ރާއްޖެ އަންނަ ފަތުރުވެރިންގެ ސަލާމަތާއި ރައްކާތެރިކަމަށާއި ފަތުރުވެރިންގެ ޝަކުވާތަކާއި މައްސަލަ ހުށަހެޅުމަށް ހިލޭ ގުޅޭ ނަމްބަރެއް ފުލުހުންގެ އިދާރާގައި ގާއިމް ކޮށްފިއެވެ.
އިއްޔެއިން ފެށިގެން ބޭނުން ކުރަން ފެށި ހިލޭ ގުޅޭނެ ނަންބަރަކީ 1478 އެވެ. ހޯމް މިނިސްޓަރ އަޒްލީން އަޙްމަދު އިފްތިތާޙު ކޮށްދެއްވި މި ނަންބަރަކީ ރާއްޖޭން ބޭރުން އަންނަ ފަތުރުވެރިންގެ ޝަކުވާތަކާއި މައްސަލަތައް ހުށަހެޅުމަށް ޤާއިމްކުރެވިގެންދިޔަ ރަނގަޅު ޚިދުމަތެއްކަމަށާއި މި ޚިދުމަތުގެ ސަބަބުން ބައިނަލް އަޤްވާމީ ކޮންމެ ނެޓްވޯކަކުން އިތުރު ޗާރޖަކާ ނުލާ ގުލާލެވިގެން ދާނެކަމަށް މިނިސްޓަރު ވަނީ ވިދާޅުވެފައެވެ.
ފުލުހުން ބުނީ ރާއްޖެއިން ބޭރުގައި ތިބެގެންވެސް ޓްއަރިސްޓް ޕޮލިސް އަށް ގުޅައިގެން ޝަކުވާއާއި މައްސަލަ ހުށަހެޅުމުގެ ފުރުޞަތު މި ނަންބަރުން ލިބިގެންދާނެ ކަމަށެވެ. އަދި މި ނަމްބަރުގެ ސަބަބުން ރާއްޖޭގެ ކޮންމެ ހިސާބެއްގައި ހުރެގެންވެސް ފަސޭހަ ކަމާއެކު ޓްއަރިސްޓް ޕޮލިހަށް ގުޅާލެވޭނެ ކަމަށްވެސް ފުލުހުން ވަނީ ބުނެފައެވެ.
މި ޓޯލް ފްރީ ނަމްބަރ 1478 އަކީ ދިރާގު ނަންބަރުތަކާއި އުރީދޫ ނަމްބަރުތަކުގެ އިތުރުން ރާއްޖެއިން ބޭރުގެ ކޮންމެ ނެޓްވޯކަކުން ހިލޭ ގުޅޭނެ ނަމްބަރެކެވެ. އަދި ރާއްޖެއަށް އަންނަ ފަތުރުވެރިންގެ ފޯނުތަކަށް މިނަމްބަރު އެސް.އެމް.އެސް އަކުން ދާގޮތަށް ހަމަޖެހިފައިވާއިރު ނަންބަރު ފެންނާނޭހެން އެއަރޕޯޓްގެ އެކި ސަރަޙައްދުގައި ބެހެއްޓުމަށްވަނީ ހަމަޖެހިފައެވެ.
