ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ޖަލްސާ ތަކުގެ ހާޒިރީން އެންމެ ފުލަށް ދެމެމްބަރަކު ހިނގައްޖެއެވެ.
މަޖިލީހުގެ ހާޒިރީން މިފަހަރު އެންމެ ފުލަށް ދިޔައީ އެމްޑީއޭގެ ލީޑަރ އަދި މީދޫ ދާއިރާގެ މެމްބަރު އަޙްމަދު ޝިޔާމް މުޙަންމަދު އާއި ކާށިދޫ ދާއިރާގެ މެމްބަރު ފައިސަލް ނަސީމްއެވެ. ޝިޔާމް އާއި ފައިސަލް ވަޑައިގެންފައި ވަނީ އެންމެ ޖަލްސާއަކަށެވެ.
މި ދެ މެމްބަރުން އެންމެ ޖަލްސާއަކަށް ވަޑައިގެންނެވިއިރު މިއަހަރުގެ ދެވަނަ ދައުރުގައި ބާއްވާފައި ވަނީވެސް އެންމެ 11 ޖަލްސާއެވެ. މަޖިލީހުގެ ޖަލްސާތައް ކުރިޔަށް ގެންދެވުނީ ޖޫން 5 އިން އޮގަސްޓް މަހުގެ 24 ވަނަ ދުވަހާ ހަމައަށެވެ. ޝިޔާމް އާއި ފައިސަލް ހާޒިރީގެ އެންމެ ފުލަށް ވަޑައިގެންނެވިއިރު ބޭއްވި ހުރިހާ ޖަލްސާއަކަށް ވަޑައިގެންނެވި މެމްބަރުންގެ އަދަދު ވަރަށްގިނައެވެ.
މަޖިލީހުގެ ޖަލްސާތައް ހުއްޓިގެން ދިޔައީ މަޖިލީހުގެ ރައީސް އަބްދުﷲ މަސީޙްގެ އިތުބާރު ނެތްކަމުގެ މައްސަލަ އިދިކޮޅު ފަރާތްތަކުން ދެފަހަރަކަށް މަޖިލީހަށް ވެއްދި ހިސާބުން އުފެދިގެންދިޔަ ސިޔާސީ ހަލަބޮލި ކަމުގެ ތެރެއިންނެވެ.
އިދިކޮޅު މެމްބަރުން ވިދާޅު ވަމުން ގެންދަވަނީ މަޖިލީހުގެ ރައީސް މަސީޙުގެ އިތުބާރުނެތް ކަމުގެ މައްސަލަ 45 މެމްބަރުންގެ ސޮޔާއެކު ވައްދާފައި ވަނިކޮށް އެހެން ކަމެއް އެޖެންޑާކޮށް މަސީޙުގެ ރިޔާސަތުގައި ޖަލްސާތައް ކުރިޔަށް ގެންދަން ނުކެރޭނެ ކަމަށެވެ. އެންމެ ފަހުން މަޖިލީހުގެ ޖަލްސާއެއް ބޭއްވީވެސް މަޖިލީހުގެ ރިޔާސަތުން ސިފައިންގެ ޙިމާޔަތް ހޯއްދަވައިގެންނެވެ.
