2007 ވަނަ އަހަރުގެ އޭޕްރީލް މަހުގެ 15 ވަނަ ދުވަހު އޮތް ސިޔާސީ ހަރަކާތެއްގައި ކުރީގެ ރައީސް މުޙަންމަދު ނަޝީދު ހައްޔަރު ކުރުމުގެ ތެރެއިން ނަޝީދުގެ "ލަފުގައި" ހިފި އޭރުގެ ފުލުސް މީހާ ނަޝީދުގެ ކިބައިން 10 އަހަރަށް ފަހު މާފަށް އެދިއްޖެއެވެ.
އެދުވަހު ނަޝީދުގެ ދެ އަތްޕުޅުގައި ދެ ފުލުހުން ހިފަހައްޓާފައިވާއިރު ފަހަތުން ގިރުވާނާއެކު ލަފުގައި ހިފަހައްޓައިގެން ފަހަތުން ކޮއްޕަމުން ދިޔަ ފުލުސް މީހަކީ މިހާރު ސިޔާސީ އިދިކޮޅު ހަރަކާތްތަކުން ފެންނަ އަލީ ޝާހިދު (ސްޓެޕް އައްޔަ) އެވެ. ފިލްމީ ދާއިރާގައިވެސް ހަރަކާތްތެރިވާ އައްޔަ 10 އަހަރަށް ފަހު ނަޝީދުގެ ކިބައިން މާފަށް އެދުނީ އެދުވަހުގެ މަންޒަރު ދައްކުވައިދޭ ފޮޓޯއަކާއެކު ކުރި ޓްވީޓެއްގައެވެ.
"ރައީސް މުޙަންމަދު ނަޝީދުގެ ލަފުގައި ހިފުނީތީ މާފަށް އެދެން، ތިޔައީ ރާއްޖޭގެ ޑިމޮކްރަސީގެ ހުޅުކޮޅު" އައްޔަ ޓްވިޓާއަށް ދޫކޮށްލި މާފުގެ ބަސްކޮޅުގައި ބުނެފައިވެއެވެ.
އައްޔަގެ މި ޓްވީޓާއެކު އެމްޑީޕީގެ ސަޕޯޓަރުންނާއި އިސްބޭފުޅުންވެސް ދަނީ ނަޝީދުގެ ކިބައިން މާފަށް އެދި އައްޔަ ދެއްކި ހިތްވަރަށް ސާބަސް ދެމުންނެވެ. އޭރު އައްޔައަކީ ޕޮލިސް ކޮންސްޓެބަލްގެ މަގާމުގައި ހުރި ފުލުހެކެވެ. އައްޔަ ވަނީ ރައީސް އަބްދުﷲ ޔާމީންގެ ސަރުކާރުގައި ކޯޑިނޭޓަރުކަންވެސް ކޮށްފައެވެ.
