ރައީސް އިބްރާހިމް މުޙަންމަދުގެ ސޯލިހާއި ކޯލިޝަނުގައި ހިމެނޭ ކުރީގެ ރައީސް މައުމޫން އަބްދުލްގަތްޔޫމް އާއި ޖުމްހޫރީ ޕާޓީގެ އިތުރުން ރާއްޖޭގެ ބޮޑެތި ވިޔަފާރިވެރިންނަށްވެސް ކާށިދޫ ދާއިރާގެ މެމްބަރު އަބްދުﷲ ޖާބިރު ބަހުގެ ހޫނު ހަމަލާތަކެއް މިއަދު ދެއްވައިފިއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި ސަރުކާރުން މަޖިލީހަށް ހުށަހެޅި ޓެރަރިޒަމްގެ ޤާނޫނަށް އިސްލާޙު ގެނައުމުގެ ބިލު މަޖިލީހުގެ ސަލާމާތާއި ޚާރިޖީ ގުޅުންތަކާބެހޭ ކޮމިޓީން ދިރާސާކުރި ރިޕޯޓުގެ ބަހުސްގައި ޖާބިރުގެ ރުޅި ސަރުކާރު ކޯލިޝަނުގެ ލީޑަރުންނާއި ރައީސް ސޯލިޙަށް އަމާޒު ކުރެއްވީ ބަހުސްގައި ނެންގެވި ނިޒާމީ ނުކުތާއެއްގެ ތެރެއިންނެވެ.
ބަހުސްގައި ޖާބިރު އެންމެ ފުރަތަމަ ވާހަކަފުޅު ދެއްކެވިއިރު ރައީސް ސޯލިޙަށް ވަރަށް ބޮޑަށް ތައުރީފުވެސް ކުރެއްވިއެވެ. ނަމަވެސް އޭގެފަހުން މަރަދޫ ދާއިރާގެ މެމްބަރު އިބްރާހިމް ޝަރީފް ވާހަކަ ދައްކަވަން ހުންނަވަނިކޮށް ޖާބިރު ކުއްލިއަކަށް ނެންގެވި ނިޒާމީ ނުކުތާއެއްގައި ރައީސް ސޯލިޙަށް އޭގެކުރިން ކުރެއްވި ތައުރީފުގެ ބަސްތަކުގެ ބަދަލުގައި އޮއްސާލެއްވީ ބަހުގެ ހޫނު ހަމަލާތަކެކެވެ.
ރައީސް ސޯލިޙަށް ތައުރީފު ކުރައްވައި ޖާބިރު ފުރަތަމަ ވިދާޅުވީ ރައީސް ސޯލިހުގެ ކުރިން ރާއްޖޭގެ ވެރިކަން ކުރެއްވި އެއްވެސް ރައީސަކަށް އިތުބާރު ނުކުރައްވާ ކަމަށާއި ޓެރަރިޒަމްގެ ޤާނޫނަށް ސަރުކާރުން ގެނައި އިސްލާހު ތަކަށް އޭނާ ތާއީދު ކުރައްވަނީ ރައީސް ސޯލިހަށް އިތުބާރު ކުރައްވާތީ ކަމަށެވެ.
އެއަށްފަހު ޖާބިރު ވަނީ ރައީސް މައުމޫނާ ދެކޮޅަށް އޭނާ ކޯޓަށް ވެއްދި ފައިސާގެ މައްސަލަގައި ކޯޓަށް ވަޑައިނުގަންނަވަން ވެގެން މައުމޫން ފިއްލަވައިފި ކަމަށްވެސް ވިދާޅުވެ މައުމޫނާއި ބަޔެއް އެހެން ބޭފުޅުންނަށްވެސް ބަހުގެ ހޫނު ހަމަލާތަކެއް ދޫކުރައްވާފައެވެ.
"ރައީސުލްޖުމްހޫރިއްޔާއަކަށް ހުންނަ މީހަކުވެސް މީހަކު އަތުން ލާރި ނަގައިފި ކަމަށް ވަންޏާ ހެއްކެތް ނެތޭ ކިޔައި، އެ ލާރި ނުދީ ހުރެވިއްޖިއްޔާ އެ މައްސަލަ ބެލޭނެ، އެއަށް ކިޔާނީ ޓެކުމާއި ފޭރުމާއި ވައްކަން ކުރުން، ރައީސް މައުމޫނު ފިލާ ރައްކާ ވެއްޖެ މިހާރު، ފުލުސް އޮފީހަށް ހާޒިރުނުވާން، އެވެސް ޓެކުމާއި ފޭރުމާއި ވައްކަން ކުރުން، އެ ވެސް ޓެރަރިޒަމްގެ ހަރަކާތެއް" ޖާބިރު ވިދާޅުވިއެވެ.
ރައީސް މައުމޫނާއި ބަޔެއް އެހެން ބޭފުޅުންނަށްވެސް އަމާޒުވާ ގޮތަށް ޖާބިރު ވިދާޅުވީ "ނުލާހިކު ބުރަ މަސައްކަތް މީހަކު ކޮށްގެން" ހޯދި ފައިސާ ޚަރަދުކޮށް ވެރިކަމަށް ވަޑައިގަނެވުން މަކަރާއި ހީލަތް ހަދައި "ދޯކާ ދިނުމަކީވެސް" ޓެރަރިޒަމް ކަމަށެވެ.
"އެބައި މި ޤާނޫނުގައި އިންނާނެތާ، މިއަދު ޤާނޫނު ފާސްވީމާ އޮޕަރޭޝަނަށް އަންނާނެ ނޫންތޯ އިއްޒަތްތެރި ރައީސް" ޖާބިރު ވިދާޅުވިއެވެ.
އެއަށްފަހު ޖާބިރު ދެން ބަހުގެ ހަމަލާތައް އަމާޒު ކުރައްވަން ފެއްޓެއްވީ ދިވެހި ވިޔަފާރިވެރިންނަށެވެ.
"އަދި ވިޔަފާރިވެރިންގެ ތެރެއިން އެ ލާރިން އަޅުގަނޑު ދިން ލާރި ނަގާފައި އެއަށްވެސް މަކަރު ހެދީ، އެވެސް ޓެކުމާއި މަކަރު ހެދުން، އެމީހުންވެސް މިތާ އެބަތިބި މަޖިލީހުގައި، މިއަދު ރާއްޖޭގެ ވެރިކަމުގައި ތިބި މީހުންނަށް އެނގެންވީ މީހަކު އަތުން ލާރި ފޭރިގެންފައި ފަހުން ހެއްކެތްނެތޭ ބުނާއިރު ހެކި އޮންނާނެ އެމީހާ އަތުގައި،" ޖާބިރު ވިދާޅުވިއެވެ.
އެ ވާހަކަ ތަކަށް ފަހު ޖާބިރުގެ ރުޅިގަނޑު ސަރުކާރު ކޯލިޝަނާއި ރައީސް ސޯލިހަށް ދޫކޮށްލެއްވީ އެއްވެސް މެމްބަރަކު ބަހުސްގައި ޖާބިރަށް އަމާޒު ކުރައްވައި ރައްދެއް ދެއްވައިގެނެއްވެސް ނޫނެވެ. އެހެންވެ ކުއްލިއަކަށް ޖާބިރުގެ ރުޅިގަނޑު ރައީސް ސޯލިހާއި ސަރުކާރު ކޯލިޝަނަށް އޮއްސާލެއްވި ސަބަބެއް މަޖިލީހުގައި ކުރިޔަށްދިޔަ ބަހުސްއަކުންވެސް އަދި ބަހުސް ކުރަމުންދިޔަ ބިލަކުންވެސް ނުފެނެއެވެ.
ކުއްލިއަކަށް ނެންނެގި ނިޒާމީ ނުކުތާއެއްގައި ޖާބިރު ވިދާޅުވީ ސަރުކާރު ކޯލިޝަނެއް ނެތް ކަމަށް މިއަދު އޭނާ އިއުލާނު ކުރައްވާ ކަމަށެވެ. އެހެންނޫނީ ރައްޔިތުންގެ މަޖިލީހަށް ވަޑައިގެން ކޯލިޝަނަކީ ކޮބައިކަން ރައީސް ސޯލިޙު ސާފުކޮށް ދެއްވަން ޖެހިވަޑައިގަންނަވާނެ ކަމަށް ވިދާޅުވިއެވެ.
"ކޯލިޝަން ނެތް ކަމަށް މިއަދު އިއުލާން ކުރަން، އެހެން ނޫނީ މަޖިލީހަށް ވަޑައިގެން ރައީސް ސޯލިޙު ވިދާޅުވާން އެބަޖެހޭ ކޮބައިތޯއޭ ކޯލިޝަނަކީ، ކާކު ހަދައިގެން އުޅޭ ކޯލިޝަނެއްތޯ" ޖާބިރު ވިދާޅުވިއެވެ.
ކޯލިޝަނެއް ހެދޭނެ އެއްވެސް ޤާނޫނެތްވެސް ނެތް ކަމަށާއި އެހެންވެ ކޯލިޝަނެއް ނެތް ކަމަށް ތަކުރާރުކޮށް ޖާބިރު ވިދާޅުވަމުން ގެންދެވިއެވެ.
"ޤާނޫނު އަސާސީގައި ދުވަހަކުވެސް ނެތް ކަމެއް ހަދައިގެން މިއުޅެނީ ކީއްވެތޯ ރައީސް އަރިހުން ސުވާލު ކުރަން، ޖޭޕީއަށްވެސް ބައި އަޅައިގެން ރައީސް މައުމޫނަށްވެސް ބައި އަޅައިގެން، ނެތް ކޯލިޝަނަކަށް ބައި އަޅައިގެން މިކަމެއް ނުވާނެ، ވޯޓު ދިނީ ރައީސް އިބްރާހިމް މުޙަންމަދު ސޯލިހަށް" ޖާބިރު ވިދާޅުވިއެވެ.
ޖާބިރުގެ ރުޅިގަނޑު ރައީސް ސޯލިހާއި ކޯލިޝަނުގެ ދެ ލީޑަރުންގެ ތެރެއިން މައުމޫނާއި ގާސިމް އިބްރާހިމްއަށް އަމާޒު ކުރެއްވުމަށްފަހު ކުއްލިއަކަށް ދެން ފެއްޓެވީ އެމްޑީޕީގެ ޕީޖީ ލީޑަރު އަލީ އާޒިމަށް ތައުރީފު ކުރައްވާށެވެ.
"އެމްޑީޕީ ޕީޖީ ގުރޫޕުގެ ލީޑަރަށް އަޅުގަނޑު ސެލިއުޓް ނަގަން، ސާބަހޭ މަނިކުފާނު، ބާރަށް ބާރަށް ބާރަށް ގައުމާއިގެން ކުރިޔަށްދާނީ، މި މަޖިލީހަށް އައިސް ރައީސް ވިދާޅުވާން އެބަޖެހޭ ކޮން ޤާނޫނެއްގެ ދަށުންތޯ ކޯލިޝަން ހަދާފަ އޮތީ، ނޯންނާނެ ޤާނޫނެއް. އައްސަލާމް އަލައިކުމް، އެއީ ނިޒާމާބެހޭ ކަމަކީ" އިށީންނަވަމުން ޖާބިރު މަޑުމަޑުން ވިދާޅުވިއެވެ.
ޖާބިރު އިށީންނެވުމުން މަޖިލީހުގެ ރިޔާސަތުން ނައިބު ރައީސް އީވާ އަބްދުﷲ ވިދާޅުވީ ޖާބިރު ނެންގެވީ "ނިޒާމާބެހޭ މައްސަލައެއްގެ ގޮތުގައި ބަލައިގަނެވޭނެ އެއްވެސް ގޮތެއް ނެތް" ކަމަށެވެ.
