ރައްޔިތުންގެ މަޖިލީހުގެ މެޖޯރިޓީ ސަރުކާރަށް ގެއްލުމުން މެޖޯރިޓީ ހޯދަން ރައީސް ޔާމީން ހަވާލުކުރެއްވީ ފުލުހުންނާ ކަމަށް ގަލޮޅު ދެކުނު ދާއިރާގެ މެންބަރު އަހްމަދު މަހްލޫފް ވިދާޅުވެއްޖެއެވެ. މަހްލޫފް މިހެން ވިދާޅުވީ ގުޅިފައިވާ އިއްތިހާދުގެ ފަރާތުން މީޑިއާއަށް މައުލޫމާތު ދެއްވަމުންނެވެ.
12 މެންބަރަކަށް ދައުވާކުރަން ފޮނުވި ވާހަކަ ދައްކަވަމުން މަހްލޫފް ވިދާޅުވީ ދައުވާ ކުރަނީ ހަމައެކަނި ބާރަ މެންބަރަކަށް ނޫން ކަމަށެވެ. މިވަގުތު ސައުދާއި، އަމީތު، އަދި ވަހީދުވީ ޖަލުގައެވެ. ފާރިޝްއަށް ވެސް ދައުވާ ކުރާ ވާހަކަ އާއި އަދި ފާރިޝްގެ އެހެން މައްސަލައެއް މިވަގުތު ބަލަމުންދާ ކަމަށްްވެސް މަހްލޫފު ވިދާޅުވިއެވެ. އަދި ރިޔާޒު ގެ މައްސަލައަކާއި، ގާސިމް ގެ މައްސަލައެއްވެސް މިވަގުތު ހިނގާކަމަށް މަހްލޫފު ވިދާޅުވިއެވެ. އަދި މަހްލޫފުގެ ޕާސްޕޯޓާއި، އާޒިމްގެ ޕާސްޕޯޓާއި، މުސްތަފާގެ ޕާސްޕޯޓާއި، އަރީފް ގެ ޕާސްޕޯޓު ވެސް މިވަގުތު ހިފަހައްޓާފައިވާ ކަމަށް މަހްލޫފު ވިދާޅުވިއެވެ.
ވިހި މެންބަރުންގެ ގަޔަށް ބަޑި ޖަހައި މަރައިގެންވެސް ރައީސް ޔާމީނަށް މަޖްލިސް މެޖޯރިޓީ ލިބިވަޑައިނުގަންނަވާނެ ކަމަށް މަހްލޫފް ވިދާޅުވަމުންދާ ވިދާޅުވުން ތަކުރާރު ކުރެއްވިއެވެ.
މަހްލޫފު ވަނީ ރޭގަ ޕީޕީއެމުން ގަލޮޅުގައި ބޭއްވި ބައްދަލުވުމަށް ވަރަށް ބޮޑާށް ފާޑު ވިދާޅުވެފައެވެ. އަދި ރޭގަ ޕީޕީއެމަށް ޖާގަ ދިންގޮތަށް އިއްތިހާދުގެ ފަރާތުން ކުނޫޒުގައި މިރޭ ބާއްވާ ޖަލްސާއަށް ވެސް ފުރުސަތު ދެއްވުމަށް ފުލުހުންގެ ކިބައިން މަހްލޫފު އެދިވަޑައިގެންނެވިއެވެ.
މިރޭގެ ޖަލްސާގައި ރައީސް މައުމޫން އަބްދުލް ގައްޔޫމް ވާހަކަފުޅު ދައްކަވާ ގޮތަށް ހަމަޖެހިފައިވާކަމަށް މަހްލޫފު ވިދާޅުވިއެވެ.
