ރާއްޖޭގެ 45 ރެށެއްގައި ބޯފެން ނައްކާކުރާ ނިޒާމު ފަރުމާކޮށް އަމަލީ މަސައްކަތް ކުރުމަށް ބަޔަކާ ހަވާލު ކޮށްފިއެވެ. މިމަސައްކަތް ހަވާލުކުރެވުނީ އިންޓަރނޭޝަނަލް ބިޑިންގް ޕްރޮސެސްއެއްގެ ތެރެއިން ހޮވިފައިވާ ކުންފުންޏެއްކަމުގައިވާ ޝާހް ޓެކްނިކަލް ކޮންސަލްޓެންޓްސް ޕްރައިވެޓް ލިމިޓެޑާއެވެ.
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ އަލްފާޟިލް ތާރިޤް އިބްރާހިމްއެވެ. އަދި ޝާހް ޓެކްނިކަލް ކޮންސަލްޓެންޓްސް ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ ޝާހް ޓެކްނިކަލް ކޮންސަލްޓެންޓްސް ގެ މެނޭޖިންގ ޑިރެކްޓަރ ގޯތަމް މަހާވިރު ޝާހް އެވެ. މި އެއްބަސްވުމުގައިވާ ގޮތުން ޝާހް ކޮންސަލްޓަންޓްއިން މި 45 ރަށުގެ ޑިޒައިން އެންމެ ދިގުވެގެން 6 މަސްދުވަހުގެ ތެރޭގައި ނިންމާގޮތަށްވަނީ ހަމަޖެހިފައެވެ. އޭގެ ފަހުން އެ ރަށްރަށުގެ ޢަމަލީ މަސައްކަތް ކުރިޔަށްދާއިރު އެމަސައްކަތް ކުރިޔަށްދާގޮތްވެސް އެ ކުންފުނީގެ ފަރާތުން ބަލަހައްޓާ ގޮތަށް ވަނީ ކަނޑައެޅިފައެވެ. މި އެއްބަސްވުމުގައި ކަނޑައެޅިފައިވާ ހުރިހާ މަސައްކަތުގެ ޖުމްލަ އަގަކީ 13,643,166.00 ރ. (ތޭރަ މިލިއަން ހަ ސަތޭކަ ސާޅީސް ތިން ހާސް އެއް ސަތޭކަ ފަސްދޮޅަސް ހަ ރުފިޔާ) އެވެ.
މި މަޝްރޫޢޫގެ ދަށުން ބޯފެނުގެ ނިޒާމު ޤާއިމުކުރުމަށް ކަނޑައެޅިފައިވާ ރަށްތަކަކީ؛ ހއ.އުތީމު، ހއ.މުޅަދޫ، ހއ.މުރައިދޫ، ހއ.އުލިގަމު، ހއ.މާރަންދޫ، ހއ.ފިއްލަދޫ، ހދ.ފިނޭ، ހދ.ކުރިނބީ، ހދ.ނޭކުރެންދޫ، ހދ.ހިރިމަރަދޫ، ށ.ފޭދޫ، ށ.ނަރުދޫ، ށ.ފީވަށް، ށ.ޅައިމަގު، ށ.ނޫމަރާ، ށ.ބިލެތްފަހި، ށ.ފުނަދޫ، ނ.މަގޫދޫ، ނ.ހެންބަދޫ، ނ.ޅޮހީ އއ.ހިމަންދޫ، އއ.ބޮޑުފުޅަދޫ، އއ.މަތިވެރި، އދ.ކުނބުރުދޫ، އދ.ދިގުރަށް، މ.ރަތްމަންދޫ، މ.ވޭވަށް، މ.ނާލާފުށި، ދ.ބަނޑިދޫ، ދ.މީދޫ ، ދ.ހުޅުދެލި، ތ.ވަންދޫ، ތ.ގާދިއްފުށު، ތ.އޮމަދޫ، ތ.ކަނޑޫދޫ، ތ.ކިނބިދޫ، ތ.ދިޔަމިގިލި، ގއ.ނިލަންދޫ، ގއ.މާމެންދޫ، ގއ.ކޮޑޭ، ގދ.ނަޑެއްލާ، ގދ.ހޯޑެއްދޫ، ގދ.ފިޔޯރީ، ގދ.ރަތަފަންދޫ އަދި ގދ.ފަރެސްމާތޮޑާ އެވެ.
މި މަޝްރޫޢު އަކީ ގްރީން ކްލައިމެޓް ފަންޑުގެ ހިލޭ އެހީގެ ދަށުން ކުރިއަށްގެންދާ މަޝްރޫޢުއެކެވެ. މި މަޝްރޫޢުގެ މަސައްކަތްތަކާއި ގުޅޭ ގޮތުން ގްރީން ކްލައިމެޓް ފަންޑްއަށް ފޮނުވަންޖެހޭ ރިޕޯޓުތައް ފޮނުވުމާއި، މަޝްރޫޢު ކުރިޔަށްދާގޮތް ބެލެހެއްޓުމަށް ކަނޑައެޅިފައިވާ އެކްރެޑިޓެޑް އެޖެންސީ އަކީ ޔޫއެންޑީޕީއެވެ.
ވޭތުވެދިޔަ ތިންއަހަރުގެ ތެރޭގައި 29 ރަށެއްގައި ބޯފެން ރައްކާކުރާ ނިޒާމު އަލަށް ޤާއިމުކޮށް ނިމިފައިވާއިރު، 18 ރަށެއްގައި މިފަދަ ނިޒާމުތައް ޤާއިމުކުރުމުގެ މަސައްކަތް މިހާރު ކުރިޔަށްދާ ކަމަށް އެންވަޔަރަންމަންޓް މިނިސްޓްރީން ހާމަ ކޮށްފައި ވެއެވެ. މީގެ އިތުރުން 12 ރަށެއްގައި ފެން އުފެއްދުމުގެ ޤާބިލްކަމާއެކު ބޯފެން ރަށްކާކުރުމުގެ ނިޒާމު ޤާއިމުކުރުމުގެ ޢަމަލީ މަސައްކަތް ކުރާނެ ފަރާތެއް ހޯދުމުގެ މަސައްކަތް މިހާރު ކުރިޔަށްދާ ކަމަށާއި، މިއަދު މި ޑިޒައިން މަސައްކަތް ހަވާލުކުރެވުނު 45 ރަށާ އެކު ބޯފެނުގެ ނިޒާމު ރައީސް ޔާމީނުގެ ސަރުކާރުގާއި ޤާއިމުކޮށްދެވޭ ރަށްތަކުގެ ޢަދަދު 104 އަށް އިތުރުވެގެންދާނެ ކަމަށްވެސް އެ މިނިސްޓްރީން ހާމަކުރެއެވެ.
ރާއްޖޭގެ 23 ރަށެއްގައި ޒަމާނީ ފެނުގެ ނިޒާމު ޤާއިމުކޮށް ނިމިފައިވާއިރު މީގެ ތެރެއިން 17 ރަށް ނިމިފައިވަނީ ވޭތުވެދިޔަ ތިން އަހަރުގެ ތެރޭގައެވެ. އަދި މިހާރު ފެނުގެ ނިޒާމުގެ ޢަމަލީ މަސައްކަތް ހަވާލުކުރެވިފައިވާ 20 ރަށުގެ އިތުރުން މިއަހަރުގެ ކުރިޔަށް އޮތްތަނުގައި އިތުރު 6 ރަށެއްގެ ޢަމަލީ މަސައްކަތް ފެށުމަށް ވަނީ ހަމަޖެހިފައެވެ.
މިއަދަދުތަކަށް ބަލާއިރު ފެނުގެ ނިޒާމް ޤާއިމުކުރެވޭ 49 ރަށާއި ބޯފެނުގެ ނިޒާމް ޤާއިމްކުރެވޭ 104 ރަށާއެކު ޖުމްލަ 153 ރަށެއްގެ ފެނުގެ މައްސަލައަށް ހައްލު ހޯދައިދިނުމުގެ މަސައްކަތަށް ވަނީ ކޮށްފައެވެ.
