ރާއްޖޭގައި އޮތް އަނިޔާވެރިކަމާ ދެކޮޅަށް އިދިކޮޅު އެމްޑީޕީން ފެށި މަސައްކަތް ޖައްވަށް، ހަވަޔަށް، ފަޒާއަށް ގޮސް ނިމިފައިވާ ކަމަށް އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ނައިބް ރައީސް ރީކޯ މޫސާ މަނިކު ވިދާޅުވެއްޖެއެވެ.
ރައީސް ޔާމީންގެ އަނބިކަނބަލުން ފާތިމަތު އިބްރާހިމް އަރިހުގައި ރ. އަތޮޅަށް މިހާރު ކުރައްވާ ކެމްޕޭން ދަތުރުފުޅެއްގައި ރ އަތޮޅު ރޭ އޮތް ޖަލްސާގައި ވާހަކަ ދައްކަވަމުން މޫސަ ވިދާޅުވީ އިދިކޮޅު ހަތަރު ލީޑަރުންވެސް އުޅުއްވަނީ ވެރިކަމާހެދި ކަމަށާއި ވެރިކަމާހެދި "އެހާވަރަށް އުޅޭކަށް ނުވާނެ" ކަމަށެވެ.
މޫސަ ވިދާޅުވީ ރައްޔިތުންގެ ކުރިމައްޗަށް ވަޑައިގަތުމުން ރައްޔިތުން ބަލައިނުގަތުމުން ދެން އެވީ އެކަން ދޫކޮށްލަން ކަމަށާއި ނަމަވެސް ތިރީސް އަހަރަށް ފަހު ރައީސް މައުމޫންވެސް ނުކުމެވަޑައިގެން އުޅުއްވަނީ މީހުން ކުރާ މަސައްކަތް ހުއްޓުމަށް ކަމަށެވެ. މޫސަ ވަނީ ކުރީގެ ދެ ރައީސުން ކަމަށްވާ ރައީސް ނަޝީދު އާއި ރައީސް މައުމޫނުގެ އިތުރުން ޖޭޕީގެ ލީޑަރ ގާސިމް އިބްރާހިމް އާއި އަދާލަތު ޕާޓީގެ ރައީސް ޝައިޚް އިމްރާން އަބްދުﷲއަށްވެސް ވަރަށް ބޮޑަށް ފާޑު ވިދާޅުވެފައެވެ.
އެގޮތުން އެ ހަތަރު ބޭފުޅުން ސިޔާސީ ގޮތުން އެއްގަލަށް ނާރުއްވާނެ ކަމަށް ވިދާޅުވެ މޫސަ ވިދާޅުވީ އެ ހަތަރު ލީޑަރުން މިމަހުގެ 20، 21 22 މި ދުވަސްތަކުގައި އެއްކޮޓަރިއަށް ލައިފިނަމަ ބޭރުގައި ހަތަރު ސަންދޯއްވެސް ބަހައްޓަން ޖެހޭނެ ކަމަށެވެ.
"އޭރުގަ ރައީސް ޔާމީން ވާނެ އެންމެ މެސެޖެއް ދެއްވަން. ތީގެތެރެއިން ގަދަވެވަޑައިގެން ނުކުންނަވާ ބޭފުޅަކަށް 2018 ގައި ރިޔާސީ އިންތިހާބުގެ ވާދަ ކުރުމުގެ ހުއްދަ ދޭނަމޭ، ބުނެފިއްޔާ ޔަގީން ދޮރު ވައްޓާލާނެ،" މޫސަ ވިދާޅުވިއެވެ.
