ވަކި ޕާޓީއެއްގެ ޓިކެޓުގައި ރައްޔިތުންގެ މަޖިލީހަށް ހޮވިފައިވާ މެންބަރަކު ޕާޓީ ބަދަލުކޮށްފިނަމަ، ނުވަތަ ޕާޓީން ވަކިވެއްޖެނަމަ، ނުވަތަ ޕާޓީން ވަކިކޮށްފި ނަމަ، އެ މެންބަރެއްގެ ގޮނޑި ގެއްލޭނޭ ކަމަށް ދިވެހިރާއްޖޭގެ ސުޕްރީމް ކޯޓުން ދާދި ދެންމެއަކު ހުކުން ކޮށްފިއެވެ. މި ހުކުމަށް އަމަލު ކުރަން ފަށާނީ މިއަދުން ފެށިގެންނެވެ. މާނައަކީ މިއަދުގެ ކުރީން ވަކިވެފައިވާ މެންބަރެއްގެ މައްޗަކަށް މި ހުކުމެއް ނުހިނގާނެއެވެ.
ސުޕްރީމް ކޯޓުގެ ހުކުމުގައި ވާ ގޮތުގައި ރައްޔިތުންގެ ކުރިމައްޗަށް ވަކި ޕާޓީއެއްގެ ނަމުގައި ގޮސް ވައުދުވެ މަޖިލީހަށް ހޮވުމަށް ފަހު، އެ މެންބަރަކު އެހެން ޕާޓީއަކަށް ބަދަލު ވުމަކީ ރައްޔިތުންގެ މަސްލަހަތު ގެއްލޭނޭ ކަމެކެވެ. ޕާޓީން ވަކިވުމުގެ ސަބަބުން ގޮނޑި ގެއްލޭ މީހަކަށް، އެ ގޮނޑީގެ ބައި އިލެކްޝަނުގައި ބައިވެރި ވެވޭނޭ ކަމަށްވެސް ހުކުމުގައި ވެއެވެ.
މެންބަރުން ވަކިވުމާ ނުވަތަ ވަކި ކުރުމާ ބެހޭ ގާނޫނެއް ހެއްދެވުމަށްވެސް ސުޕްރީމް ކޯޓުން ވަނީ ކަމާ ބެހޭ އިދާރާތަކަށް އަމުރު ކޮށްފައެވެ. އަމިއްލައަށް މެންބަރަކު ވަކިވާން ބޭނުން ނަމަ ވަކި ވާނީ ވަކިވާން އެދި ސިޓީ ލުމުން އެ މެންބަރަކު އިލެކްޝަންސް ކޮމިޝަނުގެ ދަފުތަރުން އުނި ކުރީމާ ކަމަށްވެސް ހުކުމުގައި ވެއެވެ.
މި މައްސަލަ ދައުލަތުގެ ބަންޑާރަ ނާއިބު ސުޕްރީމް ކޯޓަށް ހުށަހެޅުއްވީމާ ރާއްޖޭގެ ބައެއް ގާނޫނީ ބޭފުޅުން ވިދާޅުވަމުން ގެންދެވީ ގާނޫނު އަސާސީއަށް ބަދަލު ނުގެނެސް މެންބަރަކު ވަކި ވާނޭ ގޮތްތައް ނުނިންމޭނޭ ކަމަށެވެ.
ޕީޕީއެމުން ވަނީ މި މައްސަލައަށް ތާއީދު ކޮށްފައެވެ. ޕާޓީއަށް ގެއްލުމެއް ވިޔަސް އެއީ ރަނގަޅު ގޮތެއް ކަމަށް ޕީޕީއެމްގެ ނާއިބު ރައީސް އަބްދުއްރަޙީމް ވަނީ ވިދާޅުވެފައެވެ.
