ފަރަންސޭސިވިލާތުގެ ރައީސްގެ އަނބިކަނބަލުންގެ ރީތިފުޅުކަމަށް އެމެރިކާގެ ރައީސް ޑޮނަލްޑް ޓްރަމްޕް ތައުރީފު ކުރައްވައިފިއެވެ.
ފަރަންސޭސި ރައީސްގެ އޮފީހުގެ ފޭސްބުކް ޕޭޖުގައި ޕޯސްޓްކޮށްފައިވާ ވީޑިއޯ އަކުން ފެންނަ ގޮތުގައި ފްރާންސްގެ ރައީސް މެޣޯން އާއި ޓްރަމްޕްގެ އަނބިކަނބަލުންނާ ވާހަކަފުޅު ދައްކަވަމުންދާ މަންޒަރު ފެނެއެވެ. އިރުކޮޅަކުން ބްރިޖިޓް މެޣޯންއާ މުޚާޠަބުކުރައްވައި "ކަމަނާގެ ހަށިގަނޑުގެ ބައްޓަން ވަރަށް ހިތްގައިމު." މިހެން ވިދާޅުވެއެވެ. އަދި އެކަމަނާގެ ފިރިކަލުން އިމޭނުއަލް މެޣޯން އަރިހު އެވާހަކަފުޅު ތަކުރާރު ކުރެއްވިއެވެ. ބްރިޖިޓް މެޣޯންއަށް އިޝާރާތް ކުރައްވައި ޓްރަމްޕް ވިދާޅުވީ "އެކަމަނާގެ ހަށިގަނޑުގެ ބައްޓަން ވަރަށް ހިތްގައިމު. ވަރަށް ރީތި." މިހެންނެވެ.
އޭގެފަހުން އެކަމަނާ އާއި ވަރަށް އަދަޔާ ޚިލާފުގޮތަކަށް ސަލާމް ކުރައްވާ ތަން ފެނެއެވެ. ދުނިޔޭގެ ލީޑަރުންނާ ޓްރަމްޕް ސަލާމްކުރައްވާ މަންޒަރުތަކަކީ މީޑިއާގެ ސަމާލުކަމަށް ވަރަށް ގިނައިން އައިސްފައިވާ މަންޒަރުތަކެކެވެ. އެގޮތުން ފެބްރުއަރީ މަހު ޖަޕާނުގެ ބޮޑު ވަޒީރު އަބޭ ޝިންޒޯއާ ވައިޓްހައުސްގައި ބައްދަލުކުރެއްވި ވަގުތު 19 ސިކުންތު ވަންދެން އެމަނިކުފާނުގެ އަތްޕުޅުން ދޫނުކުރައްވައި ހުންނެވިއެވެ. އޭގެ އެއްމަސް ފަހުން ޖަރުމަނު ވިލާތުގެ ޗާންސެލަރާ އޯވަލް އޮފީހުގައި ބައްދަލުކުރެއްވިއިރު އެކަމަނާއާ ސަލާމް ނުކުރެއްވިއެވެ.
ބްރިޖިޓް މެޣޯން އަކީ ފަރަންސޭސި ރައީސް އިމޭނުއަލް މެޣޯންގެ ކުރީގެ މުދައްރިސެވެ. ބްރިޖިޓް އެމޭނުއަލް މެޣޯން އަށްވުރެ 24 އަހަރު ދޮށިފުޅެވެ. ޓްރަމްޕްގެ އަނބިކަލުން ޓްރަމްޕަށްވުރެ 24 އަހަރު ހަގުފުޅެވެ.
ޓްރަމްޕާއި އެމަނިކުފާނުގެ އަނބިކަނބަލުން ފަރަންސޭސި ވިލާތަށް ވަޑައިގެން އުޅުއްވަނީ ޖުލައި 14 ވަނަ ދުވަހު ފާހަގަ ކުރާ އެގައުމުގެ ގައުމީ ދުވަހު (ބެސްޓިލް ޑޭ)ގެ ހަފްލާގައި ބައިވެރިވެ ވަޑައިގެންނެވުމަށެވެ.
