އިންޑިއާގެ މަޝްހޫރު އިސްލާމީ މުފައްކިރު މައުލާނާ ވަޙީދުއްދީން ޚާން އަވަހާރަ ވެއްޖެއެވެ. އޭނާ އަވަހާރަވީ ކޯވިޑް-19 ޖެހިވަޑައިގަތުމުގެ ސަބަބުން ނިވް ދިއްލީގެ އެޕޯލޯ ހޮސްޕިޓަލުގައި ފަރުވާ ދެމުން ދަނިކޮށް ރޭގެ ވަގުތެއްގައެވެ. ހަސްފަތާލަށް ގެންދެވުނީ 12 އޭޕްރީލް 2021 ގައެވެ. އަވަހާރަވީއިރު އުމުރުފުޅަކީ 96 އަހަރެވެ.
ވަޙީދުއްދީން ޚާން ވަނީ 200 އަށްވުރެ ގިނަ ފޮތް ލިޔުއްވައިފައެވެ. އޭނާގެ ފޮތްތައް ދުނިޔޭގެ އެކި ބަސްބަހަށް ތަރުޖަމާ ކުރެވިފައި ވެއެވެ. އޭނާ ލިޔުއްވި އެންމެ މަޝްހޫރު ފޮތަކީ "އިސްލާމް އައުރް ޖަދީދް ޗެލެންޖް" ނަމަކަށް ކިޔާ ފޮތެކެވެ. މި ފޮތް ވަނީ ޢަރަބި ބަހުގެ އިތުރަށް ދުނިޔޭގެ ވަރަށް ގިނަ ބަސްބަހަށް ތަރުޖަމާ ކުރެވިފައެވެ. ދުނިޔޭގެ ބައެއް ޔުނިވަރުސިޓީގައި ކިޔަވައިދޭންވެސް މި ފޮތް ބޭނުން ކުރެއެވެ. މީގެ އިތުރަށް "ތަޒްކީރުލްޤުރްއާން" ގެ ނަމުގައި ކީރިތި ޤުރްއާނުގެ ތަފްސީރެއްވެސް ވަނީ ލިޔުއްވައިފައެވެ. ވަޙީދުއްދީން ޚާންގެ ފޮތްތައް ދިވެހި ބަހަށްވެސް ތަރުޖަމާ ކުރެވިފައި އެބަހުއްޓެވެ. އޭނާގެ ފޮތްތައް ދިވެހި ބަހަށް ތަރުޖަމާ ކުރައްވާ ލިޔުންތެރިންގެ ތެރޭގައި ޢަބްދުﷲ ފާރޫޤް ޙަސަނާއި، ޢަބްދުﷲ ނަޢީމު އިބްރާހީމާއި، ޑޮކްޓަރ ޙަސަން ޙަމީދާއި، މުޙައްމަދު މުޞްޠަފާ ޙުސައިނާއި، ޖާދުﷲ ޖަމީލު ހިމެނިވަޑައިގަނެއެވެ.
ވަޙީދުއްދީން ޚާން އުފަންވެވަޑައިގަތީ 1925 ވަނަ އަހަރުގެ ޖަނަވަރީ މަހުގެ 1 ވަނަ ދުވަހު އިންޑިއާގެ އުއްތަރް ޕްރަދޭޝްގެ އަޢުޡަމްގަޅުގެ އަވަށެއް ކަމުގައިވާ ބަދަރިއާއަށެވެ. ކިޔަވައިވިދާޅުވީ އަޢުޡަމްގަޅްގެ މަދަރުސާއަކުންނެވެ. އޭގެ ފަހުން ދީނީ ތައުލީމުގައި މާހިރެއްގެ ދަރަޖައަކަށް ވަޑައިގަތީ އަމިއްލަފުޅު މުޠާލިޢާއިންނެވެ. އޭނާ "އައްރިސާލާ" ގެ ނަމުގައި 1976 ވަނަ އަހަރު ނެރުއްވާން ފެއްޓެވި އުރުދޫ މަޖައްލާ 2020 ވަނަ އަހަރުގެ މާޗް މަހާ ހަމައަށް މެދުނުކެނޑި ވަނީ ނެރުއްވައިފައެވެ. މަހަކު އެއްފަހަރު ނެރޭ މި މަޖައްލާގައި ހުންނަނީ މުޅީންވެސް އޭނާގެ ލިޔުއްވުމެވެ. އަދި އިސްލާމީ މަރުކަޒުގެ ނަމުގައި އިދާރާއެއް ހުޅުއްވައި އެތަނުން ފޮތް ޗާޕު ކުރުމާއި ދީނީ ދަޢުވަތުގެ މަސައްކަތް ވަރަށް ފުޅާ ދާއިރާއެއްގައި ކުރައްވައިފައި ވެއެވެ. މިހާރު އެ މަރުކަޒު ހިންގަވަނީ އޭނާގެ ދަރިކަލުން ސާނިއަސްނައިން ޚާނެވެ. މި މަރުކަޒުގެ އިތުރަށް ސާނިއަސްނައިން ޚާންގެ އިސްނެންގެވުމަށް "ގުޑްވަރޑް ބުކްސް" ގެ ނަމުގައި ވަކި މުއައްސަސާއެއް އުފައްދަވައި ޒަމާނީ ފެންވަރުގެ ދީނީ ފޮތްތައް ގެންދަވަނީ ޝާއިއު ކުރައްވަމުންނެވެ.
ވަޙީދުއްދީން ޚާނަށް ވަނީ ތިން ބޭފުޅުން ލިބިވަޑައިގެންފައެވެ. އެއީ ޑޮކްޓަރ ޒަފަރުލްއިސްލާމާއި، ޑޮކްޓަރ ފަރީދާ ޚާނަމާއި، ޑޮކްޓަރ ސާނިއަސްނައިން ޚާނެވެ. ތިން ބޭފުޅުންވެސް ދުނިޔޭގައި އެބަތިއްބެވިއެވެ.
