ކަޝްމީރުގެ އިންޑިޔާ ފަޅީގައި އިންޑިޔާގެ މިހާރުގެ ސަރުކާރުން ގެންގުޅޭ ސިޔާސަތުތަކާ ދެކޮޅު އިއްތިހާދުން އެސަރަހައްދުގެ ލޯކަލް އިންތިޚާބު ކާމިޔާބުކޮށްފިއެވެ. މިއީ ކަޝްމީރަށް އިންޑިޔާގެ ގާނޫނު އަސާސީން ދީފައި އޮތް އިމްތިޔާޒުތައް އިންޑިޔާގައި ވެރިކަންކުރާ ހިންދޫ ވަޠަނީ ޕާޓީ، ބީޖޭޕީން ފާއިތުވި އަހަރުގެ އޮގަސްޓު މަހު ނިގުޅައިގަތް ފަހުން އެސަރަހައްދުގައި ބޭއްވި ފުރަތަމަ އިންތިޚާބެވެ.
އިންޑިޔާގެ ބައެއްގެ ގޮތުގައި ކަޝްމީރު އޮތުމަށް ތާއީދުކުރާ، އެހެންނަމަވެސް ކަޝްމީރަށް ދާޚިލީ މިނިވަންކަން ދިނުމަށް ގޮވާލާ ޕީޕަލްސް އެލާޔަންސް ފޯ ގުޕްކާރ ޑިކްލަރޭޝަން (ޕީއޭޖީޑީ) އިން ވަނީ ކަޝްމީރުގައި ޑިސްޓްރިކްޓް ޑިވެލޮޕްމަންޓް ކައުންސިލްގެ 280 ގޮނޑިއަށް މެންބަރު ހޮވުމަށް ނޮވެންބަރު 28 އިން ޑިސެންބަރު 19 އަށް 8 ފިޔަވައްސަކަށް ބަހާލައިގެން ބޭއްވި އިންތިޚާބުގައި އިދިކޮޅު އިއްތިހާދުން ވަނީ 112 ގޮނޑި ކާމިޔާބުކޮށްފައެވެ. ވެރިންކުރާ ބާރަތިޔާ ޖަނަތާ ޕާޓީ (ބީޖޭޕީ) އަށް ކާމިޔާބުކުރެވުނީ 74 ގޮނޑިއެވެ. އަދި މިނިވަން 49 ކެންޑިޑޭޓަކު ވަނީ ގޮނޑި ކާމިޔާބުކޮށްފައެވެ. އިންޑިޔާގެ އިދިކޮޅު މައި ޕާޓީ ކޮންގްރެސް ޕާޓީން ވަނީ 26 ގޮނޑި ކާމިޔާބުކޮށްފައެވެ،
އިންޑިޔާ ސަރުކާރާ ދެކޮޅު ހަރަކާތްތައް އެންމެ ގަދަ ކަޝްމީރު ވާދީން ބީޖޭޕީއަށް ކާމިޔާބުކުރެވުނީ އެންމެ 3 ގޮނޑިއެވެ.
އިންޑިޔާގެ އިލެކްޝަން ކޮމިޝަނުން ބުނި ގޮތުގައި 20 ޑިސްޓްރިކްޓެއްގައި ވޯޓުލީ މި އިންތިޚާބުގައި ވޯޓުލުމުގެ ހައްގު ލިބިފައިވާ ހަ މިލިއަން މީހުންގެ %51 މީހުން ވަނީ ވޯޓުލާފައެވެ.
މިއީ އަވަށްތަކުގެ ކައުންސިލް މެންބަރު ހޮވުމަށް ބޭއްވި އިންތިޚާބެކެވެ. މި ކައުންސިލްތަކަށް ގާނޫނު ހެދުމާއި ގާނޫނަށް ބަދަލު ގެނައުމުގެ ބާރެއް ނޯވެއެވެ. އޮންނަނީ އިގްތިސާދީ ތަރައްގީއާއި އާއްމުންނަށް ދެވޭ ޚިދުމަތްތަކުގެ ކަންކަން ނިންމުމުގެ ބާރެވެ.
ފާއިތުވި އަހަރުގެ އޮގަސްޓް މަހުގެ ތެރޭގައި ގެނައި ބޮޑު ގާނޫނީ ބަދަލުގައި ބޮޑުވަޒީރު ނަރެންދްރަ މޯދީގެ ސަރުކާރުން ވަނީ އިންޑިޔާގެ ގާނޫނު އަސާސީން ކަޝްމީރަށް ދީފައި އޮތް އިމްތިޔާޒުތައް އުވާލުމުގެ އިތުރަށް 'ކަޝްމީރުގެ ގާނުނު އަސާސީ' ގެ ނަމުގައި ކަޝްމީރުގައި އަމަލުކުރަމުން އައި ގާނޫނު އުވާލައި، ސްޓޭޓްކަމުގެ ދަރަޖަ އުވާލައި، ދެ ޔުނިއަން ޓެރިޓަރީއަކަށް (ލަދާޚް އަދި ޖައްމޫ-ކަޝްމީރު) އެ ސަރަހައްދު ބައިކޮށްލާފައެވެ.
ކަޝްމީރުގެ ވާދަވެރި ދެ ސިޔާސީ ޕާޓީ، ކުރީގެ ޗީފް މިނިސްޓަރު ފާރޫޤް ޢަބްދުﷲ ގެ ނޭޝަނަލް ކޮންގްރެސް އަދި ކުރީގެ ޗީފް މިނިސްޓަރު މެހެބޫބާ މުފްތީގެ ޕީޕަލްސް ޑިމޮކްރެޓިކް ޕާޓީ (ޕީޑީޕީ) ވަނީ މިއިންތިޚާބުގައި އެއްގަލަކަށް އަރައި، ޕީއޭޖީޑީ އިއްތިހާދާއި ގުޅިގެން އިންތިޚާބުގައި ވާދަކޮށްފައެވެ.
