ކޮމްޕިއުޓަރުގައި ބޭނުންކުރާ ފޮންޓަކާ ހެދި ޕާކިސްތާނުގެ ބޮޑު ވަޒީރު ނަވާޒް ޝަރީފު އިސްތިއުފާ ދެއްވާން ޖެހިވަޑައިގެންފާނޭ ކަމަށް ޚަބަރު ލިބިއްޖެއެވެ.
މިއީ މިހާރު މަޝްހޫރު ވެގެން އުޅޭ "ޕެނަމާ ލިޔުން"ތަކުގެ ސަބަބުން ނަވާޒު ޝަރީފަށް ކުރިމަތި ވެގެން އުޅޭ މައްސަަލައެކެވެ. އެމަނިކުފާނުގެ ދަރިކަނބަލުން މަރިޔަމް ޘަރީފާއި، އެމަނިކުފާނާ ދެމޭފުޅުންގެ ނަންފުޅުގައި ޕާކިސްތާނުން ބޭރުގެ ގައުމެއްގައި ކުންފުންޏެއް ރަޖިސްޓަރީ ކުރައްވައި، އެ ކުންފުނީގެ ނަމުގައި ލަންޑަނުން ބިމާއި، ގެ ބައްލަވައިގަތް ކަމުގެ ތުހުމަތުގައި އެމަނިކުފާނުގެ މައްޗަށް މިހާރު ވަނީ ދައުވާތަކެއް އުފުލިފައެވެ. ތުހުމަތުގައިވާ ގޮތުގައި ދެބޭފުޅުން ބޭނުންފުޅު ކުރެއްވީ ދައުލަތުގެ ފައިސާއެވެ.
ސުޕްރީމް ކޯޓުގައި ކުރިއަށްދާ މައްސަލައިގައި ވަކީލުން ބުނަމުންދާ ގޮތުގައި ނަވާޒް ޝަރީފުގެ ދިރިއުޅުއްވުމުގެ ވައްޓަފާޅިއާއި، ލިބިވަޑައިގަންނަވާ އާމްދަނީއާ ނުބައްދަލެވެ.
މި ތުހުމަތުން ސަލާމަތްވެ ވަޑައިގަތުމަށްޓަކައި މަރިޔަމް ޝަރީފުގެ ވަކީލުން ވަނީ ކޯޓަށް ލިޔުންތަކެއް ހުށަހަޅާފައެވެ. އެ ލިޔުންތަކުން އެނގޭ ގޮތުގައި އެކަމަނާއަކީ ހަމައެކަނި މުދަލުގެ ހަވާލުދާރެކެވެ. ވެރިއެއް ނޫނެވެ. ލިޔުންތައް ޓައިޕްކޮށްފައި ވަނީ މައިކްރޯސޮފްޓް ކެލިބްރީ އޭ ނަމަކަށް ކިޔާ ފޮންޓަކުންނެވެ. ލިޔުމުގައި އޮތީ 2006 ވަނަ އަހަރުގެ ތާރީޚެކެވެ.
ލަންޑަނުގައި ހުންނަ ރެޑްލީ ފޮރެންސިކް ދޮކިއުމެންޓް ލެބޮރަޓޮރީ އޭ ނަމަކަަށް ކިޔާ ތަނަކުން މި ލިޔުންތައް ރަނގަޅަށް ބަލައި ތަހުލީލު ކުރުމަށް ފަހު ބުނެފައިވަނީ މިއީ ސައްހަ ނޫން ލިޔުންތަކެއް ކަމުގައެވެ.
މަރިޔަމް ޝަރީފުގެ އާއިލާއިން ބުނެފައި ވަނީ ކެލިބްރީ ފޮންޓަކީ 2004 ވަނަ އަހަރުން ފެށިގެން ބޭނުން ކުރަމުން އަންނަ ފޮންޓެއް ކަމުގައެވެ. މިއީ ހޮލަންޑްގެ މީހެއް ކަމުގައިވާ ލޫކާސް ޑި ގްރޫޓު ނަމަކަށް ކިޔާ މީހަކު އުފެއްދި ފޮންޓެކެވެ. އޭނާ ބުނާ ގޮތުގައި 2006 ވަނަ އަހަރުގެ ރަސްމީ އެއްވެސް ލިޔުމެއްގައި އެ ފޮންޓް ބޭނުން ކުރުމަކީ ވަރަށް ނާދިރު ކަމެކެވެ. "އަހަރެން ދެކޭ ގޮތުގައި ތިޔް ބުނާ ލިޔުންތަކެއް ވާނީ ދޮގު ލިޔުންތަކެއް ކަމުގައެވެ." ގްރޫޓް، އޭއެފްޕީއާ ވާހަކަ ދައްކަމުން ބުނެފައި ވެއެވެ.
އޭނާ ބުނެފައިވާ ގޮތުގައި އެ ފޮންޓް އުފެއްދުމުގެ މަސައްކަތް އޭނާ ކުރަން ފެށީ 2002 ވަނަ އަހަރުގެ ތެރޭގައެވެ. މަސައްކަތް ނިންމުމަށް ފަހު މައިކްރޯސޮފްޓް ކުންފުންޏަށް ފޮންޓު ފޮނުވީ 2004 ވަނަ އަހަރުގެ ތެރޭގައެވެ. މައިކްރޯސޮފްޓުން ފުރަތަމަ ކުރި ކަމަކީ ވިންޑޯޒްގެ އެކި އިސްދާރުތަަކުގައި އެ ފޮންޓް ޓެސްޓު ކުރުމެވެ. އެ ދުވަސްވަރު، އެ ފޮންޓް އެއްވެސް މީހަކަށް ހޯދާކަށް ފަސޭހައެއް ނުވާނެއެވެ.
"އެހެންވީމާ ކެލިބްރީ ފޮންޓު ހޯދުމަަކީ ނުވާނޭ ކަމެއްވެސް ނޫނެވެ. އެކަމަކު އެ ދުވަސްވަރު އެ ފޮންޓު ލިބޭނީ ކޮމްޕިއުޓަރުގެ މަސައްކަތް ކުރާ މާހިރުންގެ ބަޔަކާ ގުޅައިގެން، އެ މީހުން މެދުވެރިކޮށްގެންނެވެ. އެހެންވީމާ އެހައި މަސައްކަތުން ވަކި ފޮންޓެްް ހޯދައިގެން ރަސްމީ ލިޔުމެއްގައި 2006 ވަނަ އަހަރު ބަޔަކު ބޭނުން ކުރާނޭ ކަަމަަކަށް ނުފެނެއެވެ."
ކެލިބްރީ ފޮންޓް އާއްމުކޮށް ލިވޭ ގޮތް ހަދާފައި ވަނީ 2007 ވަނަ އަހަރު ނުކުތް މައިކްރޯސޮފްޓް އޮފީސް އިސްދާރާ އެކުގައެވެ.
އެހެންވީމާ މި ފޮންޓުގެ ސަބަބުން، ނަވާޒް ޝަރީފު އިސްތިއުފާ ދެއްވަން ޖެހިވަޑައިގަތުމަކީ އެކަށިގެންވާ ކަމެއް ކަމަށް މިހާރު ވަނީ ބެލެވިފައެވެ.
