ދިގު މުއްދަތެއްގެ ޖަލު ޙުކުމެއް މިހާރު ތަންފީޒު ކުރައްވަމުން ގެންދަވާ ކުރީގެ ނައިބު ރައީސް އަޙްމަދު އަދީބުގެ މައްޗަށް ދައުލަތުން މިހާރު ކުރަމުން އަންނަ އިތުރު 9 ދައުވާގެ ޝަރީއަތް ކުރިޔަށް ގެންދަވާއިރު ކްރިމިނަލް ކޯޓުގައި އޭނާގެ މައްސަލަ ބައްލަވާ ފަނޑިޔާރު ބަދަލު ކޮށްދެއްވުމަށް އަދީބު މިއަދު އެދިވަޑައިގެންފިއެވެ.
މިއަދު އޮތް ފުރަތަމަ ޝަރީއަތުގެ މަޖިލީހުގައި އަދީބު ވިދާޅުވީ އޭނާގެ މައްސަލަ މިވަގުތު ބައްލަވާ ފަނޑިޔާރަކީ އެ ދައުވާތައް ޕީޖީ އޮފީހުގައި ބެއްލެވި ވަކީލެއް ކަމަށާއި އެހެންކަމުން ދައުވާ ކުރާ ފަރާތާއި ޝަރީއަތްކުރާ ތަން އެއްވަމުންދާ މަންޒަރު އެބަފެންނަ ކަމަށެވެ. އަދީބުގެ އެވާހަކަފުޅަށް ފަނޑިޔާރު ވިދާޅުވީ އެކަންކަން ދެން އޮންނަ ޝަރީއަތުގެ މަޖިލީހެއްގައި ވަކީލުންގެ އެހީތެރިކަމާއެކު ހުށަހެޅުއްވުމަށެވެ.
މިއަދު އޮތް ޝަރީއަތުގެ މަޖިލީހުގައި ފަނޑިޔާރު ވަނީ އެ މައްސަލަ ތަކުގައި ވަކީލުން އައްޔަން ކުރެއްވުމަށް އަދީބަށް 10 ދުވަހުގެ މުއްދަތެއް ދެއްވާފައެވެ. މިއަދު އޮތް ޝަރީއަތުގައި އަދީބު ވަނީ ގިނަ ޝަކުވާތަކެއްވެސް ކުރައްވާފައެވެ. އެގޮތުން އެމަނިކުފާނު އާލާސްކަންފުޅާ އުޅުއްވާ ކަމަށާއި ފުރާނައަށް ނުރައްކާ ވެފައި ވަނިކޮށްވެސް ޝަރީއަތް ހިންގަވަނީތޯ އަދީބު ވަނީ ފަނޑިޔާރަށް ސުވާލު ކުރައްވާފައެވެ.
އަދީބުގެ މައްޗަށް މިހާރުވެސް ވަނީ 33 އަހަރުގެ ޖަލު ޙުކުމެއް އިއްވާފައެވެ. ދޫނިދޫ ޖަލުގައި މިވަގުތު އޮންނެވި އަދީބުގެ މައްޗަށް މިހާރު ކުރަމުންދާ 9 ދައުވާ ސާބިތުވެއްޖެނަމަ 25 އަހަރަށްވުރެ ގިނަ ދުވަހުގެ ޖަލު ޙުކުމެއް އިތުރަށް އަދީބަށް އަންނާނެއެވެ.
