މިޔަންމާގެ ރަކީން ސްޓޭޓްގައި ދިރިއުޅެމުން އަންނަ ރޮހިންޖާ ދަރިކޮޅުގެ މުސްލިމުންނަށް އެހީވުމަށްޓަކައި ފައިސާ ޖަމާކުރާނެ ޚާއްސަ އެކައުންޓެއް ސަރުކާރުން ހުޅުވައިފިއެވެ.
އިސްލާމިކް މިނިސްޓްރީ އާއި ޑިފެންސް މިނިސްޓަރީ އަދި ހޯމް މިނިސްޓްރީގެ އިސްވެރިން ތިއްބަވާ ސަރުކާރުގެ ޚާއްސަ ކޮމިޓީން އެކައުންޓް ހުޅުވީ ބޭންކް އޮފް މޯލްޑިވްސް އާއި އިސްލާމިކް ބޭންކްގައެވެ. ބޭންކް އޮފް މޯލްޑިވްސްގައި ހުޅުވި ރޮހިންޖާއިންނަށް އެހީވާ ފައިސާ ޖަމާކުރާނެ ޚާއްސަ އެކައުންޓަކީ 7730000160816 (ދިވެހި ރުފިޔާ ކައުންޓް) އާއި 7730000160818 (ޑޮލަރު އެކައުންޓް) ނަންބަރެވެ. އިސްލާމިކް ބޭންކްގައި ހުޅުވި އެކައުންޓް ނަންބަރަކީ 90101480012181001 (ދިވެހި ރުފިޔާ އެކައުންޓް) އާއި 90101480012182001 (ޑޮލަރު އެކައުންޓް) އެވެ.
ޙާލުގައި ޖެހިފައިވާ ރޮހިންޖާ ދަރިކޮޅުގެ މުސްލިމުންނަށް އެހީވުމަށް ތަފާތު ހަރަކާތްތަކެއް ހިންގުމަށްޓަކައި ސަރުކާރުން ވަނީ ޚާއްސަ ކޮމިޓީއެއް އެކުލަވާލާފައެވެ. މި ކޮމިޓީން ހިންގަން ހަމަޖެހިފައިވާ ކަންތަކުގެ ތެރޭގައި މީޑިޔާ ޓެލެތޯނެއް ބޭއްވުންވެސް ހިމެނެއެވެ. ކޮމިޓީން ބުނީ ފައިސާގެ އެހީތެރިކަން ފޯރުކޮށްދޭން ބޭނުން ކޮންމެ މީހަކުވެސް މިއިން އެކައުންޓަކަށް ފައިސާ ޖަމާ ކުރުމުގެ ފުރުޞަތު ހުޅުވާލާފައިވާ ކަމަށެވެ. އަދި އެހެން ހަރަކާތްތަކުގެ ތެރެއިންވެސް އެކަން ކުރެވިދާނެ ކަމަށެވެ.
ރޮހިންޖާ ދަރިކޮޅުގެ މުސްލިމުންނާމެދު މިޔަންމާގެ ސިފައިން ހިންގަމުންދާ ޖަރީމާ ތަކުގެ ސަބަބުން އެގައުމު ދޫކޮށް އަވައްޓެރި ބަންގްލަދޭޝްއަށް ކޮންމެ ދުވަހަކުވެސް ދަނީ އެތައް ސަތޭކަ ބަޔަކު ސިފައިންނަށް ފިލައިގެން ވަންނަމުންނެވެ.
