މިއަހަރުގެ ތައުލީމީ އަހަރު ނިމި، ދަރިވަރުންނަށް ރިޕޯޓު ފޮތް ދިނުމަށް ފަހު ސްކޫލްތައް ބަންދު ކޮށްފިއެވެ.
މާލެ އާއި ރާއްޖޭގެ ހުރިހާ ސްކޫލް ތަކެއްގައި މިއަދު ވަނީ ދަރިވަރުންގެ އަހަރީ ރިޕޯޓު ފޮތް ދީ ހުރިހާ ދަރިވަރުންނަށް ބޮޑު ޗުއްޓީ ދީފައެވެ. ހުރިހާ ސްކޫލް ތަކެއް މިއަދު ބަންދުވި ނަމަވެސް މީގެ ހަފްތާއެއްހާ ދުވަސް ކުރިންވެސް ބަޔެއް ސްކޫލް ތަކުގައި ރިޕޯޓު ފޮތް ދިނެވެ.
ދަރިވަރުން ބޮޑު ޗުއްޓީއަށް ފަހު ދެން އަންނަ އާ އަހަރުގެ ކިޔުމަށް ނުކުންނާނީ އަންނަ އަހަރުގެ ޖެނުއަރީ 14 ވަނަ ދުވަހުއެވެ. ދަރިވަރުންނަށް މިއަދު ބޮޑު ޗުއްޓީ ލިބުމާއެކު މިއަދުވެސް ވަރަށްގިނަ އަދަދެއްގެ ބެލެނިވެރިންނާއި ދަރިވަރުން ޗުއްޓީ ހޭދަކުރުމަށް ފުރި މަންޒަރު ފެނިފައިވެއެވެ.
އާންމު ބޮޑު ޗުއްޓީގައި ރާއްޖޭގެ އަތޮޅު ތަކަށް ގިނަ އަދަދެއްގެ ކުދިން ބެލެނިވެރިންނާއެކު ޗުއްޓީއަށް ދާއިރު ބޭސްފަރުވާ އަށާއި ޗުއްޓީ ހޭދަކުރުމަށް ރާއްޖެއިން ބޭރަށްވެސް ބޮޑު ޗުއްޓީ ތެރޭގައި ދާމީހުން މަދެއްނޫނެވެ.
