ދުނިޔޭގެ އެކިކަންކޮޅު ތަކުގައި ހިންގަމުން އަންނަ ގަތުލްއާންމު ތަކާއި އިންސާނިއްޔަތާއި ޚިލާފު އަމަލުތައް ހުއްޓުވުމަށް އދ. ގެ 72 ވަނަ ޖެނެރަލް އެސެމްބްލީގައި ހިމެނުމަށް ނެގި ވޯޓުގައި ދިވެހި ރާއްޖެ ބައިވެރިނުވެއެވެ.
އދ. ގެ ޖެނެރަލް އެސެމްބްލީގައި ނެގި މި ވޯޓަކީ ދުނިޔޭގެ އެކިއެކި ގައުމު ތަކުގައި ހިންގަމުން އަންނަ ހަނގުރާމަތަކާއި އިންސާނިއްޔަތާއި ޚިލާފު އަމަލުތަކާ ދެކޮޅަށް އދ ގެ މެމްބަރު ގައުމުތައް ގުޅިގެން މަސައްކަތް ކުރުމަށް އެއްބަސްވެ، އެކަން ހުއްޓުވުމަށް މަސައްކަތް ކުރުން އެޖެންޑާގައި ހިމެނުމަށް ނެގި ވޯޓެކެވެ.
ޖެނެރަލް އެސެމްބްލީގައި ނެގި މި ވޯޓުގައި 117 މެމްބަރު ގައުމަކުން ވޯޓު ދީފައިވެއެވެ. އެޖެންޑާގައި އެ މައްސަލަ ހިމަނަން ފެންނަ ކަމަށް ވޯޓު ދިން ގައުމު ތަކުގެ ތެރޭގައި އިޒްރޭލް، ޔަމަން، ސައުދީ އަރަބިއްޔާ، އިރާޤް، އެމެރިކާ، ޔޫއޭއީ، ބްރެޒިލް، ޑެންމާކް، ޖަޕާނު، މެލޭޝިއާ، ގަތަރު، ދެކުނު ކޮރެއާ، ސްޕެއިން، ޔޫކްރެއިން އަދި ތުރުކީވިލާތްވެސް ހިމެނެއެވެ.
އަދި އެ މައްސަލަ އދ ގެ އެޖެންޑާގައި ނުހިމަނަންވެސް 21 ގައުމަކުން ވޯޓު ދީފައިވެއެވެ. އޭގެތެރޭގައި ހިމެނޭ ބަޔެއް ގައުމު ތަކަކީ ރޮހިންޖާ ދަރިކޮޅުގެ މުސްލިމުންނާ ދެކޮޅަށް ހިންގަމުން އަންނަ އިންސާނިއްޔަތާއި ޚިލާފު ގަތުލްއާންމު ތަކުގެ ސަބަބުން މި ދުވަސްވަރު މުޅި ދުނިޔެ އެގައުމަކަށް ލޯ އަމާޒު ވެފައިވާ މިޔަންމާ، ޗައިނާ، ސީރިއާ، ސޫދާން، ރަޝިޔާ، ޕާކިސްތާން އަދި އީރާންވެސް ހިމެނެއެވެ.
ވަކި ކޮޅަކަށް ވޯޓު ނުދިނީ 17 ގައުމަކުންނެވެ. މި ވޯޓުގައި ބައިވެރިނުވި ގައުމު ތަކަކީ ދިވެހިރާއްޖެ، ލުބްނާން، ލީބިޔާ، ޒެމްބިއާ، ތުރުކަމަނިސްތާން، އުޒްބަކިސްތާން، ތަޖަކިސްތާން، ގްރީސް، ސީޝެލްސް އަދި މޮރިޝަސް އެވެ.
މިޔަންމާގެ ރަކީން ސްޓޭޓްގައި ދިރިއުޅޭ ރޮހިންޖާ ދަރިކޮޅުގެ މުސްލިމުންނާމެދު އެގައުމުގެ ސިފައިން ހިންގަމުން އަންނަ ގަތުލްއާންމު ތަކާއި ލާއިންސާނީ އަމަލުތައް ހައްދުފަހަނައަޅާފައި ވަނިކޮށް މި ވޯޓުގައި ރާއްޖެ ބައިވެރި ނުވުމުން ބަޔެއް ފަރާތްތަކުގެ ފާޑުކިޔުން ސަރުކާރަށް އަމާޒު ވުމުން ދިވެހި ޚާރިޖިއްޔާއިން ބުނެފައި ވަނީ ޖެނެރަލް އެސެމްބްލީގައި ނެގި ވޯޓަކީ މިޔަންމާގެ މުސްލިމުންނާ ގުޅޭ ވޯޓެއް ނޫން ކަމަށެވެ.
