އެގާރަ ރަށެއްގައި ކުނީގެ ކަންތައްތައް ބެލެހެއްޓުމާ ގުޅޭ މަސައްކަތްތަކެއް ބަޔަކާ ހަވާލު ކޮށްފިއެވެ. މި މަސައްކަތުގެ ތެރޭގައި ހިމެނެނީ މިހާރުވެސް ހިނގަމުންދާ ބައެއް ކަންތައްތަކުގެ ފެންވަރު ރަނގަޅު ކުރުމާއި، ތަކެތި ހޯދުމެވެ.
މި މަޝްރޫއުގެ ދަށުން ގއ. ނިލަންދޫ ކުނި މެނޭޖްކުރާ މަރުކަޒު އަޕްގްރޭޑް ކުރުމަށް ހަވާލު ކުރީ ނޫމަސް ކޮންސްޓްރަކްޝަން ޕްރައިވެޓް ލިމިޓެޑާއެވެ. މި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ، އަލްފާޟިލް ޠާރިޤް އިބްރާހީމެވެ. އަދި ނޫމަސް ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖަރ، އަލްފާޟިލް އަހުމަދު ދީދީއެވެ.
މި މަސައްކަތުގެ ޖުމްލަ އަގަކީ 401,291.94 ދިވެހި ރުފިޔާއެވެ. އަދި މި މަސައްކަތް ނިންމުމަށް ހަމަޖެހިފައިވަނީ 40 ދުވަހުގެ ތެރޭގައެވެ.
މީގެ އިތުރަށް ހުވަދުއަތޮޅުގެ 10 ރަށަކަށް ކުނި މެނޭޖްކުރަން ބޭނުންވާ އިކުއިޕްމަންޓް ސަޕްލައިކޮށް ޑެލިވަރކުރުމަށް ބަޔަކާ ޙަވާލު ކުރިއެވެ. އޭގެ ތެރޭގައި ހިމެނޭ ރަށްތަކަކީ ގއ. މާމެންދޫ، ގއ. ދެއްވަދޫ، ގއ. ކޮނޑޭ، ގއ. ގެމަނަފުށި، ގދ. މަޑަވެލި ، ގދ. ހޯޑެއްދޫ، ގދ. ނަޑެއްލާ، ގދ. ގައްދޫ، ގދ. ފިޔޯރީ އަދި ގދ. ވާދޫއެވެ. މި މަސައްކަތް ޙަވާލުކޮށްފައިވަނީ ނިއޯމެޑް މޯލްޑިވްސް ޕްރައިވެޓް ލިމިޓެޑާއެވެ. މި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ، އަލްފާޟިލް ޠާރިޤް އިބްރާހީމެވެ. އަދި ނިއޯމެޑް ޕްރައިވެޓް ލިމިޓެޑްގެ ފަރާތުން މި މަސައްކަތުގެ އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ، އަލްފާޟިލް ހުސެއިން ރަޝީދެވެ.
މި މަސައްކަތުގެ ޖުމްލަ އަގަކީ 6,998,173 ދިވެހި ރުފިޔާއެވެ. އަދި މި މަސައްކަތް ނިންމުމަށް ހަމަޖެހިފައިވަނީ 140 ދުވަހުގެ ތެރޭގައެވެ.
