މިއަހަރު ރެހެންދި އެވޯޑް ހާސިލުކުރެއްވި ބޭފުޅުންގެ ނަން ޖެންޑަރ މިނިސްޓްރީން އިއުލާނުކޮށްފިއެވެ.
ރެހެންދި އެވޯޑަކީ ގައުމީ ޚިދުމަތުގައި އެކިއެކި ދާއިރާއިން އަންހެނުން ކުރާ މަސައްކަތްތަކާއި، މުޖުތަމައު ބިނާ ކުރުމަށް އަންހެނުން އަދާކުރާ ދައުރުގެ އަގު، ގައުމީ ފެންވަރެއްގައި ވަޒަންކުރުމުގެ ގޮތުން ފެމިލީ އެންޑް ސޯޝަލް ސަރވިސަސް އިން ކޮންމެ އަހަރަކު ދެމުން ގެންދާ ޚާއްޞަ އެވޯޑެކެވެ.
މި އެވޯޑް ދިނުމުގެ މަގުސަދުތަކުގެ ތެރޭގައި މުޖުތަމައުގައި އަންހެނުންގެ ހައްގުތައް ރައްކާތެރިކުރުމަށާއި ކުރިއެރުވުމަށް ވަކި ފަރުދުންނާއި ޖަމުއްޔާތަކާއި ޖަމާއަތްތަކުން ކުރަމުންދާ މަސައްކަތްތަކުގެ އަގުވަޒަން ކުރުން ހިމެނެއެވެ. އަދިރާއްޖޭގެ ގައުމީ ތަރައްގީއަށާއި އަންހެނުންގެ ކުރިއެރުމަށް އަގުހުރި ޚިދުމަތްތައް ކޮށްދީފައިވާ ފަރާތްތަކުގެ އަގު ވަޒަންކުރުންވެސް މި އެވޯޑް ދިނުމުގެ މަގުސަދުތަކުގެ ތެރޭގައި ހިމެނެއެވެ. ރާއްޖޭގެ ތަރައްގީއާއި، ކުރިއެރުމަށް ކުރާ މަސައްކަތްތަކުގައި އަންހެނުންގެ ބައިވެރިވުމާއި، އެ ކަނބަލުން ކުރާ އަގުހުރި މަސައްކަތްތަކާއި، އަންހެނުން ހާސިލުކޮށްފައިވާ ކާމިޔާބީތައް ފާހަގަކޮށް އަގުވަޒަންކުރުން ވެސް އެވޯޑް ދިނުމުގެ މަގުސަދުތަކުގެ ތެރޭގައި ހިމެނެއެވެ. ގައުމީ ޚިދުމަތުގައި އަދި އަންހެނުންގެ ބައިވެރިވުން މަދު ދާއިރާތަކުގައި އަންހެނުންގެ ހިއްސާ އިތުރުކުރުމާއި، އާ ދާއިރާތަކަށް އަންހެނުން ނެރުމަށް ބާރުއެޅުމާއި، މިންތީގެ ހަމަހަމަކަން ގާއިމުކުރުމަށް މަސައްކަތްކުރާ ވަކި ފަރުދުންނާއި އަދި މުއައްސަސާތަކުގެ މަސައްކަތްތައް ބަލައިގަނެ އަގުވަޒަންކުރުންވެސް މި އެވޯޑު ދިނުމުގެ މަގުސަދުތަކުގެ ތެރޭގައި ހިމެނެއެވެ.
ކޮންމެ އަހަރަކު މި އެވޯޑު ހަވާލުކުރަނީ ބައިނަލްއަގުވާމީ އަންހެނުންގެ ދުވަސް ފާހަގަކުރުމުގެ ގޮތުން ބޭއްވޭ ރަސްމީ ޖަލްސާގައެވެ. ނަމަވެސް، ކޯވިޑް–19އާ ގުޅިގެން ދިމާވެފައިވާ ހާލަތުގެ ސަބަބުން މި އަހަރުގެ އެވޯޑް ދިނުމުގެ ހަފުލާ ވަނީ ފަސްކޮށްފައެވެ.
ރެހެންދި އެވޯޑަށް ބޭފުޅުން ހޮއްވަވަނީ، އެކަމަށްޓަކައި ޖެންޑަރ މިނިސްޓްރީން އެކުލަވާލާފައިވާ ރެހެންދި އެވޯޑު ކޮމިޓީންނެވެ. މިއަހަރު ރެހެންދި އެވޯޑަށް ހޮވިފައިވަނީ ޖުމްލަ 2 ދާއިރާއަކުން 7 ބޭފުޅުންނެވެ. އެބޭފުޅުންނަކީ އިޖުތިމާއީ ދާއިރާއިން ދެ ބޭފުޅަކާއި އަދާކުރާ ވަޒީފާގެ ގޮތުން އޮފީހަށް ނުވަތަ ދާއިރާއަށް ކޮށްދީފައިވާ ޚިދުމަތުގެ ދާއިރާ އިން ފަސް ބޭފުޅެކެވެ.
އިޖްތުމާޢީ ދާއިރާ:
(1) ފާތިމަތު އިބްރާހިމް ކާނިމާގެ، ޅ.ހިންނަވަރު
(2) އަލްއުސްތާޛާ މަރްޔަމް ޝުނާނާ ހ.ވެލަސްފަރުގެ
އަދާކުރާ ވަޒީފާގެ ގޮތުން އޮފީހަށް ނުވަތަ ދާއިރާއަށް ކޮށްދީފައިވާ ޚިދުމަތުގެ ދާއިރާ:
(1) ޙައްވާ ލަތީފް ހުޅުމާލެ ފްލެޓް 10-3-01
(2) އާމިނަތު އަމީނާ ހަނދުވަރީގެ، ލ.ކުނަހަންދޫ
(3) ޝިފްޒާ މުޞްޠަފާ އާސާނު، ޏ.ފުވައްމުލައް
(4) ޢާއިޝަތު ޙުސައިން މަނިކު ހ.ރީނދޫކޮކާގެ
(5) މިންހާ ފާއިޒު ރަޝާދު ހުޅުމާލެ ފްލެޓް 99-1-02
