ސްރީލަންކާގައި ހުންނަވާ ދިވެހި ސަފީރު ކަމުގެ މަގާމަށް ހަމަޖެއްސެވުމަށް މުޙަންމަދު ޙުސައިން ޝަރީފް (މުންދު) ގެ ނަން ރައީސް ޔާމީން ރައްޔިތުންގެ މަޖިލީހަށް ފޮނުއްވައިފިއެވެ.
މިވަގުތު ޖަޕާނަށް ކަނޑައަޅުއްވާފައިވާ ދިވެހި ސަފީރުކަން ކުރައްވަމުން ގެންދަވާ މުންދުގެ ނަން މި ފޮނުއްވީ ލަންކާގައި ހުންނެވި ސަފީރު ޒާހިޔާ ޒަރީރު ދާދިފަހުން ވަކިކުރެއްވުމަށް ފަހުއެވެ. ލަންކާގައި ހުންނަ ސަފީރު ކަމުގެ މަގާމަށް މުންދު ހަމަޖެއްސެވުމަށް މަޖިލީހުގެ ރުހުން ހޯދުމުގެ ކަންތަކުގައި މާދަމާ އޮންނަ ޖަލްސާއަށް ވަނީ އެޖެންޑާވެސް ކޮށްފައެވެ. އެހެންކަމުން މާދަމާ އޮންނަ ޖަލްސާގައި މުންދުގެ ނަން ދިރާސާ ކުރެއްވުމަށްޓަކައި ކޮމިޓީއަށް ފޮނުވާނެއެވެ.
ލަންކާގައި ހުންނަވާ ސަފީރު ކަމުގެ މަގާމަށް މުންދު ހަމަޖައްސަވާއިރު ސްރީލަންކާއަކީ ފަހަކަށް އައިސް އިދިކޮޅު ހަރަކާތްތަކުގެ މުހިންމު ބަޔެއް ކުރިޔަށްދާ ގައުމެކެވެ.
