ފުލުހުންގެ ވަޒީފާއަށް ވަނުމުގެ ފުރުޞަތު މޯލްޑިވްސް ޕޮލިސް ސާރވިސްއިން މިއަދު ހުޅުވާލައިފިއެވެ.
ފުލުހުންގެ ވަޒީފާއަށް ވަނުމުގެ ފުރުޞަތު ހުޅުވާލިއިރު މިމަހުގެ 19 ވަނަ ދުވަހު ހަވީރު ހަތަރެއް ޖަހަންދެން ވަޒީފާއަށް އެދި ސިޓީ ލުމުގެ ފުރުޞަތު ވަނީ ހުޅުވާލާފައެވެ. ފުލުހުން ބުނީ ވަޒީފާއަށް އެދި ހުށަހަޅާއިރު ޖީސީއީ އޯލެވެލް އިމްތިހާނުން ނުވަތަ ސެކަންޑަރީ ސެޓްފިކެޓް އިމްތިހާނުގެ ދެ މާއްދާއިން ދަށްވެގެން ސީ ފާސް ލިބިފައި އޮންނަން ޖެހޭނެ ކަމަށެވެ. އެއާއެކު މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ ލެވެލް ތިނެއްގެ ކޯހެއް ފުރިހަމަކޮށް ނުވަތަ އެއަށްވުރެ މަތީ ސަނަދެއް ހާސިލް ކޮށްފައިވާ ފަރާތަކަށްވެސް ވާންޖެހޭނެ ކަމަށެވެ.
މީގެއިތުރުން އުމުރުން 18 އަހަރު ވެފައިވުމާއި އަދި ފަންސަވީސް އަހަރު ފުރިފައި ނުވުމާއި ފިރިހެނެއް ނަމަ 5 ފޫޓް ތިން އިންޗި އަދި އަންހެނެއް ނަމަ 5 ފޫޓަށްވުރެ ކުރު ނުވުންވެސް އެއީ ޝަރުތެކެވެ. އަދި ވަޒީފާއަށް އެދޭ މީހާއަކީ އިސްލާމް ދީނުގައި ހައްދެއް ގާއިމް ކޮށްފައި ނެތް މީހަކަށްވުމާއި ވައްކަން، ޓެކުން، މަކަރާއި ހީލަތް، މަސްތުވާތަކެތި ބޭނުން ކުރުން، ނުވަތަ މަސްތުވާތަކެތީގެ ވިޔަފާރި ކުރުން، އަދި ޚިޔާނާތް ފަދަ ކުށެއް ކުރިކަން ފާއިތުވީ 5 އަހަރު ދުވަހުގެ ތެރޭގައި ޝަރީއަތަށް ސާބިތު ވެފައި ނެތް މީހަކަށްވެސް ވާންޖެހެއެވެ.
މީގެއިތުރުން ވޭތުވެ ދިޔަ 5 އަހަރުގެ ތެރޭގައި މަސްތުވާތަކެތިން އެކެހެރިވުމަށް ފަރުވާ ހޯދާފައިވާ ފަރާތަކަށް ނުވުމާއި އެއްވެސް ސިޔާސީ ޕާޓީއެއްގެ ރަޖިސްޓްރީގައި ނެތް މީހަކަށް ވުމާއި ފުލުހުންގެ ތަމްރީނު ފުރިހަމަ ކުރެވޭވަރުގެ ސިއްޙަތެއް ހުރި މީހަކަށްވެސް ވާންޖެހެއެވެ.
