ކޫއްޑޫ އެއާޕޯޓް ބޮޑުކޮށް ތަރައްޤީކުރުމަށްފަހު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، އަލުން އެއާޕޯޓް ރަސްމީކޮށް އިފްތިތާޙްކޮށްދެއްވައިފިއެވެ.
ކޫއްޑޫ އެއާޕޯޓް ތަރައްޤީ ކުރުމުގެ މަޝްރޫޢުގެ ދަށުން، މި އެއާޕޯޓުގައި ކުރިން އޮތް 1200 މީޓަރު ދިގު ރަންވޭ 1800 މީޓަރަށް ވަނީ ދިގު ކޮށްފައެވެ. އަދި އާ ވީ.އަ.ޕީ ލައުންޖަކާއި، މުވައްޒަފުންގެ 2 އެކޮމޮޑޭޝަން ބްލޮކް ވެސް އެއާޕޯޓުގައި އިތުރަށް ތަރައްޤީކޮށްފައިވެއެވެ. މި ބަދަލުތަކާއެކު ކޫއްޑޫ އެއާޕޯޓް ވަނީ ކެޓަގަރީ 2 ސީ ގެ އެއާޕޯޓަކުން ކެޓަގަރީ 3 ސީ ގެ އެއާޕޯޓަކަށް ބަދަލުވެފައެވެ.
ކޫއްޑޫ އެއާޕޯޓް ތަރައްގީކޮށް އަލުން ހުޅުއްވައިދެއްވުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި، މިނިސްޓަރ އޮފް ޓޫރިޒަމް މޫސާ ޒަމީރާއި، މިނިސްޓަރ އޮފް އިކޮނޮމިކް ޑިވެލޮޕްމަންޓް މުޙައްމަދު ސަޢީދާއި، ކޫއްޑޫ އެއާޕޯޓުގެ ސީ.އީ.އޯ މުޙައްމަދު ޢަލީ ޖަނާޙާއި، ޕްރިސްޓިން އައިލެންޑް އިންވެސްޓްމަންޓް ޕްރައިވެޓް ލިމިޓެޑްގެ ޗެއާމަން މިސްޓަރ ރޮނަލްޑް ލިއޯ ބައިވެރިވެވަޑައިގެންނެވިއެވެ.
ކޫއްޑޫއަށް ރައީސް ވަޑައިގެން އެއާރޕޯޓް ހުޅުވައި ދެއްވުމުގެ އިތުރުން އެރަށުގައި ވަނީ 'މަރކިއޯ ހޮޓެލްސް މޯލްޑިވްސް' ކޫއްޑޫ ވެސް އިފްތިތާޙު ކޮށްދެއްވާފައެވެ.
މަރކިއޯ ކޫއްޑޫ ހޮޓެލަކީ ޕްރިސްޓިން އައިލެންޑް އިންވެސްޓްމަންޓް ޕްރައިވެޓް ލިމިޓެޑުން ތަރައްޤީކޮށްފައިވާ ރިޒޯޓް ހޮޓެލެކެވެ. މިތަނަކީ މެދުފަންތީގެ 68 ވިލާ ހިމެނޭގޮތަށް ފަރުމާކުރެވިފައިވާ، 24 ގަޑިއިރު ޚިދުމަތްދޭގޮތަށް ތައްޔާރުކުރެވިފައިވާ ތަނެކެވެ. މަރކިއޯ ކޫއްޑޫ ހޮޓެލަކީ ރާއްޖޭގެ ރަހަތަކާއި ބޭރުގެ ރަހަތައް އެކުލެވޭގޮތަށް ފަރުމާކުރެވިފައިވާ ތަނެކެވެ.
މަރކިއޯ ކޫއްޑޫ ހޮޓެލް ހުޅުވުމަށް މިރޭ ބޭއްވި ރަސްމިއްޔާތުގައި ޕްރިސްޓިން އައިލެންޑް އިންވެސްޓްމަންޓް ޕްރައިވެޓް ލިމިޓެޑުގެ ފަރާތުން އެކުންފުނީގެ ޗެއާމަން މިސްޓަރ ރޮނާލްޑް ލިއޯއާއި، ހޮޓެލްސް އެންޑް ރިޒޯޓްސް ކޮންސްޓްރަކްޝަން ޕްރައިވެޓް ލިމިޓެޑުގެ ފަރާތުން ޗެއާމަން މުޙައްމަދު ޢަލީ ޖަނާޙު ވަނީ ރައީސުލްޖުމްހޫރިއްޔާއަށް ހަނދާނީ ފިލައެއް ވެދުމަށް އަރުވާފައެވެ.
ރޭގެ ރަސްމިއްޔާތުގައި މިނިސްޓްރީ އޮފް ޓޫރިޒަމާއި، ޕްރިސްޓިން އައިލެންޑް އިންވެސްޓްމަންޓް ޕްރައިވެޓް ލިމިޓެޑާއި، ހޮޓެލްސް އެންޑް ރިޒޯޓް ކޮންސްޓްރަކްޝަން ޕްރައިވެޓް ލިމިޓެޑާއި ދެމެދުގައި ވަނީ ގއ. އަތޮޅުގެ 1000 ޒުވާނުންނަށް ތަމްރީނާއި ވަޒީފާގެ ފުރުޞަތު އުފެއްދުމުގެ އެއްބަސްވުމެއްގައި ސޮއިކުރައްވާފައެވެ.
