ހުޅުމާލޭގައި ރޭ ހިނގައިދިޔަ މާރާމާރީއެއްގައި 25 އަހަރުގެ ޒުވާނެއްގެ ގަޔަށް ވަޅި ޖަހައި މަރާލައިފިއެވެ.
މައުލޫމާތު ލިބިފައިވާ ގޮތުގައި މަރުވީ ގއ. ދާންދޫ، ހާރިސް އަބްދުލް ޣަފޫރު އެވެ. އޭނާގެ ގައިގެ ހަތަރު ތަނަކަށް ވަނީ ވަޅި ޖަހާފައެވެ. ހާރިސް ހުޅުމާލޭގައި ހުންނަ ހޮސްޕިޓަލަށް ގެންދިޔައިރުވެސް ފުރާނަ ނެތް ކަމަށް ވެއެވެ. މާރާމާރީ ހިންގާފައި ވަނީ ހުޅުމާލޭގައި ޑްރަގް ރިހިބިލިޓޭޝަން ސެންޓަރެއްގެ ގޮތުގައި ބޭނުން ކުރާ، ހުޅުމާލެ ހާފުވޭ ހައުސްގެ ކައިރީގައި ކަމަށެވެ. އެ ޒުވާނާއަށް ހަމަލާދިން ކަމަށް ވަނީ އެ ސެންޓަރުގައި ހުރެފައި ބޭރަށް ނުކުތް ވަގުތުއެވެ.
ހުޅުމާލޭގައި ރޭ ވަޅިން ހަމަލާދީ ހާރިސް މަރާލިއިރު މާލޭގައިވެސް ރޭ ވަނީ ކެފޭއެއްގެ ތެރޭގައި ޒުވާނެއްގެ ގަޔަށް ވަޅި ހަރާފައެވެ. މައުލޫމާތު ލިބިފައިވާ ގޮތުގައި މާލޭގެ ކެފޭއަކު އިން ޒުވާނާގެ ގަޔަށް ވަޅި ޖެހީ ހަތަރު މީހުންގެ ގްރޫޕަކުންނެވެ. މި މާރާމާރީއާ ގުޅިގެން ފުލުހުން މިހާތަނަށް ވަނީ ބާރަ މީހަކު ހައްޔަރު ކޮށްފައެވެ.
އެ މީހުން ފުލުހުންގެ ބެލުމުގެ ދަށަށް ގެންދިޔައީ މ. އެތުމާގެއިންނެވެ. އެގޭގެ ދޮރުވެސް ވައްޓާލުމަށް ފަހު ފުލުހުން އެތަނަށް ވަތްއިރު ހައްޔަރުކުރި މީހުން މަސައްކަތް ކުރަމުން ދިޔައީ ޒުވާނާއަށް ހަމަލާ ދިނުމަށް ބޭނުންކުރި ސާމާނު ނައްތާލާށެވެ.
މާލޭގައި ވަޅިން ހަމަލާދިން ޒުވާނާގެ ބުރަކަށީގެ ތިން ތަނަކަށް ވަޅި ޖަހާފައި ހުރިނަމަވެސް އޭޑީކޭގައި ފަރުވާ ދެމުން އަންނަ ޒުވާނާގެ ޙާލު މިހާރު ރަނގަޅު ކަމަށް ވެއެވެ.
