ރައީސުލްޖުމްހޫރިއްޔާ އަބްދުﷲ ޔާމީން އާއި އެމަނިކުފާނުގެ އަނބިކަނބަލުން ފާތިމަތު އިބްރާހިމް ޙައްޖަށް ވަޑައިގަތުމަށްޓަކައި މިރޭ ފުރަން އޮތް ދަތުރުފުޅު ކުއްލި ގޮތަކަށް ފަސް ކުރައްވައިފިއެވެ.
ރައީސްގެ ދެކަނބަލުން މިރޭ ފުރާވަޑައިގަތުމަށްޓަކައި ރިޔާސީ ލޯންޗު ކޮޅުވެސް މިރޭ އިރާކޮޅު އޮތީ ފުރަން ތައްޔާރު ކޮށްފައެވެ. އަދި ރައީސް އޮފީހާއި އެއްނަންބަރު ފާލަމާ ދެމެދު ރައީސްގެ ސެކިއުރިޓީންނާއި ފުލުހުންވެސް ހަރަކާތްތެރިވަމުން ދިޔަ މަންޒަރު ފެނުނެވެ.
ނަމަވެސް ކުއްލި ގޮތަކަށް ރައީސްގެ ދަތުރުފުޅު ވަނީ ފުރާވަޑައިގަންނަވާ ގަޑި ވަރަށް ކައިރިވެފައި ވަނިކޮށް ފަސްކުރައްވާފައެވެ. ފަސް ކުރެއްވީ އަންނަ ހޯމަ ދުވަހުގެ ރޭ ފުރާވަޑައިގަންނަވާ ގޮތަށެވެ. ނަމަވެސް ކުއްލިއަކަށް ދަތުރުފުޅު ފަސްކުރެއްވި ސަބަބެއް ސާފެއް ނުވިއެވެ.
ރައީސްގެ ދެކަނބަލުން ފުރުން ފަސްކުރެއްވި ނަމަވެސް ރައީސް އަރިހުގައި ޙައްޖަށް ވަޑައިގަންނަވާން ހަމަޖެހިފައިވާ ބޭފުޅުން ވަނީ ކުރިންވެސް ތާވަލް ކުރެވިފައި އޮތްގޮތަށް މިރޭ ފުރުއްވާފައެވެ. ރައީސްގެ ދެކަނބަލުން ޙައްޖަށް ވަޑައިގަންނަވާ ތިންވަނަ ފަހަރެވެ.
