ދިވެހިރާއްޖޭގެ ޤައުމީ ޔުނިވަރސިޓީގައި ބެޗްލަރ އޮފް ސައިކޮލޮޖީ ކިޔަމުންދާ ދަރިވަރުން ފުލުހުންގެ ފޮރެންސިކް ސާރވިސަސް ޑައިރެކްޓަރޭޓަށް ޒިޔާރަތްކޮށް އެޑައިރެކްޓަރޭޓްގައި ކުރަމުންދާ މަސައްކަތްތަކާބެހޭ ގޮތުން މައުލޫމާތު ހޯދައިފިއެވެ.
ސެޕްޓެމްބަރު މަހުގެ 13 ވަނަ ދުވަހު ކުރި މިޒިޔާރަތަކީ ބެޗްލަރ އޮފް ސައިކޮލޮޖީ ގެ ފޮރެންސިކް މޮޑިއުލްގެ ދަށުން ފޮރެންސިކް ދާއިރާގައި މައްސަލަތައް ތަޙުޤީޤު ކުރުމަށް ބޭނުންކުރާ ގޮތް ދެނެގަތުމަށާއި މަޢުލޫމާތު ހޯދުމުގެ ގޮތުން ކުރި ޒިޔާރަތެކެެވެ.
މިޒިޔާރަތުގައި ޔުނިވަރސިޓީގެ 18 ދަރިވަރުންނާއި ލެކްޗަރާއެއް ބައިވެރިވެފައިވެއެވެ. މިޒިޔާރަތުގައި ފޮރެންސިކް އެކި ލެބޯރޓްރީތަކުގެ މަސައްްކަތްތައް ހިންގާގޮތާއި ލެބްތަކުގައި ގެންގުޅޭ ތަކެއްޗާބެހޭ ގޮތުން މައުލޫމާތު ހޯދާފައިވެއެވެ. އަދި ދަރިވަރުންނަށް އޮޅުންއަރާ ކަންތައްތަކާ ބެހޭގޮތުން ލެބްތަކުގެ ވެރިންނާ ސުވާލުކޮަށް ކަންކަން އޮޅުންފިލުވާފައި ވެއެވެ.
މީގެ އިތުރުން ފޮރެންސިކް ސަރވިސަސް ޑައިރެކްޓްރޭޓްގެ ކްރައިމް ސީން އިންވެސްޓިގޭޝަން ޑިޕާޓްމަންޓްގެ ފަރާތުން ކްރައިމް ސީންއެއް ތައްޔާރުކޮށް، ކްރައިމް ސީން އެއްގައި ޢަމަލު ކުރާނެ ގޮތުގެ ޑެމޯއެއް ދަރިވަރުންނަށް ވަނީ ދައްކާލާފައެވެ.
ދިވެހިރާއްޖޭގެ ޤައުމީ ޔުނިވަރސިޓީގައި ބެޗްލަރ އޮފް ސައިކޮލޮޖީ ކިޔަމުންދާ ދަރިވަރުން ފުލުހުންގެ ފޮރެންސިކް ސާރވިސަސް ޑައިރެކްޓަރޭޓަށް ކުރި މިޒިޔާރަތުގައި އެ ދަރިވަރުންނަށް މަޢުލޫމާތު ދެއްވީ އެ ޑައިރެކްޓަރޭޓްގެ ކޮލިޓީ މެނޭޖަރ ޗީފް އިންސްޕެކްޓަރ އޮފް ޕޮލިސް އަހްމަދު ރަޝްވާންއެވެ.
