ޓެރަރިޒަމްގެ ކުށުގައި ބާރަ އަހަރުގެ ޖަލު ޙުކުމެއް ތަންފީޒު ކުރައްވަމުން ގެންދަވާ އަދާލަތު ޕާޓީގެ ރައީސް ޝައިޚް އިމްރާން އަބްދުﷲ އަނެއްކާވެސް ގޭބަންދަށް ބަދަލު ކޮށްފިއެވެ.
ޝައިޚް އިމްރާން އެންމެ ފަހުން ގޭބަންދުން ޖަލަށް ގެންދެވީ ރޯދަ މަސް ނިމުމުންނެވެ. މިފަހަރުވެސް ޝައިޚް އިމްރާން ގޭބަންދަށް ބަދަލު ކުރެއްވީ ވަގުތީ ގޮތުންނެވެ. ޝައިޚް އިމްރާން ވަގުތީ ގޮތުން އަނެއްކާވެސް ގޭބަންދަށް މި ބަދަލު ކުރެއްވީ އިމްރާންގެ އަންހެނުން ބަލިވެ އިނދެ ފިރިހެން ކުއްޖަކު ވިހެއި ތަނާއެވެ.
ރޯދައިގެ ފަހުން އިމްރާން ފުރަތަމަ ހުންނެވީ މާފުށީ ޖަލުގެ ސްޕެޝަލް ޕްރޮޓެކްޝަން ޔުނިޓުގައެވެ. ނަމަވެސް ފަހުން އިމްރާން ބަހައްޓާފައި ހުރީ މީހުން މެރުންފަދަ ބޮޑެތި ކުށްވެރިން ތިބޭ ގޮޅި ތަކުގައި ކަމަށް އަދާލަތު ޕާޓީން ވަނީ ބުނެފައެވެ. ސަރުކާރުން ބުނެފައި ވަނީ ސިޔާސީ ކުށްވެރިންނަށް ދެމުން އައި އިނާޔަތްތައް އިމްރާނަށް ކަނޑާލަން ޖެހުނީ ހުކުމުގައި ހުންނަވައިގެން މީޑިޔާއަށް އިންޓަވިއު ދެއްވުމުން ކަމަށެވެ.
