މިޔަންމާގެ ރަކީން ސްޓޭޓްގައި ދިރިއުޅެމުން އަންނަ ރޮހިންޖާ މުސްލިމުންނަކީ ޓެރަރިސްޓުން ކަމަށާއި އެ އަވަށުގެ މުސްލިމުންގެ ޙަލަތާއި ގުޅުވައިގެން ސޯޝަލް މީޑިޔާގައި ދައުރު ވަމުން ދަނީ "ފޭކް ފޮޓޯ" ތަކާއި ފޭކް ވީޑިޔޯ ތަކެއް ކަމަށް މިޔަންމާގެ ލީޑަރ އަން ސަން ސޫކީ ވިދާޅުވެއްޖެއެވެ.
ދުނިޔޭގެ ސުލްޙައިގެ އިނާމް ޙާސިލް ކުރައްވާފައިވާ ސޫކީ ހިމޭނުން ހުންނަވާތީ ދުނިޔޭގެ ގިނަބަޔެއްގެ ފާޑުކިޔުން އަމާޒު ވެފައި ވަނިކޮށް ބަހެއް ވިދާޅުވި ފުރަތަމަ ފަހަރުވެސް ވިދާޅުވީ ރޮހިންޖާ މުސްލިމުންގެ ޚަބަރުތައް މީހުން ގެނެސް ދެމުންދަނީވެސް ރޮހިންޖާ މުސްލިމުން ޕްރޮމޯޓްވާ ގޮތަށް ކަމަށާއި ޚަބަރުތައް ގެނެސްދެނީވެސް އޮޅުވާލައިގެން ކަމަށެވެ.
ސޫކީ މިފަދައިން ވާހަކަ ދައްކަވާފައި މިވަނީ ރޮހިންޖާގެ މުސްލިމުންގެ ދިފާއުގައި އެންމެ ވަރުގަދައަށް ވަކާލާތު ކުރައްވަމުން ގެންދަވާ ތުރުކީގެ ރައީސް ތޮއްޔިބު އުރުދުޣާން ސޫކީއަށް ފޯނު ކުރެއްވުމުން އުރުދުޣާންއާ ދެއްކެވި ވާހަކަފުޅު ތަކުގައި ކަމަށް ސޫކީގެ ރަސްމީ އޮފީހުން ވަނީ ބުނެފައެވެ. އުރުދުޣާން އަރިހު ސޫކީ ވިދާޅުވީ މިޔަންމާގެ ސަރުކާރުން ރަކީން ސްޓޭޓްގައި ދިރިއުޅޭ މުސްލިމުން ޙިމާޔަތް ކުރަމުންދާ ކަމަށާއި ސަރުކާރުން އެ އަވަށުގެ މުސްލިމުންނާމެދު ކަންތައް ކުރަމުންދަނީ ވަރަށް ރަނގަޅަށް ކަމަށެވެ.
ރަކީން ސްޓޭޓުގައި މިޔަންމާގެ ސިފައިންގެ އަނިޔާވެރިކަން ޙައްދުފަހަނައަޅައި ގޮސްފައިވާ މިވަގުތު ރޮހިންޖާ ދަރިކޮޅުގެ ދިފާއުގައި ވާހަކަ ނުދެއްކެވުމާއި ރޮހިންޖާ ދަރިކޮޅުގެ މީހުންނަށް އިތުރަށް އަނިޔާކުރަން ހިތްވަރުލިބޭ ގޮތަށް ސޫކީ ވާހަކަފުޅު ދެއްކެވުމުން މީހުންގެ ފާޑުކިޔުން ސޫކީއަށް ވަނީ އިތުރަށް ބޮޑުވެފައެވެ.
