ކުރިޔަށް އޮތް ލޯކަލް ކައުންސިލް އިންތިޚާބު ދިވެހި ރައްޔިތުންގެ ޕާޓީ (ޑީއާރުޕީ) އިން ނަގާނެ ކަމަށް އެ ޕާޓީގެ ލީޑަރު، އަދި ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ރައްޔިތުންގެ މަޖިލީހުގައި މިއަދު އޮތް 2020 ގެ ބަޖެޓްގެ ބަހުސްގައި ވާހަކަ ދައްކަވަމުން ޖާބިރު ވިދާޅުވީ ކައުންސިލް އިންތިޚާބު ޑީއާރުޕީން "ފުންކޮށް" ނަގާނެ ކަމަށެވެ.
"އަޅުގަނޑު މިހުރީ ޕާޓީއެއްގެ ލީޑަރަކަށް. އަޅުގަނޑުމެންގެ ޕާޓީ ބޮޑުވާނެ. އަޅުގަނޑު ބޭނުމެއްނޫން ޕާޓީއަށް މެމްބަރުން ވައްދާކަށް މިތާ ރައްޔިތުންގެ މަޖިލީހަށް. ރައީސް ވިދާޅުވީ ޕާޓީއަށް މެމްބަރުން ވަންނަންޖެހޭނީ ހޮވައިގެންނޭ އަޅުގަނޑުމެންގެ ޕާޓީއަށް މީހުން ނަގާއިރު. ކައުންސިލް ފުންކޮށް ނަގާނަން ޑީއާރުޕީ މިފަހަރު. މިބުނީނު ނަގާނަމޭ" ޖާބިރު ވިދާޅުވިއެވެ.
ކައުންސިލް އިންތިޚާބު ޑީއާރުޕީން ކާމިޔާބު ކުރާނެ ކަމަށް ވިދާޅުވަމުން ޖާބިރު ވަނީ ސަރުކާރުން ހުށަހަޅާފައިވާ 2020 ގެ ބަޖެޓްވެސް އޭނާއަށް ކަމުނުދާ ކަމަށެވެ.
ޖާބިރު ވިދާޅުވީ ދައުލަތުން ހުށަހަޅާފައި އޮތް ބަޖެޓް އޭނާއަށް ކަމުނުދާތީ ބަޖެޓަށް ވޯޓުވެސް ނުދެއްވާނެ ކަމަށެވެ. ރާއްޖެ ރަނގަޅު ކުރަންޖެހޭ ކަމަށެވެ. އަދި ކުޑަ ސަރުކާރެއް "އޮޕަރޭޓްކޮށް" ވަޒީރުންގެ މަޖިލީހާއި، ހުރިހާ މުއައްސަސާތައްވެސް ކުޑަ ކުރަންޖެހޭ ކަމަށާއި، އެކަންކަން ނުކޮށް ބަޖެޓަށް ވޯޓު ދެވެން ނެތް ކަމަށް ވިދާޅުވިއެވެ. އޭނާ ވިދާޅުވީ ކާށިދޫގައި އެއާރޕޯޓެއް އަޅަން ބަޖެޓުގައި އެކަން ހިމަނަން ދެންނެވި ކަމަށާއި، ނަމަވެސް ބަޖެޓުގައި އެކަން ނެތް ކަމަށް ވިދާޅުވިއެވެ.
ޖާބިރު ވިދާޅުވީ ރާއްޖޭގެ ކުންފުނިތަކުގެ ތެރެއިން އެންމެ ބޮޑު ގެއްލުމެއްވެސް ވެފައިވަނީވެސް އޭނާގެ ކުންފުންޏަށް ކަމަށާއި، ނަމަވެސް ދައުލަތުން "އެންމެ ލާރިއެއްވެސްނުދޭ" ކަމަށެވެ.
"އެއީ ކީއްވެގެންތޯ. އަޅުގަނޑު ކަޅުވީމަތޯ. ދެން ތިބި މީހުން ދޮންވީމަތޯ" ޖާބިރު ވިދާޅުވިއެވެ.
ޖާބިރު ވިދާޅުވީ ބަޖެޓަށް ބަހުސް ކުރައްވަންވެސް މަޖިލީހުގެ މެމްބަރުންނަށް ދަސްކޮށްދޭން އެބަޖެހޭ ކަމަށެވެ. އަދި ބަޖެޓަށް ބަހުސް ކުރާގޮތަކީ "ޗުކުޗުކު ލެއްވުން" ކަމަށްވެސް އޭނާ ވިދާޅުވިއެވެ. އޭނާ ވިދާޅުވީ 2020 އަށް ދައުލަތުން ހުށަހެޅީ ބަޖެޓަކީ ރާއްޖޭގެ "ހަލާކު" ކަމަށެވެ.
"އަދިވެސް އިންކަމް ޓެކްސްއާ އޭތިމީތި ނަގާ ވާހަކަ މިދައްކަނީ. ފުރަތަމަ ކަމަކީ އަޅުގަނޑުމެންނަކީ ލިބޭ ލާރި ބެންކަށް ލާ ބަޔެއްނޫން. އެހާރަނގަޅަށް ހިސާބު ބަލަހައްޓާ ބަޔެއްނޫން. މުސާރަ ލިބޭއިރު މިއޮންނަނީ ކަންމަތީ ފިހާރައަށް ދަރާފައި" ޖާބިރު ވިދާޅުވިއެވެ.
އޭނާ ވިދާޅުވީ ބަޖެޓު ހުށަހަޅައިގެން ބޭނުންހާ އެއްޗެއް ހެދިދާނެ ކަމަށާއި، ރައީސް ނަޝީދަށް މަޖިލީހުގެ މެޖޯރިޓީ ލިބި، ރައީސް ސޯލިޙު ބޭނުންފުޅުހާ އެއްޗެއް ހަދަން ފުރުޞަތު ލިބުމުން އެގޮތަށް ހަދައިފިނަމަ "ގޮޅިޔަށް" ދާންޖެހޭކަން ހުރިހާ ރައީސުންނަށްވެސް ސާފުވާންޖެހޭނެ ކަމަށެވެ.
