ރާއްޖޭގެ ފުލުހުންގެ އެންމެ އިސްވެރިންނާއި، ސިފައިންގެ އެންމެ އިސްވެރިންނަށް ކުރީގެ ހޯމް މިނިސްޓަރު އަދި ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ޙަސަން އަފީފު ވަރަށް ބޮޑަށް ނުރުހުން ފާޅު ކުރައްވައިފިއެވެ.
ށ. މާއުނގޫދޫއަށް ބަޔަކު އަރައި އައިސިސްގެ ދިދަ ނެގި މައްސަލަ އާއި 13 އަހަރުގެ އަންހެން ކުއްޖަކާއެކު "ކައިވެނިކޮށްގެން" ކަމަށް ބުނެ ޖިންސީ ގުޅުން ހިންގި މައްސަލައިގައި މަޖިލީހަށް މިއަދު ހުށަހެޅި ކުއްލި މައްސަލައިގެ ބަހުސްގައި އަފީފުގެ ނުރުހުން ސިފައިންނާއި ފުލުހުންގެ އެންމެ އިސްވެރިންނަށް އަމާޒު ކުރެއްވީ އެފަދަ ކަންކަން ހުއްޓުވަން ސަލާމަތީ އިދާރާތަކުން ފަރުވާ ކުޑަކޮށްފައިވާ ކަމަށް ވިދާޅުވެއެވެ.
އަފީފު ވިދާޅުވީ އެއީ ކަންބޮޑުވާންޖެހޭ ކަމެއް ކަމަށާއި، ދިވެހިރާއްޖޭގެ އަމާންކަން ގާއިމް ކުރުމުގެ ކަންތައް ޙަވާލު ކުރެވިފައިވާ މުއައްސަސާ ތަކުގެ ފަރާތުން މިފަދަ މައްސަލަތައް އެއްވެސް ކަމަކަށް ނުހަދައި، އަޅާނުލައި ތިބުމަކީ ރައްޔިތުންގެ ރައްކާތެރިކަމާއި، މިނިވަން ކަމަށް އޮތް ވަރަށް ބޮޑު ނުރައްކަލެއް ކަމަށެވެ.
ރައްޔިތުންގެ މަޖިލީހުން ފާސްކުރާ ޤާނޫނުތައް، ރައީސުލްޖުމްހޫރިއްޔާ ތަސްދީގު ކުރެއްވުމަށް ފަހު އެ ޤާނޫނުތައް އެއީ ޤާނޫނެއް ކަމަށް ނުބަލައި، ހަމައެކަނި ވަކިބަޔަކު އެމީހުންނަށް ފެންނަ ގޮތް އެއީ ޤާނޫނު ކަމަށް ދެކި ކަންތައް ކުރަމުން ދާއިރުގައި ފުލުހުންނާއި އަދި ފުލުހުންގެ މުއައްސަސާ ހިންގުމާއި ހަވާލުވެ ހުންނެވި އެންމެ އިސްވެރިޔާ ހުންނެވީ "ނިދާފަތޯ" ސުވާލު ކުރަން ބޭނުން ކަމަށް އަފީފު ވިދާޅުވިއެވެ.
އަފީފު ވިދާޅުވީ ދިވެހި ފުލުހުންނާ މަތިކޮށްފައި އޮތީ ދިވެހި ރާއްޖޭގެ ރައްޔިތުންގެ ފުރާނަ އާއި މުދާ ރައްކާތެރި ކުރުން ކަމަށެވެ.
"އެއްގޮތަކަށްވެސް އެއީ ލޯގޯއެއްގެ ގޮތުގައި އެމީހުން ތަނެއްގައި ބޯޑެއްގައި ލިޔެގެން ތިބޭކަށްނޫން. ދިވެހި ފުލުހުން މިއަދު މިތިބީ ފެއިލް ވެފައި. ދިވެހި ފުލުހުންގެ އިސްވެރިޔަކަށް ހުންނެވި ދިވެހި ރާއްޖޭގެ ހޯމް މިނިސްޓަރު މިއަދު މި މަޖިލީހަށް ހާޒިރުކޮށް މިކަންތައް ކީއްވެގެންތޯ އަޅާނުލާ ދޫކޮށްލާފަ މިއޮތީ. އަޅުގަނޑުމެން އެބަޖެހޭ ސުވާލު ކުރަން. އިއްޒަތްތެރި މިނިސްޓަރަށް މިކަންތައް ނުކުރެވޭ ކަމަށް ވަންޏާ އެހެން މީހަކު އެމަގާމަށް އަޅުގަނޑުމެން އެބަޖެހޭ ހަމަޖައްސަން" އަފީފު ވިދާޅުވިއެވެ.
އަފީފު ވަނީ ދިވެހި ސިފައިންނާއި ފުލުހުންގެ އެންމެ އިސްވެރިންނަށް ރައްޔިތުންގެ ރައްކާތެރިކަން ކަށަވަރު ނުކުރެވޭ ކަމަށް ވަންޏާ، ޤާނޫނަށް ބަދަލު ގެނެސްގެން ވިޔަސް އެ ދެ މުއައްސަސާގެ އެންމެ އިސްވެރިންގެ މަގާމަށް އެހެން ބަޔަކު މަޖިލީހުން ލާންޖެހޭ ކަމަށްވެސް ވިދާޅުވެފައެވެ.
"ދިވެހި ރާއްޖޭގެ ފުލުހުންނާއި އަދި ސިފައިންގެ އެންމެ އިސްވެރިންނަށް ތިބި ފަރާތްތަކަށް ދިވެހި ރާއްޖޭގެ ރައްކާތެރިކަމާއި، ދިވެހި ރާއްޖޭގެ ޤާނޫނުތައް ރައްކާތެރި ނުކުރެވޭ ކަމަށް ވަންޏާ، ދިވެހި ރާއްޖޭގެ ޤާނޫނު އަސާސީ ނުހިންގޭ ކަމަށް ވަންޏާ، އަޅުގަނޑުމެންޖެހޭ ޤާނޫނަށް ބަދަލު ގެނެސްގެންވެސް މި މަޖިލީހުން އެތަނަށް އެ މަސައްކަތް ކުރާނެ ބަޔަކުލާން" އަފީފު ވިދާޅުވިއެވެ.
