އީދު ބަންދާ ދިމާކޮށް މާލެއިން ފުރައިގެން ރާއްޖޭގެ އެކި ކަންކޮޅު ތަކަށް ގިނަ އަދަދެއްގެ މީހުންނާއެކު ފުރަން އުޅުނު 92 އުޅަނދުގެ ތެރެއިން 19 އުޅަނދެއްގެ ސަލާމަތީ ކަންކަން ފުރިހަމަ ކޮށްފައި ނެތުމުން އެމްއެންޑީއެފުން އެ އުޅަނދުތައް ފުރުން ހުއްޓުވައިފިއެވެ.
އެމްއެންޑީއެފުން ބުނީ ހުސްވި އޮގަސްޓް މަހުގެ ތިރީސް ވަނަ ދުވަހުން ފެށިގެން އިއްޔެއާ ހަމައަށް މާލޭގެ ބަނދަރުން މީހުން އަރުވައިގެން އީދަށް ފުރި އުޅަނދުތައް ބަލައި ފާސް ކުރުމުގެ ޚާއްސަ އޮޕަރޭޝަނުގައި ކޯސްޓް ގާޑުން ޗެކް ކޮށްފައިވާ 92 އުޅަނދަށް ސިފައިން އަރައި އުޅަނދުގެ ކެޕްޓަނު އަތުގައި ލައިސަންސް އޮތްތޯ އާއި މެރިން ވީއެޗްއެފް ޗެކް ކުރުމާއި، އުޅަނދުގައި މީހުން އުފުލުމަށް ކަނޑައެޅިފައިވާ އަދަދަށް ވުރެ ގިނައިން މީހުން އުފުލާތޯ ބެލުމާއި އަދި ދަތުރުވެރިންގެ ސަލާމަތާއި ރައްކާތެރިކަމަށްޓަކައި އަޅަންޖެހޭ އެހެން ބައެއް ފިޔަވަޅުތައް އަޅާފައިވޭތޯ ވެސް ބަލާފައިވާނެ ކަމަށެވެ.
ތިން ދުވަސް މަތިން ހިންގި މި އޮޕަރޭޝަނުގައި ޗެކް ކުރި 92 އުޅަނދުގެ ތެރެއިން ފުރުމުގެ ހުއްދަ ދީފައި ވަނީ 63 އުޅަނދަށެވެ. 19 އުޅަނދު ފުރިޔަނުދީ ވަނީ ކެޕްޓަނަށް ނަސޭހަތްތެރި ވެފައެވެ. އެމްއެންޑީއެފުން ބުނީ އީދު ބަންދު ނިންމައި އުޅަނދު ފަހަރު މީހުން ގޮވައިގެން އެނބުރި މާލެ އަންނައިރުވެސް ކޯސްޓް ގާޑުން ބަލައި ފާސްކުރުމުގެ ޚާއްސަ ޕްރޮގްރާމް ކުރިޔަށް ގެންދާނެ ކަމަށެވެ.
