ރާއްޖެއިން މިއަހަރު ޙައްޖުގެ އަޅުކަން އަދާކުރުމަށް މައްކާއަށްދިޔަ ޙައްޖުވެރިންގެ ތެރެއިން ފުރަތަމަ ގްރޫޕް މިރޭ އިރާކޮޅު މާލެ އަންނާނެއެވެ.
މިރޭ އިރާކޮޅު މާލެ އަންނަ ފުރަތަމަ ދިވެހި ގްރޫޕަކީ ޒައީ ގްރޫޕްގެ ހަވާލުގައިދިޔަ ޙައްޖުވެރިންގެ ގްރޫޕެވެ. މި ގްރޫޕް އަންނާނެ ކަމަށް މައުލޫމާތު ލިބިފައި ވަނީ މިރޭ 7:25 ގައެވެ. ދިވެހި ޙައްޖު ގްރޫޕް ތަކުގެ ތެރެއިން ސިސިލްފަރު ގްރޫޕްގެ ޙައްޖުވެރިން އައުމަށް ހަމަޖެހިފައި ވަނީ އަންނަ ހަފްތާގެ އާދީއްތަ ދުވަހުގެ ރޭގައެވެ. އަދި އަލް ޙަރަމައިން ގްރޫޕްގެ ޙައްޖުވެރިން އަންނާނީ އަންނަ ހަފްތާގެ ހޯމަ ދުވަހުގެ ރޭގައެވެ.
ރާއްޖެއިން އެންމެ ގިނަ ޙައްޖުވެރިންނާ ހަވާލުވި ޙައްޖު ކޯޕަރޭޝަނުގެ ޙައްޖުވެރިން ރާއްޖެ އަންނަން ފަށާނީ އަންނަ ހުކުރު ދުވަހުގެ ރޭއެވެ. ޙައްޖު ކޯޕަރޭޝަނުގެ ހަވާލުގައިދިޔަ ޙައްޖުވެރިން ރާއްޖެ އަންނާނީ އެކި ދުވަސް މަތިންނެވެ.
ރާއްޖެއިން މިއަހަރު ޙައްޖަށް ދިޔައީ ޖުމްލަ 1،300 މީހުންނެވެ. ރާއްޖެއަށް ފުރަތަމަ ލިބުނު 1000 ކޯޓާއަށް ޙައްޖުވެރިން ގޮސްފައި ވަނިކޮށް ފަހުން ލިބުނު 1000 ކޯޓާއަށް ދެވުނީ 300 މީހުންނަށެވެ. ރާއްޖެއިން ޙައްޖަށްދިޔަ މީހުންގެ ތެރެއިން ބަޔަކު މުޒްދަލިފާއަށް ހިލަ އުކަން ގޮސް އުޅުމުގެ ތެރޭގައި މަގު އޮޅިގެން ގެއްލިފައި ވެއެވެ. ނަމަވެސް ދިވެހި ޙައްޖު ގްރޫޕްތައް މިރޭ މާލެ އަންނަން ފަށާއިރު ގެއްލުނު ހުރިހާ ޙައްޖުވެރިން ވަނީ ފެނިފައެވެ.
