސްކަރިއްޔާ އާއި ގައުމުގެ ވެރިން އެކަންކަން ކޮށްދެއްވަން އެއްބަސްވިއިރު މުގާބޭއަށްވެސް ޝަރުތުތަކެއް ކުރިކަމަށް ބަޔެއް މީޑިޔާ ރިޕޯޓުތައް ބުނެއެވެ. އެއީ ޒިމްބާބުވޭގައި ކުރިޔަށް އޮންނަ އިންތިޚާބު ތަކުގައި މުގާބޭ އާއި އަނބިކަނބަލުން ގްރޭސް ވާދަނުކުރެއްވުމާއި އެދެބޭފުޅުން ސިޔާސީ ކަންކަމާދުރުގައި ތިއްބެވުމެވެ. ގައުމު ހަލަބޮލި ކުރެއްވުމަށް އެއްވެސް ސިޔާސީ މަސައްކަތެއް ނުކުރައްވައި ހިމޭނުން ތިއްބެވުމެވެ. މުގާބޭ ކުރިން ވިދާޅުވަމުން އައީ ވެރިކަން ކުރާ ޕާޓީގެ އިންތިޚާބުގައިވެސް އަދި ކުރިޔަށް އޮތް ރިޔާސީ އިންތިޚާބުގައިވެސް ވާދަކުރައްވާނެ ކަމަށެވެ. ނަމަވެސް ސަރުކާރާއި މުގާބޭއާއެކު ހެދުނު މި ޑީލާއެކު އެ ހުރިހާ ޚިޔާލުފުޅުތަކެއް ނިމިފައިވާ ކަމަށް ތަޖުރިބާކާރުން ދަނީ ބުނަމުންނެވެ. ނަމަވެސް މިއިން އެއްވެސް ކަމެއް އެއީ ތެދުކަން މުގާބޭގެ ފަރާތުންވެސް އަދި ސަރުކާރުންވެސް ރަސްމީ ސިފައެއްގައި ބުނެފައެއް ނުވެއެވެ.
ދިގު ވެރިކަމެއް ކުރައްވާފައިވާ މުބާގޭއަކީ އެގައުމުގައި މިވަގުތު ތިއްބެވި އެންމެ މުއްސަނދި ބޭފުޅުންގެ ތެރޭގައިވެސް ގުނާލެވޭނެ ބޭފުޅެކެވެ. މުގާބޭގެ އަގުބޮޑު ގެކޮޅުތައް ޒިމްބާބުވޭގެ އިތުރުން ދުނިޔޭގެ ބަޔެއް އެހެން ގައުމުތަކުގައިވެސް އެބަހުއްޓެވެ.
