ދުނިޔޭގެ އެންމެ ބޮޑު ޖަންގަލި، އެމޭޒަންގައި ރޯވެފައިވާ އަލިފާންގަނޑުތައް ނިއްވާލުމުގެ މަސައްކަތަށް އެހީގެ ގޮތުގައި ޖީ-7 ގެ ގައުމުތަކުން ދޭން ނިންމި އެހީ ގަބޫލުނުކުރާނެ ކަމަށް ބްރެޒީލުން ބުނެފިއެވެ. ބްރެޒީން ސަރުކާރު އިސް އޮފޝަލަކު ވިދާޅުވީ ފްރާންސުގެ ރައީސު އިމާނުއެލް މެކްރޯން "އޭނާގެ އަމިއްލަ ގައުމާއި، އެ ގައުމުގެ އިސްތިއުމާރުގެ ދަށުގައިވާ ތަންތަނާ" އަޅާލެއްވިއްޔާ މާ ރަނގަޅުވާނެ" ކަމުގައެވެ.
"(ޖީ-7 ގެ ހުށަހެޅުމުގެ) އަގު އަހަރުމެން ވަޒަންކުރަން. އެހެން ނަމަވެސް ޔޫރަޕްގެ ޖަންގަލީތަކުގައި އަލުން ގަސް ހެއްދުމަށް އެ ވަސީލަތްތައް ބޭނުންކުރުން މާ ރަނގަޅުވާނެ." ބްރްޒިލްގެ ރައީސު ޖައިރް ބޮލްސޮނާރޯގެ ޗީފް އޮފް ސްޓާފް އޮނިކްސް ލޮރެންޒޯނީ ވިދާޅުވިއެވެ.
ފްރާންސް، ޖަރުމަނު، އިޓަލީ، ޖަޕާން، ކެނެޑާ، އިނގިރޭސިވިލާތް އަދި އެމެރިކާ ހިމެނޭ ޖީ-7 ގެ އެންމެ އިސްވެރިންގެ ބައްދަލުވުން ނިންމަވާލައްވަމުން ފްރާންސުގެ ރައީސު އިމާނުއެލް މެކްރޯން ވިދާޅުވީ އެމޭޒަން ޖަންގަލީގައި ރޯވެފައިވާ އަލިފާން ނިއްވާލުމުށް ދެވޭ އެހީއެއްގެ ގޮތުގައި 22 މިލިއަން އެމެރިކާ ޑޮލަރު ދިނުމަށް ނިންމާފައިވާ ކަމުގައެވެ.
ބްރެޒިލްގެ ތިމާވެށްޓާ ބެހޭ ވަޒީރު ރިކާޑޯ ސަލެސް ކުރިން ވިދާޅުވީ އެމޭޒަންގެ 2.3 މިލިއަން އޭކަރުގައި ރޯވެފައިވާ އަލިފާން ނިއްވާލުމަށް ޖީ-7 އިން ދޭ އެހީއަށް ބްރެޒިލް މަރުހަބާ ކިޔާ ކަމުގައެވެ.
އެހެންނަމަވެސް، އޭނާ ފަހުން ރައީސު ޖައިރު ބޮލްސޮނާރޯއާ ބައްދަލުކުރެއްވުމަށް ފަހު ބްރެޒިލްގެ ސަރުކާރުގެ ވިސްނުން ވަނީ ބަދަލުވެފައެވެ.
"ބްރެޒިލަކީ ޑިމޮކްރެޓިކް މިނިވަން ގައުމެއް. ބްރެޒިލުން ދުވަހަކުވެސް އަނެކުން އަޅުވެތިކުރުމާއި، އިސްތިއުމާރުކުރުން ފަދަ ކަމެއް ކޮށްފައި ނުވޭ. ފްރާންސްގެ މެކްރޯންގެ މަގްސަދަކީ އެއީ ކަމަށް ވެދާނެ." ޗީފް އޮސް ސްޓާފް ލޮރެންޒޯނީ ވިދާޅުވިއެވެ.
ބްރެޒިލް ސަރުކާރުން ޖީ-7 ގެ އެހީ ގަބޫލުނުކުރީ ކީއްވެގެން ކަމެއް ލޮރެންޒޯނީ ވިދާޅެއް ނުވެއެވެ. އެހެންނަމަވެސް، ރައީސު ބޮލްސޮނާރޯ ވަނީ ބްޒެރިލަކީ ފްރާންސުގެ އިސްތިއުމާރުގެ ދަށުގައި އޮތް ތަނެއްގެ ގޮތުގައި އޮތް ތަނެއްގެ ގޮތުގައި ރައީސު މެކްރޯން އަމަލުކުރައްވަމުންދާ ކަމަށް ތުހުމަތުކުރައްވާފައެވެ.
ބޮލްސޮނާރޯގެ ޑިފެންސް މިނިސްޓަރު ވިދާޅުވީ އެމޭޒަންގައި އަނދަމުންދާ އަލިފާން ކޮންޓުރޯލުން ބޭރުނުވާ ކަމުގައެވެ.
މިނިސްޓަރު ފެރްނާންޑޯ އަޒެވަޑޯ އެ ސިލްވާ ވިދާޅުވީ އަލިފާން ނިއްވުމަށާއި، ތިމާވެށްޓާ ގުޅުންހުރި ޖަރީމާތައް ހުއްޓުވުމަށް އެމޭޒަން ސަރަހައްދުގައި ސިފައިންގެ 44 ހާސް މީހުން ހަރަކާތްތެރިވަމުންދާ ކަމުގައެވެ.
