އިސްލާމިކް މިނިސްޓްރީން އެކުލަވާލާ ފަގީރުންގެ ދަފްތަރުގައި ޖެއްސުމަށް މާލެއިން އެދުނު ފަރާތްތަކަށް ޖަވާބު ދޫކުރަން މިއަދު ފަށައިފިއެވެ.
އިސްލާމިކް މިނިސްޓްރީން ބުނީ ފަގީރުންގެ ދަފްތަރު އަލުން އެކުލަވާލުމަށް އެ މިނިސްޓްރީން ހުޅުވާލި ފުރުޞަތުގައި ދަފްތަރުގައި އެދުމަށް ފޯމު ހުށަހެޅި ފަރާތްތަކަށް މިއަދު ހެނުނު 9 ޖެހިއިރު މިނިސްޓްރީން ޖަވާބު ދޫކުރަން ފަށާފައިވާ ކަމަށެވެ. މިނިސްޓްރީން މިއަދު ހެނދުނު 9 ން ފެށިގެން މެންދުރު ފަހު 1 ޖަހަންދެން ޖަވާބު ދޫކޮށްފައި ވަނީ އިސްލާމީ މަރުކަޒުގެ ހޯލުގައެވެ.
މިނިސްޓްރީން ބުނީ މިއަދު ހޯލުގައި ޖަވާބު ދޫކުރި ނަމަވެސް ދެން ޖަވާބު ދޫކުރާނީ މިނިސްޓްރީގެ ރިސެޕްޝަނުން ކަމަށެވެ. އެހެންވެ މާދަމާއިން ފެށިގެން މިނިސްޓްރީގެ ރިސެޕްޝަނަށް އައުމުން ޖަވާބު ލިބޭގޮތަށް ހަމަޖައްސާފައިވާއިރު ދަފްތަރުގައި ޖައްސަން ފޯމު ހުށަހެޅި ފަރާތްތަކުން ޝަކުވާ ހުށަހެޅުމުގެ ފުރުޞަތުވެސް މިއަދު މިނިސްޓްރީން ވަނީ ހުޅުވާލާފައެވެ.
ފަގީރުންގެ ދަފްތަރުގައި ޖައްސަން މާލެއިން އެދުނު މީހުންގެ ތެރެއިން ޝަކުވާ ހުށަހަޅަން ބޭނުންވާ ފަރާތްތަކުން މިމަހުގެ 15 ން 17 ވަނަ ދުވަހު ހެނދުނު 8 ން މެންދުރު ފަހު 1 ޖަހަންދެން އެ ފުރުޞަތު އިސްލާމިކް މިނިސްޓްރީން ވަނީ ހުޅުވާލާފައެވެ. ޝަކުވާ ހުށަހަޅަން ޖެހެނީ ސިޓީއަކުންނެވެ.
މާލޭގައި އުޅޭ މީހުންގެ ފަގީރުންގެ ދަފްތަރެއް މިނިސްޓްރީން އެކުލަވާލުމަށް ހުޅުވާލި ފުރުޞަތުގައި ގިނަ އަދަދެއްގެ ބަޔަކު ފަގީރުންގެ ދަފްތަރުގައި އެދުމަށް ފޯމު ހުށަހެޅި ނަމަވެސް މިނިސްޓްރީން ބަލާ ބެލުންތަކަށް ބަލައި ލިސްޓުގައި އެމީހަކު ޖައްސާނީ މިނިސްޓްރީންނެވެ. ފަގީރުންގެ ލިސްޓުގައި ޖެއްސުމަށް މާލެއިން އެދި ފޯމު ހުށަހެޅި މީހުންގެ ޖުމްލަ އަދަދު އަދި މިނިސްޓްރީން ހާމައެއް ނުކުރެއެވެ.
