ހުޅުމާލޭގައި ފުލުހުން ހިންގި ޚާއްސަ އޮޕަރޭޝަނެއްގައި 10 މިލިއަން ރުފިޔާގެ މަސްތުވާތަކެތި މީހަކު އަތުން ފުލުހުން އަތުލައިގެންފިއެވެ.
ފުލުހުން ބުނީ މިމަހުގެ 21 ވަނަ ދުވަހު ފުލުހުންގެ އިންޓެލިޖެންސްއަށް ލިބުނު މައުލޫމާތަކާއި ގުޅިގެން ހުޅުމާލެއިން މީހަކު ހިފަހައްޓައި އޭނާ ބަލައި ފާސްކޮށް އަދި އޭނާ މަސައްކަތްކުރާ ސަރަޙައްދުވެސް ބަލައި ފާސްކުރުމުން މަސްތުވާތަކެތި އަޅާފައި ބަންދު ކޮށްފައިވާ ޖުމްލަ 76 ޕެކެޓް ފެނުނު ކަމަށެވެ.
ފުލުހުން އަތުލައިގެން ހައްޔަރު ކުރި އުމުރުން 40 އަހަރުގެ މީހާއަކީ މިދިޔަ އަހަރު ޕެރޯލްގެ ދަށުން ދޫކޮށްލާފައިވާ މީހެއް ކަމަށްވެއެވެ. ދިވެހި މީހާ ހައްޔަރުކުރި ސަރަޙައްދުން ބިދޭސީއަކުވެސް ފުލުހުން ވަނީ ހައްޔަރު ކޮށްފައެވެ. ފުލުހުން ބުނީ އެމީހާގެ އަތުން ތިން ވައްތަރެއްގެ މަސްތުވާތަކެތި އަތުލެވުނު ކަމަށެވެ. އޭގެތެރޭގައި ހިމެނެނީ ކްރިސްޓަލް މެތް އާއި ހެރޮއިން އާއި ހެޝިސް އޮއިލްއެވެ. މީގެތެރެއިންވެސް ކްރިސްޓަލް މެތް ބްރޭންޑްގެ މަސްތުވާތަކެތިވެސް ގިނަ އަދަދަކަށް ފެނިފައިވެއެވެ. އެ ވައްތަރުގެ އެކަނިވެސް 2.81 ކިލޯ ހުރި ކަމަށްވެއެވެ. މިއީ މިބާވަތުގެ މަސްތުވާތަކެތި ރާއްޖެއިން މިހާގިނައިން އަތުލައިގަނެވުނު ފަހަރު ކަމަށްވެސް ފުލުހުން ބުނެފައިވެއެވެ.
