މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީ ގެ ހުރިހާ މުވައްޒަފުންނަށް އަމާޒުކޮށްގެން ޓްރެފިކް އެވެއަރނަސް ޕްރޮގްރާމެއް ހިންގަން ފަށައިފިއެވެ.
މިޕްރޮގުރާމް ފެށުމުގެ ގޮތުން އިއްޔެ ހެނދުނު ސޯޝަލް ސެންޓަރުގެ ސެމިނަރ ރޫމުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ސެންޓަރަލް އޮޕަރޭޝަންސް ކޮމާންޑްގެ ހެޑް ޗީފް ސްޕްރިންޓެންޑެންޓް އޮފް ޕޮލިސް ޙަމްދޫން ރަޝީދުއެވެ.
މިރަސްމިއްޔާތުގައި ޓްރެފިކް މެނޭޖްމަންޓް ޑިޕާޓްމަންޓްގެ ހެޑް، ޗީފް އިންސްޕެކްޓަރ އޮފް ޕޮލިސް ފަތުޙުﷲ ވަޙީދުއާއި އެމްޓީސީސީގެ އިސްވެރިން ބައިވެރިވެލެއްވިއެވެ.
އެމްޓީސީސީގެ ހުރިހާ މުވައްޒަފުންނަށް އަމާޒުކޮށްގެން ފެށި މިސެޝަންތަކުގައި މަގުމަތީގެ އަދަބުތަކާއި އެކްސިޑެންޓްތައް ހިނގަން މެދުވެރިވާ ސަބަބުތަކާއި ރައްކާތެރިކަމާއެކު މަގުބޭނުންކުރެވޭނެ ގޮތްތައް ކިޔައިދެވިފައިވެއެވެ. މީގެ އިތުރުންވެސް ޓްރެފިކް ޤާނޫނާއި ޤަވާއިދުތަކާއިގުޅޭ މަޢުލޫމާތު ފޯރުކޮށްދީފައިވެއެވެ.
ސިލްސިލާ ގޮތެއްގައި މަހަކު އެއްފަހަރު އެމްޓީސީސީގެ މުވައްޒަފުންނަށް މިޕްރޮގްރާމް ކުރިއަށް ގެންދިއުމަށް ހަމަޖެހިފައިވެއެވެ. އެގޮތުން އިއްޔެގެ ޕްރޮގްރާމުގައި އެތަނުގެ 41 މުވައްޒަފުން ބައިވެރިވެފައިވެއެވެ.
މިޕްރޮގްރާމް ރަސްމީކޮށް ފެއްޓުމުގެ ގޮތުން އިއްޔެ ކުރިއަށް ދިޔަ ރަސްމިއްޔާތުގައި އެމްޓީސީސީގެ ފަރާތުން މޯލްޑިވްސް ޕޮލިސް ސަރވިސްއަށް އަގުވަޒަންކުރުމުގެ ގޮތުން ހަނދާނީ ފިލައެއް ދީފައިވެއެވެ.
