ކޮވިޑް- 19: ޓްރަމްޕް 'އިޝްތިހާރުކުރެއްވި' ބޭހެއް ކައިގެން އެމެރިކާ މީހަކު މަރުވެއްޖެ

އެމެރިކާގެ ރައީސު ޑޮނާލްޑް ޓްރަމްޕް ނޫސްވެރިންނާ ބައްދަލުކުރައްވަމުން ދެއްކެވި ވާހަކަފުޅެއްގައި މެލޭރިޔާއަށް ބޭނުންކުރާ ބޭހެއް ކަމުގައިވާ ކޮލޯރޯކުއިން އަކީ ނޮވެލް ކޮރޯނާ ވައިރަސް (ކޮވިޑް- 19) އަށް ވަރަށް ރަނގަޅު ބޭހެއް ކަމުގައި ވިދާޅުވެފައި ވަނިކޮށް އެ ބޭސް ބޭނުންކޮށްގެން އެމެރިކާގައި މީހަކު މަރުވެ އޭނާގެ އަނބިމީހާގެ ހާލު ވަރަށް ދެރަވެއްޖެއެވެ.

ފާއިތުވި ހުކުރު ދުވަހު ނޫސްވެރިންނާ ބައްދަލުކުރައްވަމުން ޓްރަމްޕް ވިދާޅުވީ ކޮލޯރޯކުއިން އަކީ "ގޭމުގެ ނަތީޖާ ބަދަލުކޮށްލާނެ" ބެހެއް" ކަމަށާ އެ ބޭހުން "ވަރަށް ވަރަށް އުއްމީދީ ނަތީޖާތަކެއް" ދައްކާފައިވާ ކަމުގައެވެ. އޭނާ ވަނީ އޭނާގެ މިވާހަކަފުޅު ހޮނިހިރު ދުވަހު ކުރެއްވި ޓުވީޓެއްގައި ވެސް ތަކުރާރުކުރައްވާފައެވެ.

މެލޭރިޔާއަށް ބޭނުންކުރާ މި ބޭހުން ކޮވިޑް- 19 ރަނގަޅުވާކަމުގެ ކަށަވަރުކުރެވޭ ހެއްކެއް ފެނިފައި ނުވާއިރު، އަދި މި ބޭސް ކޮވިޑް- 19 އަށް ބޭނުންކުރުމަށް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) ހުއްދަ ދީފައި ނުވާއިރު، ރައީސު ޓްރަމްޕް އެ ބޭހުން ކޮވިޑް- 19 އަށް ފަރުވާ ލިބޭ ވާހަކަ އާއްމުކުރެއްވުމުން އެމެރިކާގެ ގިނަ ބަޔަކު އެ ބޭސް ގަނެގެން ބޭނުންކުރަން ފަށާފައިވާ ކަމުގެ ޚަބަރު ލިބެއެވެ.

އެރިޒޯނާގެ ދެމަފިރިއަކު ކޮވިޑް- 19 އިން ސަލާމަތްވާނެ ކަމުގެ އުއްމީދުގައި ހޯމަ ދުވަހު ކޮލޯރޯކުއިން ފޮސްފޭޓް ބޭނުންކުރުމުން ފިރިހެން މީހާ މަރުވެފައި ވާއިރު، އަންހެން މީހާގެ ހާލު ދެރަވެގެން އޭނާއަށް ދަނީ ފަރުވާދެމުންނެވެ.

ރަނގަޅުވާނެ ކަމުގެ އުއްމީދުގައި އެމީހުން ބޭނުންކުރި ކ ކޮލޯރޯކުއިން އަކީ އިންސާނުން ބޭނުންކުރަން ތައްޔާރުކޮށްފައި ހުރި ބޭހެއް ނޫނެވެ. އެމީހުން ބޭނުންކޮށްފައި ވަނީ ކް ކޮލޯރޯކުއިން ގެ މާ ބާރުގަދަ ވައްތަރެކެވެ. އެއީ މަސްޓޭންކް ސާފުކުރަން ތައްޔާރުކޮށްފައި ހުރި އެއްޗެކެވެ.

އެންބީސީ ނިއުސްއާ ވާހަކަދައްކަމުން އެ ބޭސް ބޭނުންކުރި އަންހެން މީހާ ބުނީ އެމީހުން ރައީސު ޓްރަމްޕް ކްލޯރޯކުއިންއާ ބެހޭގޮތުން ދެއްކެވި ވާހަކަފުޅު އެމީހުން ޓީވީން ވަގުތުން ބެލިކަމަށާ، ބޭސް ބޭނުންކުރީ އެހެންވެގެން ކަމަށެވެ.

މިކަމާ ގުޅިގެން ރައީސު ޓްރަމްޕް އަށް އަމާޒުވާ ފާޑުކިޔުންތައް ދަނީ ގިނަވަމުންނެވެ.

ރައީސު ޓްރަމްޕް ވާހަކަފުޅާ ގުޅިގެން އެމެރިކާގެ ބޭސްފިހާރަތަކުން ކްލޯރޯކުއިން މިހާރު ވަނީ ހުސްވާން ފަށާފައެވެ.

ބައެއް ގައުމުތަކުގައި ކުރެވުނު ދިރާސާތަކުން ޒަމާނުއްސުރެ މެލޭރިޔާއަށް ބޭނުންކުރަމުން އައި ބޭހުން ކޮވިޑް- 19 އަށް ފަރުވާކުރެވިދާނެ ކަމުގެ އުއްމީދު ލިބުނު ނަމަވެސް، މުޅިން އެގޮތަށް ކަނޑައެޅޭ ވަރުގެ ނަތީޖާތަކެއް އަދި ލިބިފައި ނުވެެއެވެ.

އެމެރިކާގައި ހަލުވިކަމާއެކު ކޮވިޑް- 91 ފެތުރެމުން ދާއިރު، އެ ބަލި ޖެހުނު މީހުންގެ އަދަދު ވަނީ 54 ހާހަށް އަރާފައެވެ. އަދި މިބަލީގައި 778 މީހުން ވަނީ މަރުވެފައެވެ.