ރައްޔިތުންގެ މަޖިލީހުގެ މެމްބަރުން ޖަލަށް ލުން ސަރުކާރުން ހުއްޓާލާނީ މަޖިލީހުގެ މެޖޯރިޓީ ސަރުކާރަށް ލިބުމުން ކަމަށާއި އޭގެކުރިން އިދިކޮޅު މެމްބަރުން ޖަލަށް ލުން ހުއްޓާނުލާނެ ކަމަށް ކުރީގެ ރައީސް މުޙަންމަދު ނަޝީދު ވިދާޅުވެއްޖެއެވެ.
އިދިކޮޅު ބާރަ މެމްބަރެއްގެ މައްޗަށް ދައުލަތުން އުފުލާފައިވާ ދައުވާ ކްރިމިނަލް ކޯޓުން ތާވަލްކޮށް ކުރިޔަށް ގެންދަން ނިންމުމާއެކު ނަޝީދު ކުރެއްވި ޓްވީޓެއްގައި ވިދާޅުވީ އިދިކޮޅު މެމްބަރުންގެ މައްސަލަތައް އެކިއެކި މަރުޙަލާ ތަކުގައި ބަލަމުން އަންނަ އިރު ސަރުކާރުން ކުރަމުން އަންނަ ޣައިރުޤާނޫނީ އަމުރުތަކަށް އަމަލު ކުރުން ސަލާމަތީ ބާރުތަކުންވެސް ހުއްޓާލުން އެދިވަޑައިގަންނަވާ ކަމަށެވެ.
ރައްޔިތުންގެ މަޖިލީހުގެ ބަޔެއް މެމްބަރުންގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ނިންމާފައިވާއިރު ބަޔެއް މެމްބަރުން ދަނީ ތަހްގީގީ މަރުޙަލާގައި ޖަލުގައި ހައްޔަރު ކޮށްފައެވެ. އަދި އިދިކޮޅު ބާރަ މެމްބަރެއްގެ މައްޗަށް މިހާރު ވަނީ ދައުވާ ފަށާފައެވެ. އެއީ މަޖިލީހުގެ އިދާރާއަށް ގަދަކަމުން ވަދެވަޑައިގެންނެވި ކަމުގެ ދައުވާއެވެ. އެ ދައުވާގައި ބުނެފައި ވަނީ އެ މެމްބަރުން ވަނީ ޤާނޫނު ތަންފީޒު ކުރަން ހުރި މުއައްޒަފަކަށް ހުރަސް އަޅުއްވާފައި ކަމަށެވެ.
މިހާރު ދައުވާ ކުރަން ފޮނުވާފައިވާ ބާރަ މެމްބަރުންނަކީ ހިންނަވަރު ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގުރޫޕުގެ ލީޑަރު އިބްރާހިމް މުހައްމަދު ސޯލިހް (އިބޫ) އާއި ކިނބިދޫ ދާއިރާގެ މެމްބަރު އަބްދުﷲ ރިޔާޒާއި ނޮޅިވަރަމް ދާއިރާގެ މެމްބަރު ހުސެއިން އަރީފާއި ހިތަދޫ އުތުރު ދާއިރާގެ މުހައްމަދު އަސްލަމާއި ހެންވޭރު ދެކުނު ދާއިރާގެ މުހައްމަދު އަބްދުލް ކަރީމް (ރުކުމާ) އާއި ހެންވޭރު އުތުރު ދާއިރާގެ މެމްބަރު އަދި މަޖިލިހުގެ ކުރީގެ ރައީސް އަބްދުﷲ ޝާހިދާއި ހިތަދޫ މެދު ދާއިރާގެ އިބްރާހިމް މުހައްމަދު ދީދީ އާއި މާފަންނު ހުޅަނގު ދާއިރާގެ މުހައްމަދު ފަލާހް އާއި ކެންދޫ ދާއިރާގެ މެމްބަރު އަލީ ހުސެއިން އާއި މަޖިލީހުގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ނިންމާފައިވާ މަޑުއްވަރީ ދާއިރާގެ މެމްބަރު މުހައްމަދު އަމީތާއި ވިލިނިގިލީ ދާއިރާގެ މެމްބަރު ސައުދު ހުސެއިނާއި ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) އެވެ.
