އަފްޣާނިސްތާނު ސަރުުކާރުން ހައްޔަރުކޮށްފައި ތިބި ޠާލިބާން ހަނގުރާމަވެރިންގެ ތެރެއިން 1500 މީހުން ދޫކުރުމެގެ ގަރާރެއްގަައި ރައީސު އަޝްރަފު ޣަނީ ސޮއިކުރައްވައިފިއެވެ. ޠާލިބާން ޖަމާއަތާ ސަރުުކާރާ ދެމެދު ހިނގަމުން އަންނަތާ 18 އަަހަރުވީ ހަނގުރާމަ ހުއްޓުމަށްޓަކައި ދެ ފަރާތުގެ ދެމެދުގައި ސީދާ ވާހަކަަތައް ފެށުމުގެ ކުރިން، ޠާލިބާން ޖަމާއަތުގެ ހަނގުރާމަވެރިން ދޫކޮށްލުމަކީ އެ ޖަމާއަތުގެ ޝަރުޠެކެވެ.
ރައީސު އަޝްރަފު ޣަނީގެ ތަރުޖަމާނު ޞަދީޤު ޞިއްދީޤީ ވިދާޅުވި ގޮތުގައި، ޠާލިބާން ޖަމާއަތުން ދޭ ހަމަލާތައް ހުއްޓާލައި، ހަރުކަށި އަމަލުތައް މަދުކޮށްފިނަމަ، އެކި ފަހަރުމަތިން ދޫކޮށް، ސަރުކާރުން ހައްޔަރުކޮށްފައި ތިބި ޠާލިބާން ހަނގުރާމަވެރިންގެ 5000 މީހުން ދޫކޮށްލާނެއެވެ.
ޠާލިބާން ޖަމާއަތުގެ ތަރުޖަމާނު ސުހައިލް ޝާހީން ވިދާޅުވި ގޮތުގައި އެ ޖަމާއަތުން ވަނީ 5000 ހަނގުރާމަވެރިންގެ ލިސްޓެއް ސަރުކާރާ ހަވާލުކޮށްފައެވެ.
އޭނާ އިތުރަށް ވިދާޅުވި ގޮތުގައި، ހޮނިހިރު ދުވަހު 1500 މީހުން ދޫކޮށްލުމަށް ފަހު، ސުލްހައިގެ ސީދާ މަޝްވަރާތައް ފަށުމުން ބާކީ ތިބި 3500 މީހުން ދޫކުރާނެއެވެ.
ރައީސު ޣަނީ ސޮއިކުރައްވާފައިވާ ދެ ސަފުހާގެ ގަރާރުގައި ވާތުން ދޫކޮށްލާ ކޮންމެ ހަނގުރާމަވެރިއަކުވެސް "ހަނގުރާމައިގެ މައިދާނަށް އެނބުރި ނުދާނެކަމަށް ޖާމިނުވެ" ލިއުމެއްގައި ސޮއިކުރަން ޖެހޭނެއެވެ.
ޠާލިބާން ހަނގުރާމަވެރިން ދޫކޮށްލުމަކީ އެމެރިކާއާއީ ޠާލިބާން ޖަމާއަތާ ދެމެދު ސޮއިކުރި ސުލްހައިގެ އެއްބަސްވުމުގައި ހިމެނޭ ބައެކެވެ. ރައީސު ޣަނީ ވަނީ ކުރިން އެކަމާ ދެކޮޅު ހައްދަވާފައެވެ. ނަަމަވެސް އާ ދައުރަކަށް ރައީސުކަމުގެ ހުވައިކުރެއްވުމާއެކު އޭނާ މިވަނީ ސިޔާސަތު ބަދަލުކުރައްވައި، ސުލްހައިގެ އެއްބަސްުވުމާ އެއް ގޮތަށް ކުރިއަށް ވަޑައިގަންނަވަން ނިންމަވާފައެވެ.
ފާއިތުވި 18 އަހަރުގެ ތެރޭގައި އަފްޣާނިިސްތާނުގެ ދާޚިލީ ހަނގުރާމައިގައި 1 ލައްކަ 11 މީހުން މަރުވެފައި ވެއެވެ. އޭގެތެރެއިން 31 ހާސް މީހުންނަކީ އާއްމުންނެވެ.
