މިއަންމާގައި ދިރިއުޅޭ މުސްލިމް ދަރިކޮޅުގެ މީހުންނާމެދު އެގައުމުގެ ސިފައިން ހިންގަމުން އަންނަ ލާއިންސާނީ އަމަލު ތަކާހުރެ ދިވެހިންގެ ރުޅިވެރިކަން އަމާޒު ވެފައި ވަނިކޮށް މިއަންމާގެ ހެލްތް މިނިސްޓަރ ޑރ މަޔަންޓް ހުވައި ރާއްޖެ ވަޑައިގަތުމަށް ކުރިން ހަމަޖެހިފައި އޮތް ދަތުރު ކެންސަލް ކޮށްފިއެވެ.
މިއަންމާގެ ހެލްތް މިނިސްޓަރ ރާއްޖެ ވަޑައިގަތުމަށް ކުރިން ހަމަޖެހިފައި އޮތީ މާދަމާރޭގެ ވަގުތެއްގައެވެ. އެއީ ރާއްޖޭގައި ބޭއްވުމަށް ހަމަޖެހިފައިވާ ދުނިޔޭގެ ސިއްޙަތު ޖަމްއިއްޔާ (ޑަބްލިޔޫއެޗްއޯ) ގެ ބައްދަލުވުމެއްގައި ބައިވެރި ވުމަށެވެ. މިނިސްޓަރުގެ ދަތުރު ކެންސަލް ކުރުމުގެ ކުރިން ދިވެހިންގެ ތެރެއިން އެތައްހާސް ބަޔަކު ދިޔައީ މިއަންމާގެ ހެލްތް މިނިސްޓަރު ރާއްޖެ ނޭރުމަށް ގޮވާލަމުންނެވެ.
ވަޒީރުގެ ދަތުރު ކެންސަލް ކުރިއިރު ރާއްޖެއިން ވަނީ މިއަންމާއާއެކު އޮތް ވިޔަފާރީގެ ގުޅުން ކަނޑާލިކަންވެސް ރޭ އިއުލާން ކުރައްވާފައެވެ. މިއަންމާގައި އެގައުމުގެ މުސްލިމް ދަރިކޮޅުގެ މީހުންނަށް ސިފައިންގެ ހަމަލާތައް އަމާޒުވެ އަނިޔާވެރިކަން އިންތިހާއަށް ދިޔައީ މުސްލިމް ދަރިކޮޅުގެ ބަޔަކު އަސްކަރިއްޔާގެ މަރުކަޒަކަށް ހަމަލާ ދިނުމުންނެވެ.
