ރާއްޖޭގައި މިހާތަނަށް ހެދި ޑޮމެސްޓިކް އެންމެ ބޮޑު އެއާޕޯޓު ކަމަށްވާ ދ. ކުޑަހުވަދޫގައި އެޅި "ދާލު އެއާޕޯޓް" ރައީސުލްޖުމްހޫރިއްޔާ އަބްދުﷲ ޔާމީން މިއަދު ހުޅުވައި ދެއްވައިފިއެވެ.
ދ. ކުޑަހުވަދޫއަށް ކުރެއްވި ދަތުރުފުޅެއްގައި ރައީސް އެއާޕޯޓް ހުޅުވައި ދެއްވީ މިއަދު އެއާޕޯޓު ސަރަހައްދުގައި ބޭއްވި ކުލަގަދަ ރަސްމިއްޔާތެއްގައެވެ. ރައީސް މިއަދު ހުޅުވައި ދެއްވި ދާލު އެއާޕޯޓަކީ އަމިއްލަ މީހުންގެ ޖެޓް ފަދަ ތަކެތިވެސް ޖެއްސޭ ގޮތަށް ރާއްޖޭގައި ހެދި ޑޮމެސްޓިކް ފުރަތަމަ އެއާޕޯޓެވެ. އަދި އެއާޕޯޓުގެ ރަންވޭގައިވެސް އެއްފަހަރާ 42 ބޯޓަށް މަޑުކުރެވެއެވެ.
ދާލު އެއާޕޯޓްއަކީ 64.81 ހެކްޓަރުގެ ބިން ހިއްކައިގެން 1،800 ގެ ރަންވޭއެއް އޮތް އެއާޕޯޓެކެވެ. މި އެއާޕޯޓު ހިންގާނީ ދާލު އެއާޕޯޓް ހޯލްޑިން އިންނެވެ. އެއާޕޯޓް ހަދާފައި ވަނީ ރިއޯލޯ ކުންފުނިންނެވެ.
ދާލު އެއާޕޯޓުގެ ސަބަބުން އެ ސަރަޙައްދުގެ ފަތުރުވެރިކަމަށް ހެޔޮ ބަދަލު ތަކެއް އަންނާނެ ކަމަށް ބެލެވޭއިރު ދާލު އެއާޕޯޓުގެ ސަބަބުން އަތޮޅުގެ ގިނަބަޔަކަށްވެސް ފަސޭހަތަކެއް ލިބިގެންދާނެ ކަމަށް އަތޮޅުގެ މީހުން ބުނެއެވެ. ދާލު އެއާޕޯޓަށް ކުޑަހުވަދޫން މާލެއަށް ޓިކެޓެއްގެ އަގު އުޅެނީ 888 ރުފިޔާއަށެވެ.
