މުސްލިމު އުއްމަތަށް މިއަދު ދިމާވެފައިވަނީ މީގެ ކުރީގެ އެއްވެސް ޒަމާނެއްގައި ދިމާވެފައި ނުވާފަދަ ގެއްލުންބޮޑު މައްސަލަ ތަކެކެވެ. މީގެތެރެއިން އެންމެ ފާހަގަކޮށްލެވޭ މައްސަލައަކީ، އިސްލާމްދީނުގެ ޢަދާވާތްތެރިންގެ އެޖެންޓުން ކޮންމެ ޤައުމެއްގައިވެސް އުފެދޭނެ ނިޒާމެއް ޤާއިމުކޮށް، ދުނިޔޭގެ ޤައުމުތަކުގައި އެ ނިޒާމު ތަންފީޛުކުރަމުން ގެންދިޔުމެވެ. މިއީ ދުނިޔޭގެ ހުރިހާ ޤައުމެއްގައި ހިންގޭ ނިޒާމެއްކަމުގައި ވީނަމަވެސް، މައިގަނޑުގޮތެއްގައި އޭގެ ގެއްލުން އުފުއްލަންޖެހެނީ، ދިރިއުޅުމުގެ ކޮންމެ ކަމެއްގައި ކަލަކަށް އީމާވުން ވާކަމަށް ޤަބޫލުކުރާ ބަޔަކު ވާނަމަ އެ ބަޔެކެވެ. އާދެ އިސްލާމީ ޤައުމުތަކެވެ.
މިދެންނެވި ނިޒާމަކީ އަދުގެ ތަޢުލީމީ ނިޒާމެވެ. ދުނިޔޭގެ ތަޢުލީމީ ނިޒާމު ބިނާވެފައިވަނީ ސެކިއުލަރ އުސޫލުގެ މައްޗަށެވެ. މީގެ ނަތީޖާއަކީ ހުރިހާ މަރުޙަލާއެއްގެ ސިލަބަސް އެކުލަވައިލުމުގައި ވެސް އެއްކައުވަންތަ ކަލަކު ވޮޑިގެންވާކަމުގެ އަސްލުގެ މައްޗަށް ސިލަބަސް އެކުލަވައިލުމުގެ ބަދަލުގައި، މާއްދިއްޔަތުގެމައްޗަށް ބިނާކޮށް އުނގަންނައިދިނުމުގެ ހުރިހާކަމެއް ހިންގަމުން ދިޔުމެވެ. މިއަދުގެ ކުޑަކުދިން ދަސްވެނިވަނީ އެބައިމީހުންނަށް މި ދުނިޔޭގައި އެންމެ ރަނގަޅު ވަޒީފާއެއް، ނުވަތަ އެންމެ ރަނގަޅު އާމްދަނީއެއް ލިބޭނީ ކޮން ދާއިރާއަކުންތޯ ބަލައި، އެ ރޮނގަކުންނެވެ. އިންސާނާގެ ދިރިހުރުން ބިނާވެފައިވަނީ ހަމައެކަނި މާއްދީ މަންފާގެމައްޗަށްކަމުގައި ޤަބޫލުކުރުމާއެކުގައެވެ. އަދި اللَّهُއަށް އީމާންވުމަކީ ކޮބައިކަން އޮޅުންނުފިލާތާނގައި އެއީ ޚުރާފީ ފުލޯކެއް ނުވަތަ މިޒަމާނާ ނުގުޅޭ ކަމެއްކަމުގައި ގަބޫލުކުރެވުމާއެކުގައެވެ. 1983 ވަނައަހަރު މާލޭ މަޖީދިއްޔާ ސްކޫލްގައި ޕާރޓްޓައިމް މުދައްރިސެއްގެގޮތުގައި އިސްލާމް ކިޔަވައިދޭން އުޅުނުއިރު މިކަން ގާތުންފެނި ތަޖުރިބާކުރެވިފައި ވެއެވެ.
އިސްލާމީ އުސޫލުތަކާ އެއްގޮތަށް ތަޢުލީމީ ނިޒާމު ބައްޓަންވެފައިވީ ޒަމާނުގައި ދަރިވަރުންނަށް އުނގަންނައިދެވޭ މައިގަނޑު އަސާސަކީ ދުނިޔެއާއި ދުނިޔޭގައި ވާހައި އެއްޗެއް ހެއްދެވި ފަރާތަކީ اللَّهُ ސުބުޙާނަހޫވަތަޢާލާ ކަމާއި، އެފަރާތަށް އީމާންވުމާއި، މި ދުނިޔެއަކީ އަބަދަށް ދެމިތިބެވޭނެ ތަނެއްނޫންކަމާއި، ދުނިޔޭގައި އިންސާނާކުރާ ކޮންމެ ކަމަކާއި ބުނާކޮންމެ ބަހަކާމެދު އޭނާ މަސްއޫލުވާން ޖެހޭނެކަމާއި، މަރުވުމަށްފަހު ދުނިޔޭގައި އިންސާނާ ކޮށްފައިވާ ކަންކަމަށް އެކަށޭނަ ޖަޒާދެއްވާނެކަމާއި، ދިރިހުރުމުގެ މަޤްޞަދަކީ ތިމާގެ އުޚުރަވީ ޙަޔާތް ބާއްޖަވެރިވާނެ ގޮތުގެމަތިން އެންމެހައި ކަމެއް ތަރުތީބުކުރުން ކަމެވެ.
މީގެ ނަތީޖާއަކީ ތަޢުލީމުގެ އެންމެހައި މަރުޙަލާއެއްގައި އެކަށައެޅޭ ސިލަބަސްތައް މި ދެންނެވުނު މަޤްޞަދު ފުރިހަމަވާނެ ގޮތުން އެކަށަ އެޅުމެވެ. ދަރިވަރުގެ ޢުމުރާ ގުޅޭގޮތުން ކޮންމެ މާއްދާއެއް ކިޔަވައިދެމުންދާއިރުވެސް اللَّهُގެ އެއްކައުވަންތަކަމާއި، ހުރިހާއެއްޗެއް ނެތުމުގެ ތެރެއިން އުފެއްދެވީ އެކަލާނގެކަން ދަރިވަރުގެ ހިތުގައި ބިންވަޅުނަގައިދިނުމެވެ.
ތަޢުލީމީ ނިޒާމަށް ގެނެވިފައިވާ އަސާސީ ބަދަލާއެކުގައިމެ މިއަދުވެސް އަލްއަޒްހަރުފަދަ ބައެއް ތަޢުލީމީ އިދާރާގައި ކުރިއްސުރެ ހިފަހައްޓަމުންއަންނަ އުސޫލަށް ކޮންމެވެސް މިންވަރަކަށް ޢަމަލުކުރެވެމުންދެއެވެ. އެހެންކަމާއެކު ސައިންސާއި ޓެކްނޮލޮޖީގެ އެންމެހައި ފެކަލްޓީތަކުގައިވެސް މުޤައްރަރުގައި އިސްލާމީކުލަ ޖެހިފައިހުރުމުގެ ނަތީޖާއަކަށްވަނީ، މިސާލަކަށް ކެމިސްޓްރީގެ މާއްދާ ކިޔަވާ ދަރިވަރަށް ތަފާތު ކެމިކަލް މާއްދާތަކާއި އޭގެ އަސަރުތައް ދަސްވުމާއެކުގައިމެ އެ ތަފާތު މާއްދާތައް އުފެދިފައިވަނީ އަދި އޭގައި އެކުލެވިގެންވާ ތާސީރުތަކާއި ރިއެކްޝަންތައް އެކުލެވިގެންވަނީ އަމިއްލައަށް ނޫންކަމާއި،އެއީ ކުޅަދުންވަންތަ اللَّهُގެ ޙަޟުރަތުން އެ މާއްދާތަކުގައި ލައްވާފައިވާ ބާރާއި ތާސީރުކަން އެނގި އީމާންކަން އިތުރުވުމެވެ.
ޒަމާނީ ތަޢުލީމީ ނިޒާމުގެދަށުން އުނގެނިގެން ނުކުންނަ ދަރިވަރުންނަށް ކުދިންލިބި، އެކުދިން އަނެއްކާވެސް ސްކޫލްތަކަށް ދާންފަށާއިރު މައިންބަފައިންގެ ގޮތުގައްޔާއި މުދައްރިސުންގެ ގޮތުގައިވެސް ތިބެނީ ހަމަ އެއް ފެންއާރަކުން ކަރުހިއްކުން ފިލުވާފައިވާ މީހުންނެވެ. ނަތީޖާއަކަށް ވަނީ ކަންކަމުގެ ރަނގަޅު ނުރަނގަޅު ކަނޑައަޅާނެ މިންގަނޑު އޮޅުމެވެ. ނަމާދަށް ގޮވަގޮވައި އޮއްވާ ދަރިފުޅު ސްކޫލަށް ގެންގޮސް ދޫކޮށްލާއިރު ބެލެނިވެރިޔާގެ އެއްވެސް ކަންބޮޑުވުމެއް ނޯތުމެވެ. ސްކޫލްގެ ޕްރިންސިޕަލާއި މުދައްރިސުންވެސް ކަންބޮޑުވާތަން ނުފެނުމެވެ. ކަންމިހެން ހުރުމާއެކު މިއަދު މިވަނީ ދިރިއުޅުމުގެ މަޤްޞަދަކީ ކެއުންބުއިމާއި މަޖާކުރުން ނޫންކަން ގަބޫލުކުރާ މުވާޠިނަކު ބިނާކުރެވޭނެ ގޮތުގެމަތީގައި ތަޢުލީމީ ނިޒާމު އަލުން ބައްޓަންކޮށް އެކުލަވައިލުމުގެ ބޭނުން އިންތިހާއަށް ބޮޑުވެފައެވެ.
