ހދ. ކުޅުދުށްފުށީގައި އެއާޕޯޓް އަޅަން ބޭނުންވާ ކުޅި އާއި މޫދުގެ ސަރަހައްދު ރަސްމީކޮށް މިއަދު ހިއްކަން ފެށުމަށްޓަކައި އެރަށުގައި އޮތް ކުލަގަދަ ރަސްމިއްޔާތުގައި ކުޅުދުށްފުށީ ކައުންސިލްގެ އެމްޑީޕީ މެމްބަރުން ބައިވެރި ވުމުން ޕީޕީއެމްގެ ޕާލިމެންޓްރީ ގްރޫޕްގެ ލީޑަރ އަޙްމަދު ނިހާން ޙުސައިން މަނިކުގެ އެ މެމްބަރުންނަށް ތައުރީފް ކުރައްވައިފިއެވެ.
ނިހާން ކުރެއްވި ޓްވީޓެއްގައި ވިދާޅުވީ މިއަދު އެރަށުގައި އޮތް ބިން ހިއްކުމުގެ ރަސްމިއްޔާތުގައި ކުޅުދުށްފުށީ އެމްޑީޕީ ކައުންސިލަރުން ބައިވެރިވުމުން އެނގިގެން ދިޔައީ ކުޅުދުށްފުށީ ކައުންސިލަރުން ޕާޓީގެ ވިސްނުމަށްވުރެ ގައުމީ ވިސްނުން އިސްކުރި ކަމެވެ.
ކުޅުދުށްފުށީގައި މިއަދު އޮތް ރަސްމިއްޔާތުގައި އެމްޑީޕީގެ ރީނދޫ ކުލައިގެ ޓައީ އަޅައިގެން ހުރިހާ ކައުންސިލަރުން ވަނީ ބައިވެރި ވެފައެވެ. އެމްޑީޕީގެ ކައުންސިލަރުން މި ރަސްމިއްޔާތުގައި ބައިވެރިވުމުން ގިނަބަޔަކު ދަނީ އެކަން ފާހަގަ ކުރަމުންނެވެ. އެ ރަށުގައިވާ ކުޅި ހިއްކައިގެން އެއާޕޯޓް އަޅާތީ ބަޔެއް ފަރާތްތަކުން އެކަމާ ދެކޮޅަށް އަޑު އުފުލުމުންވެސް އެމްޑީޕީގެ މެމްބަރުން ހިމެނޭ އެރަށު ކައުންސިލުން ބުނެފައި ވަނީ ރައްޔިތުން ބޭނުން ވަނީ ކުޅި ނޫން ކަމަށާއި ބޭނުން ވަނީ އެއާޕޯޓް ކަމަށެވެ. ބަޔެއް މީހުން ސޯޝަލް މީޑިޔާގައި ބުނެފައި ވަނީ މިއަދު ކުޅުދުށްފުށީ ކައުންސިލުން އެ ދެއްކީ ޑިމޮކްރަސީގެ ވަރަށް ރީތި ނަމޫނާއެއް ކަމަށާއި ކުޅުދުށްފުށީ ކައުންސިލުން ދައްކައި ދިނީ އެމްޑީޕީވެސް އޮތީ "ތަރައްގީއާއެކު" ގައި ކަމެވެ.
ކުޅުދުށްފުށީގައި މިއަދު އޮތް ކުލަގަދަ ރަސްމިއްޔާތެއްގައި އެރަށުގެ އެއާޕޯޓް އަޅާ ސަރަޙައްދުގެ ބިންކުން ފައްޓަވައި ދެއްވީ ރައީސުލްޖުމްހޫރިއްޔާ އަބްދުﷲ ޔާމީންއެވެ. އެމްޓީސީސީއަށް އަލަށް ގެނައި އެންމެ ބޮޑު ބޯޓު ކަމުގައިވާ މަހާޖައްރާފުން ހިއްކާ ފުރަތަމަ ސަރަހައްދު ހިއްކުން ފެށި މިއަދުގެ ރަސްމިއްޔާތުގައި ކުޅުދުށްފުށީގެ ހުރިހާ ރައްޔިތުން ކަހަލަ ގޮތަކަށް ވަނީ ބައިވެރި ވެފައެވެ. ރަސްމިއްޔާތުގައި ވަނީ އިދިކޮޅު އެމްޑީޕީގެ މީހުންވެސް ބައިވެރި ވެފައެވެ.
ކުޅުދުށްފުށީގައި އެއާޕޯޓް އެޅުމަށް ހިއްކަނީ އެރަށުގައިވާ އެންމެ ބޮޑު ގުދުރަތީ ކުޅި ހިމެނޭ ސަރަޙައްދެވެ. އެއާޕޯޓް އެޅުމަށް ހިއްކުމަށް ހަމަޖެހިފައި ވަނީ ކުޅިން 9 ހެކްޓަރުގެ ބިމެވެ. އަނެއް 6 ހެކްޓަރުގެ ބިން ހިއްކާނީ ރަށުގެ ހުޅަނގު ފަރާތު މޫދުންނެވެ. މި މަސައްކަތް ކުރާ ކުންފުނި ކަމަށްވާ އެމްޓީސީސީން ބުނެފައި ވަނީ އެއާޕޯޓް އެޅުމަށް ހިއްކަން ބޭނުންވާ ސަރަހައްދު ކުރިޔަށް އޮތް 6 މަސް ދުވަހުގެ ތެރޭގައި ހިއްކައި ނިންމާލާނެ ކަމަށެވެ.
އެމްޓީސީން ބުނީ ރާއްޖޭގައި އޮތް އެންމެ ބޮޑު ކޮންނަ ބޯޓު ކަމަށްވާ މަހާޖައްރާފުން 50 މީޓަރު އަޑިންވެސް ވެލި ނެގުމުގެ ކުޅަދާނަކަން ލިބިފައިވާ ކަމަށެވެ. މިއީ 92 މީޓަރަށް ވުރެ ދިގު އަދި 16 މީޓަރު ފުޅާ ޑްރެޖަރެކެވެ. އަދި އެއްފަހަރާ 3700 ކިއުބިކް މީޓަރުގެ ވެލި ބަރުކުރެވޭނެ އުޅަނދެކެވެ.
