އައްޑޫ ސިޓީގެ ރައްޔިތުން ތިބީ ރައީސް އަބްދުﷲ ޔާމީންގެ ފަހަތްޕުޅުގައި ކަމަށް ރައްޔިތުންގެ މަޖިލީހުގެ ބިލެއްދޫ ދާއިރާގެ މެމްބަރު އަޙްމަދު މުބީން ވިދާޅުވެއްޖެއެވެ.
ފަސްޓްލޭޑީ ފާތިމަތު އިބްރާހިމްއާއެކު އައްޑޫ ސިޓީގައި ބޭއްވި ޖަލްސާއަށް އައްޑޫއަށް ވަޑައިގެން ހުންނަވައި މުބީން ވިދާޅުވީ އައްޑޫ ސިޓީގެ ގިނަ ރައްޔިތުންގެ ތާއީދު އޮތީ ރައީސް ޔާމީންއަށް ކަމަށެވެ. އައްޑޫ ސިޓީއަށް މެޑަމް ފާތުން ވަޑައިގެންނެވި ދަތުރުގައި މަޖިލީހުގެ އިތުރު މެމްބަރުންވެސް ބައިވެރިވެވަޑައިގެންނެވިއެވެ.
މުބީން މިހެން ވިދާޅުވިއިރު އިކޮނޮމިކް މިނިސްޓަރ މުޙަންމަދު ސައީދުވެސް ވަނީ އައްޑޫ ސިޓީގެ މީހުން 2018 ގައި ރައީސް ޔާމީން ނޫން އެހެން ބޭފުޅަކު އިޚްތިޔާރު ނުކުރާނެ ކަމަށް ވިދާޅުވެފައެވެ. ސައީދު ވިދާޅުވެފައި ވަނީ ރާއްޖޭގެ ތަރައްގީގެ އެންމެ ބޮޑު ޙިއްސާއެއް އޮތީވެސް އައްޑޫ ސިޓީގެ ރައްޔިތުންގެ ކިބައިގައި ކަމަށެވެ. އަދި އައްޑޫ ސިޓީގެ ރައްޔިތުން ޑިމާންޑް ކުރަނީވެސް ރައީސް ޔާމީން ކަހަލަ ވެރިޔަކަށް ކަމަށްވެސް ސައީދު ވިދާޅުވެފައި ވެއެވެ.
އައްޑޫ ސިޓީގައި މެޑަމްއާއެކު ބޮޑު ޖަލްސާއެއް ބޭއްވިއިރު ބަޔެއް ވަޒީރުންނާއި މަޖިލީހުގެ ބަޔެއް މެމްބަރުންނާއެކު މެޑަމް ފާތުން ވަނީ އެ ސިޓީގެ ހުރިހާ ރަށަކަށް ވަޑައިގެންފައެވެ.
