މިޔަންމާގައި ހާލުގައި ޖެހެމުންދާ ރޮހިންޖާ ދަރިކޮޅުގެ މުސްލިމުންނަށް އެހީވުމަށް ދިވެހި ރެޑްކްރެސެންޓުން ހުޅުވާފައިވާ ފަންޑަށް ފައިސާ ފޮނުވުމަށް އެދި އާންމުނަށް ބަޔަކު ފޯނު ކުރަމުން އަންނަ ކަމަށާއި އެކަމަށް ސަމާލުވުމަށް ދިވެހި ރެޑްކްރެސެންޓުން އިލްތިމާސް ކޮށްފިއެވެ.
ދިވެހި ރެޑްކްރެސެންޓުން މިއަދު ނެރުނު ނޫސްބަޔާނެއްގައި ބުނީ މިޔަންމާގައި ޙާލުގައި ޖެހެމުންދާ މުސްލިމުންނަށް އެހީވުމަށް ފައިސާ ހޯދަން އެދި އެއްވެސް ފަރާތަކަށް އެ ޖަމްއިއްޔާއިން ފޯނު ނުކުރާ ކަމަށާއި އަދި މެސެޖެއްވެސް ނުކުރާ ކަމަށެވެ. އެހެންކަމުން ރެޑްކްރެސެންޓުން ހުޅުވާފައިވާ ފަންޑަށް ފައިސާ ފޮނުވުމަށް އެދި ފޯނުކުރާ އެއްވެސް މީހެއްގެ ބަހަށް ހެއްލި ފައިސާ ނުފޮނުވުމަށްވެސް އެފަރާތުން ވަނީ އާންމުންގެ ކިބައިން އެދިފައެވެ.
މިޔަންމާގެ ރަކީން ސްޓޭޓުގައި ދިރިއުޅޭ ރޮހިންޖާ ދަރިކޮޅުގެ މުސްލިމުންނާމެދު އެގައުމުގެ އަސްކަރިއްޔާ އާއި ބުޑިސްޓުން ހިންގަމުން އަންނަ ލާއިންސާނީ އަމަލުތަކުގެ ސަބަބުން ގެއްލުންލިބި ޙާލުގައި ޖެހެމުންދާ މީހުންނަށް އެހީވުމަށް ފައިސާ ހޯދަން ދިވެހި ރެޑްކްރެސެންޓުން ހުޅުވާފައިވާ ފަންޑަށް އެއްވެސް ބޭފުޅަކު ފައިސާ ޖަމާކުރަން ބޭނުންނަމަ ކުރާނެ ދެ އެކައުންޓު ނަންބަރު ވެސް އެ ޖަމްއިއްޔާއިން ވަނީ އާންމު ކޮށްފައެވެ.
އެގޮތުން ފައިސާ ޖަމާ ކުރަން ބޭނުންވާ ފަރާތްތަކުން ކުރާނީ އެޖަމްއިއްޔާއިން އިސްލާމިކް ބޭންކްގައި ހުޅުވާފައިވާ އެކައުންޓް ނަމްބަރު 99010155500036100 އަށް ނުވަތަ ބީއެމްއެލް އެކައުންޓް ނަމްބަރު 7701176022001 އަށެވެ.
